2
Ita muste taloe-tadae aoꞌ ara, sama leoꞌ Yesus Kristus
1 Toranoo susue-lalaiꞌ fo riꞌ dadi meuꞌ Yesus Kristus lahendan! Ana fee emi hata malole dodouꞌ so. De, emi bisa tao matetea esa no esa dale na. Emi bisa fee lelea-nonoreꞌ fo naoka-nasamu neme emi nasusue-nalalaiao mara mai. Emi bisa masoda balaroe-balanauꞌ esa no esa, nana huu Ramatuaꞌ a Dula-dale Na noi-tao nai emi basa talada. Ma bisa matudu emi dale kasian mara, ma dale balaroe-balanau esa no esa. 2 Maneniko emi tao leo naꞌ, sona au amahoꞌo-atadale. Lena-lenaꞌ bali, maneniko emi masue-malai ao ma teiꞌesa-daleꞌesa, masoda no enoꞌ esaꞌ a, ma mala haraꞌ fo moi-tao neuꞌ esa. 3 Bosoꞌ tao hata fo saka noi oontoꞌ a, soaneuꞌ emi ao-ina heheli mara. Ma bosoꞌ tao ao mara emi kahereꞌ lena neme lahenda fekeꞌ. Sekona te o koao ma ta nanuu neteꞌ fa. Tehuu ita muste taloe-tadae aoꞌ ara, fo tao lahenda fekeꞌ a lena neme ita mai. 4 Ma emi bosoꞌ urus adaꞌ noi nonoi mesa mara. Tehuu ita muste mete-relu lahenda fekeꞌ a parluu na boe.
5 Ita dale na, muste sama noo Yesus Kristus dale Na.
6 Leo mae Ria rupa-lolen sama leoꞌ Manetualain,
ma Ria boe Ramatuaꞌ sama leoꞌ Manetualain,
tehuu Ana poꞌi hak Na,
ma Ana ta pake Ria pangkat Na.
7 Boe ma Ana onda leo dae-bafoꞌ ia mai,
pake rupa-loleꞌ sama leoꞌ lahenda dae-bafoꞌ a.
Ana foa ela katemaꞌ hak Na,
de tao ao Na dadiꞌ ata.
8 Ta dadi adaꞌ noi lahenda aanaꞌ a,
tehuu Ana tao aon leoꞌ lahenda mana dadi taaꞌ,
ela tao tuka Manetualain hihii-nanaun.
Leo mae lahenda raisa Ni nai ai kakeꞌ a boe, Ana noi sipo-sipoꞌ a,
ma maten, sama leoꞌ Ria nana lahenda tadaluꞌ.
9 Huu no Ria naloe-nadae aon leoꞌ na,
de Manetualain soꞌu nadedema Ni.
Ma fee Ni nade kahereꞌ nan seli.
Ta hapu nadeꞌ esa, kahereꞌ lena heni Ria mai boeꞌ.
10 Manetualain soꞌu nadedema Ria nade Na,
ela basa lahenda ra fee hada-horomata neuꞌ Ana.
Riꞌ: lahenda rai lalai,
ma lahenda rai dae-bafoꞌ a.
Lahenda masodaꞌ, ma lahenda mana mateꞌ.
Neuꞌ ko basa lahenda ra sundaꞌ undulaka nara, fo doꞌo-tabe Ni.
11 Ma neuꞌ ko basa lahenda ra rae, “Yesus Kristus nana tetebe Ramatuaꞌ!”
No ria na, ara io-oa Amaꞌ Manetualain.✡Yesaya 45:23
Ita dadi sama leoꞌ ruuꞌ fo nahaa-nakaledo soaneuꞌ dae-bafoꞌ a
12 Toranoo susue kara emin! Nenene matalolole! Faiꞌ naa raa au bei nai kota Filipi a, emi mamanene neuꞌ au, boe ma emi tuka Manetualain eno roo-tetu Na. Besaꞌ ia ita esaꞌ ko matan nai mamana fekeꞌ so, tehuu au hule fo emi sadia maroo ela masoda roo-tetuꞌ. Mafarene te, maneniko emi ta mamanene neuꞌ Ana fa, sona neuꞌ ko emi mita mataꞌ! Nana huu Ria riꞌ soi-tefa na emi neme sala-siko mara mai. Boe ma emi muste masoda noo matetu-maraaꞌ, huu fo emi dadi meuꞌ Ria lahendan so. 13 Manetualain riꞌ noi-tao nai emi dale mara. Ria riꞌ soi enoꞌ ela emi nau mamanene Ni. Ma Ria riꞌ fee kuasa de emi nau moi-tao fo tao ma dale Na namahoꞌo.
