Link to home pageLanguagesLink to all Bible versions on this site
18
Manetualain eilaꞌo-limalopen tui kota Babel a hehea heni na
1 Basa ria boe ma, au ita eilaꞌo-limalope feken esa neme nusatetu-ikutemaꞌ a mai bali. Ana nanuu kuasa ma makaledo na kahereꞌ nan seli losa tao naa dae-bafoꞌ a makaleledon. 2 Ana nafada nambera nae,
“Hea neu so! Hea neu so! Kota Babel a hea neu so!
Tuꞌu neu so! Tuꞌu neu so! Kota kahereꞌ ria tuꞌu neu so!
Ana dadi neuꞌ nitu ra mamana leleon so.
Ana dadi neuꞌ dula-dale tadaluꞌ ara nusa-namon so.
Ana dadi neuꞌ basa manupui mana nanaa poporaꞌ ma banda mates ara mamana nabua nara so.
Ana dadi neuꞌ basa banda tadaluꞌ ara oka nara so.✡Yesaya 21:9; Yeremia 51:8; Daebafo Rupa-lole Bebeuꞌ a 14:8; Yesaya 13:21; Yeremia 50:39
3 Ana hea neu, nana huu basa lahenda nusaꞌ rai dae-bafoꞌ a,
mai rinu mafuꞌ neme ria anggor na mai.
Ana tuꞌu neu, nana huu basa leo fo rai dae-bafoꞌ a,
mai hohoke kota ria lahenda nara.
Maneꞌ reme basa nusaꞌ ara,
mai hohoke rai na.
Lahenda papalele remeꞌ basa bendar ara,
mai raseꞌo losaꞌ ara ramasuꞌi so.
Huu no kota ria sama leoꞌ inaꞌ fo riꞌ nahiiꞌ asa basa lole-napuꞌ a.
Huu no kota ria sama leoꞌ manasosoa fo riꞌ nahiiꞌ saka basa mina-malada.”✡Yesaya 23:17; Yeremia 51:7