14 Maneniko emi tao sudi ubeaꞌ, sona bosoꞌ mamumuu, ma bosoꞌ mareresiꞌ. 15 Tao leo naꞌ, ela emi bisa dadi meuꞌ lahenda dale makamoiꞌ, ma lahenda fo ta nanuu salaꞌ fa. Emi masoda nai lahenda tadaluꞌ ara ro mapuputaꞌ ara talada. Tehuu emi bosoꞌ tuka si! Emi masoda ma muste makamoiꞌ, huu fo emi nana Ramatuaꞌ a ana nara. No ria na emi masoda ma muste nahaa ela natudu fee si enoꞌ, sama leoꞌ ruuꞌ ara rahaa-rakaledo soaneuꞌ dae-bafoꞌ ia.✡Tui Seluꞌ Laꞌe Neuꞌ Eno Sodaꞌ a 32:5 16 Emi masoda noo roos, ma malalaꞌo Manetualain Dedea-nafadan. No ria na, neuꞌ ko emi tao ma au dale ka namahoꞌo-natadale, tepoꞌ fo Yesus Kristus natafali mai. Ma au sosota ka, hapu buna-boa malole, nana huu ta tuꞌu henin hihiiꞌ fa.
17-18 Tehuu uniꞌ ko leo au poꞌa heni laesaꞌ au soda ka, fo dadi tutunu-hohotuꞌ ela emi bisa mamahere tebe-tebe, ma malalaꞌo Ramatuaꞌ a nonoi-tataon, sona au sipoꞌ no dale namahoꞌo. [Ria, sama leoꞌ malaka agama a poꞌa oe anggor neuꞌ mei tutunu-hohotuꞌ a fo doꞌo-tabe Ramatuaꞌ a.] No ria na, ita bisa tamahoꞌo belaꞌ a, nana huu tutunu-hohotuꞌ ria, ta mana dadi taꞌ fa.✡Susura Dudui Nadeꞌ a 28:7
Timotius nonoi laka na
19 Au amahehenaꞌ, ta dooꞌ a soꞌ, te Ramatua Yesus soi enoꞌ fo au fee Timotius neti, ela tao natetea emi dale mara. Basa nana, ana natafali leo iaꞌ mai bali, fo nafada au laꞌeneuꞌ emi leleo-lalaom, ma natetea au dale ka. 20 Au ta adenu lahenda fekeꞌ fa. Au adenu noi Timotius, nana huu ria daleꞌ esa no au. Ma ana sue-lai matetuꞌ emi. 21 Ria ta sama leoꞌ toranoo fekeꞌ ara fa. Ara, afi adaꞌ noi sira parluu mesa nara, tehuu ta urus hata fo penting soaneuꞌ Yesus Kristus. 22 Tehuu emi bubuluꞌ mae, Timotius noi-tao sota nan seli, ela nalalaꞌo Manetualain nonoi-tataon. Ana noi-tao no au, sama leo anaꞌ esa noi-tao fee papa na. Ami dua meu tui-beka Ramatua Yesus Tutui Malole Na nai basa mamanaꞌ ara so. 23 Maneniko ara raetuꞌ basa au dedea ka nai ia, besaꞌ ko au fee Timotius leo emi naaꞌ neti. 24 Tehuu besaꞌ ia, Manetualain natetea au dale ka nae, ta dooꞌ a soꞌ, te au bisa mai dama emi boe.
Epafroditus nonoi laka na
25 Maulu na, au hapu susa. Boe ma emi fee ita toranoon Epafroditus mai dama au. Ana nalalaꞌo Ramatuaꞌ a nonoi-tataon sama-sama no au, sama leoꞌ soldadu fo makate tuka malaka na paretan. Tehuu besaꞌ ia, au ameda an, feen fali seluꞌ leo emi neu. 26 Ria dale na nahiiꞌ nau nita emi so. Ma ria dale na dodaꞌ neuꞌ emi, nana huu bubuluꞌ nae, emi mamanene rae ana odaꞌ namahediꞌ a. 27 Memaꞌ tebe. Faiꞌ naa ra ana namahedi beraꞌ losaꞌ hisadeina maten. Tehuu Manetualain sue ni de puli nan. Ma Ramatuaꞌ a sue-lai au boe, de puli na Epafroditus, ela au bosoꞌ boe-boe susa. 28 Huu ria na de au ahiiꞌ an seli feen fali leo emi neti, ela emi basa mabua no dale namahoꞌo. Kalu leoꞌ na, sona au dale ka tama. 29-30 De, emi muste sipoꞌ ana no malole, huu fo ria nana Ramatuaꞌ a lahendan. Ma emi muste fee hada-horomata neuꞌ basa lahenda, fo rupa-lolen sama leoꞌ ria. Huu fo ana nalalaꞌo Kristus nonoi-tataon, losaꞌ hisadeina maten. Ma ana ta heoꞌ baiꞌ boeꞌ, nana huu ana nau tulu-fali au, huu fo emi ta bisa mai tulu-fali au. De, emi muste sipoꞌ seluꞌ ana no dale balaroe-balanauꞌ.
<- Filipi 1Filipi 3 ->