4 Basa de au amanene seluꞌ haraoe fekeꞌ esa naloo neme lalai mai nae,

“Ae! Basa Au lahenda kara emin!
Malai kalua meme naꞌ mai leo!
Foa ela kota ria leo!
Bosoꞌ tao tuka kota ria lahenda nara tadalun,
ela bosoꞌ hapu sira huhuku-lalaken boe.✡Yesaya 48:20; Yeremia 50:8; 51:6, 45
5 Huu no sira tadalu nara
dodouꞌ nan seli so.
Ma sira sala-sikon
natutuleꞌ losa lalai so.
Besaꞌ ia, Manetualain ta nafarene heni
sira eno masoda tadalun ria.
Besaꞌ ia, Manetualain sadia
fo sakaꞌ huku si.✡Tutui Masososaꞌ 18:20-21; Yeremia 51:9
6 De emi muste balas sira tadalu nara,
sama leoꞌ ara tao tadaluꞌ neuꞌ lahenda fekeꞌ ara.
Tehuu emi muste balas sira,
losaꞌ laiꞌ dua.
Fai a ulu na ara tipu-dai lahenda,
fo rinu anggor doidoso, neme sira makotee lilopilas na mai.
Tehuu besaꞌ ia sira siꞌ muste rinu
anggor doidosa ria, losa laiꞌ dua.✡Sosoda Iꞌio-oꞌoaꞌ ara 137:8; Yeremia 50:29
7 Sira tao ao nara kahereꞌ.
Ma soꞌu radedema ao nara.
Ara rahiiꞌ rasoda adaꞌ noi nai lole-napuꞌ.
Ara rahiiꞌ adaꞌ noi mina-malada.
Huu ria na de, ara muste hapu susa bauinaꞌ.
De ara muste rasoda nai doidoso a.
Fai a ulu na ara dedea koaoꞌ sama leoꞌ manasosoa ria rae,
‘Au ia, ina maneꞌ!
Neuꞌ ko au ta dadi ina-falu!
Neuꞌ ko au ta dola.
Neuꞌ ko au ta pake papake keoꞌ fa.’
8 Ara dedea rae leoꞌ na losaꞌ Manetualain namanasa no si.
Losaꞌ Manetualain nau huku si.
Neuꞌ ko noi nai faiꞌ esa dalen,
ara ramalaa ran seli,
ara rasaedu-boreu,
ma sira boe mopo-mate.
Losaꞌ lahenda ra tuꞌu si leo aipilaꞌ daleꞌ reu.
Losaꞌ aipilaꞌ a naa heni popora nara.
Huu fo Ramatuaꞌ mana kuasa bauinaꞌ a, riꞌ naonda huhukuꞌ ia.
Ma Ramatuaꞌ kahere bauinaꞌ a, riꞌ naetuꞌ dedeaꞌ ia.✡Yesaya 47:7-9
9 Fai a ulu na maneꞌ ara mai
hohoke kota ria lahenda nara,
ma rasoda hapu-dai rai na.
Neuꞌ ko ara rita masuꞌ fo neme aipilaꞌ ria mai,
neuꞌ ko ara bubuluꞌ rae aipilaꞌ a naa heni basa kota ria.
Boe ma ara dola ni.
10 Boe ma ao-ina nara maninis a rita lahenda sira doidoso nara.
Tehuu ara raparani rapadei adaꞌ dooꞌ a.
Ma ara raparani mete adaꞌ noi reme naaꞌ mai.
Boe ma ara dedea rae,
‘Adoo! Kasian Babel e!
Adoo! Kasian kota kahereꞌ on!
Huu fo noi jam esaꞌ a dalen, o hapu huhukuꞌ.
Huu fo noi hate mataꞌ, o malulutuꞌ so.’✡Yeskial 26:16-17
11 Lahenda fo fai a ulu na reme basa mamanaꞌ ara mai fo papalele rai naa, ramanene leoꞌ na,
boe ma ara dola,
Huu fo ta hapu lahenda esa,
nau reu asa sira hata-heton boeꞌ.✡Yeskial 27:31, 36
12 Ta hapu esa nau neu asa
sira bua-loa ao lilopilas, lilofula nara,
batu makadilaꞌ, do mutiara nara.
Ta hapu esa nau neu asa
sira tema lenan, tema sutra,
do, tema balanau fekeꞌ ara fo pilas do pilabarakeoꞌ nara.
Ta hapu esa nau neu asa
sira hata-heton neme ai nana maboomeniꞌ, gading madudulaꞌ,
do ai madudulaꞌ fekeꞌ ara.
Ta hapu esa nau neu asa
sira hata-heton neme riti, besi, do batu marmar.
13 Ta hapu esa nau neu asa
sira ai maꞌeen, do ai rou maꞌee rupa nara.
Ta hapu esa nau neu asa
sira ainana maboomenin, do mina maboomeni rupa nara.
Ta hapu esa nau neu asa
sira oe anggor, mina saitun,
uuꞌ, do hade gandum.
Ta hapu esa nau neu asa
sira sapin, bibi-lopon, do dara nara.
Ta hapu esa nau neu asa
sira kareta nara,
do, sira ata nara.✡Yeskial 27:12, 13, 22
14 Neuꞌ ko lahenda papalele ra rasaledale rae,
‘Adoo Babel e!
Adoo kota kahere on!
O hata-heto lole-napum fo o lahenda mara rahiiꞌ raan seli a,
taꞌa so.
Mopo basa si so, losaꞌ ara dadi reuꞌ lahenda manatoꞌa-manataaꞌ,
losaꞌ toꞌa-taa ran seli.’
15 Fai a ulu na, lahenda papalele sira ramasuꞌi, nana huu kota manasosoa ria.
Tehuu besaꞌ ia ara rasaledale ta etu-basan fa.
Ara biiꞌ mamateꞌ,
rita kota ria lahenda nara doidoso na.
Sira ao-ina nara maninis raan seli,
rita sira huhukun ria.
Tehuu ara raparani noi mete reme dooꞌ a mai.
Ara raparani rapadei adaꞌ naaꞌ.
16 Boe ma ara dedea rae,
‘Adoo! Kasian Babel!
Adoo! Kasian kota kahereꞌ on!✡Yeskial 27:31, 36
Fai a ulu na o lahenda mara pake papake balanauꞌ pilas, ma pilabarakeoꞌ,
neme tema mabeli a mai.
Fai a ulu na o lahenda mara papake ao nara reniꞌ lilopilas, mutiara,
ma batu makadilaꞌ mabeli.
17 Tehuu noi jam esaꞌ a dalen,
o bua-loam taꞌa so.
Adaꞌ noi hate mataꞌ,
o suꞌi-bete mara mopo basa si!”
Fai a ulu na ofaai ra kapatein ara ro mataroos ara
saꞌe ofaai reu-mai reme kota ria mai.
Tehuu besaꞌ ia, ara nafu rahaniꞌ dooꞌ a.
Ma besaꞌ ia, ara raparani mete noi reme dooꞌ a mai.✡Yesaya 23:14; Yeskial 27:26-30
18 Ara ranilu masuꞌ fo kalua neme aipilaꞌ ria mai.
Boe ma ara bubulu rae, aipilaꞌ a naa heni ni so.
Boe ma ara rasaledale rae,
‘Adoo kasian! Ta hapu kota fekeꞌ
kahereꞌ sama leoꞌ Babel soꞌ.
Adoo kasian! Ta hapu kota fekeꞌ,
malole na sama leoꞌ ria soꞌ.’✡Yeskial 27:32
19 Ara huru afu fo tao neuꞌ laka nara
nana huu sira dale nara susa.
Ara rasaedu-boreu,
nana huu dale nara ralulutuꞌ.
Boe ma ara dedea rae,
‘Adoo! Kasian Babel!
Adoo! Kasian kota kahereꞌ on!
Ami saꞌe ofaꞌ meu-mai, meni bua-loas fee o,
losaꞌ ami boe mamasuꞌi.
Ami fua meni o hata-num
losaꞌ ami boe masoda nai lole-napuꞌ a.
Tehuu adaꞌ noi jam esaꞌ a dalen,
basa sira mopoꞌ asa.
Adaꞌ noi hate mataꞌ,
basa sira, ralulutuꞌ heni si.’✡Yeskial 27:30-34

20 Boe ma, haraoeꞌ ria dedea tamba nae,

‘Ae, emi fo leo nai nusatetu-ikutemaꞌ a!
Ta parlu emi dale hedi soꞌ.
Ae, Ramatuaꞌ a lahendan emin!
Ta parlu emi susa soꞌ.
Ae, Ramatuaꞌ a lahenda nadedenu nara!
Ela leoꞌ bea na emi mamahoꞌo-matadale.
Ae, Ramatuaꞌ a mana nesimata nara!
Ela leoꞌ bea na emi mamahoꞌo.
Fai a ulu na, Babel tao nasususaꞌ emi,
kota ria ese-rumu emi,
de emi doidoso.
Tehuu besaꞌ ia, Ramatuaꞌ a balas kota ria tadalu na.’ ”✡Tui Seluꞌ Laꞌe Neuꞌ Eno Sodaꞌ a 32:43; Yeremia 51:48

21 Basa ria boe ma, au ita eilaꞌo-limalope baraꞌai inaꞌ esa neme nusatetu-ikutemaꞌ a mai. Ana mai soꞌu na batu esa, bau lahenda a. Basa de ana tuꞌu batu ria leo tasiꞌ daleꞌ neu. Ana nafada nae,

“Neuꞌ ko ara tao ralulutuꞌ Babel leoꞌ na boe.
Neuꞌ ko ara tao ramopo kota kahereꞌ ria leoꞌ na boe.✡Yeremia 51:63-64; Yeskial 26:21
22 Ta hapu lahenda,
naminaꞌ hata maliiꞌ nai kota ria.
Ta hapu lahenda,
namanene sasandu, gitar, suling,
ma fufuuꞌ a lii na nai kota ria soꞌ.
Ta hapu tukan,
noi ria nonoi na soꞌ.
Ta hapu lahenda,
napau hade nai kota ria soꞌ.✡Yeskial 26:13; Yesaya 24:8
23 Ta hapu lahenda,
dede dededeꞌ nai kota ria soꞌ.
Ta hapu lahenda,
tao feta kakabiꞌ nai naa soꞌ.
Fai a ulu na, kota ria mana maseꞌo do mana asa nara,
ramasuꞌi ran seli.
Fai a ulu na, Babel lahenda papalele nara,
rasoda nai lole-napu dae-bafoꞌ a.
Tehuu, ara pake malela maiu-mahatuꞌ,
fo tipu-dai lahenda rai dae-bafoꞌ a.
Ara pake malelaꞌ siura a,
fo rapuputaꞌ lahenda dae-bafoꞌ a.✡Yeremia 7:34; 25:10
24 Babel hapu huhuku mabera ia,
nana huu ana naisa Ramatuaꞌ a mana nesimata nara.
Kota kahereꞌ ria nalulutuꞌ,
nana huu, ana ese-rumu naisa Ramatuaꞌ a lahenda nara.
Ara raisa Ramatuaꞌ a lahendan ruma rai mamana fekeꞌ boe.
Tehuu, Babel riꞌ muste lepa-nasaa katemaꞌ salaꞌ sira.
Kota kahereꞌ ria riꞌ muste lepa na natataaꞌ ria.”✡Yeremia 51:49

<- Dae-bafo Rupa Bebeuꞌ 17Dae-bafo Rupa Bebeuꞌ 19 ->