Filipi

Ami haitua susuraꞌ ia fee basa lahenda, fo ramahere Yesus Kristus nai kota Filipi. Ma ami nau basa mauli-malaka saraniꞌ ara, ma manatulu-manafali mauli-malaka saraniꞌ ara, boe bubuluꞌ ratalolole susuraꞌ ia isi na.

2 Manetualain nana ita Aman. Ma Yesus Kristus nana, ita Ramatuan. Ami hule fo Ara ratudu dale malole Nara neuꞌ emi, fo ela emi bisa masoda no tetu-temaꞌ, mole-dame, ma tesatei-tamadaleꞌ.

3 Leo mae au ta ita emi fa dooꞌ a so, tehuu au ta afarene heni emi! Tuka-tuka faiꞌ au afarene emi, au hule makasi neuꞌ Ramatuaꞌ a, nana huu emi mamahere maroo Ni. 4 Fai bea ma au hule-haradoi fee emi, au dale ka namahoꞌo, 5 nana huu neme fai masososaꞌ a, emi sipoꞌ Ramatuaꞌ a Tutui Malole Na, emi malalaꞌo maroo Ria nonoi-tataon, sama-sama moo au. 6 Ria natudu nae, Manetualain mulai noi-tao nai emi dale mara so. Ma au bubuluꞌ matetuꞌ ae, neuꞌ ko Ana nalalaꞌo nabasa katemaꞌ Ria nonoi-tatao malole na, losaꞌ tepoꞌ fo Yesus Kristus natafali mai.

7 Tebe naraa au sue-lai emi, nana huu neme uluꞌ mai au dale ka nanahekeꞌ noo emi so. Faiꞌ naa ra, emi moi-tao sama-sama moo au, tepoꞌ fo au afada lahenda ra laꞌeneuꞌ Ramatuaꞌ a Tutui Malole Na, ma tepoꞌ fo au ataa atafaliꞌ lahenda fo ta sipoꞌ Tutui Malole ria. Leo mae au masoꞌ bui a, tehuu emi ta malai ela au fa. 8 Manetualain riꞌ bubuluꞌ nae, au dale ka nahiiꞌ na emi seli. Nana huu au susue-lalai ka neuꞌ emi a, sama leoꞌ Yesus Kristus susue-lalain.

9-10 De, au hule-haradoi fee emi, leo iaꞌ: Au hule fo emi nasue-nalaiaom esa no esa, boe-boe tamba naroo losaꞌ henu-sofeꞌ. Au hule fo Manetualain fee emi bubuluꞌ matetuꞌ hata malole a, fo ela emi masoda mara dadi lalao-lalafuꞌ. No ria na, tepoꞌ fo Kristus naetuꞌ basa lahenda ra dedean, sona Ana nafada nae, emi ta manuu salaꞌ esa boeꞌ, 11 nana huu Ria riꞌ tao na emi dale mara makamoiꞌ a, ela emi bisa masoda roos a. Ma emi masoda roos a leoꞌ na, sona lahenda fekeꞌ ara soꞌu radedema Manetualain, ma io-oa Ni.

12 Toranoo susue kara emin! Au nau fo emi bubuluꞌ mae, lahenda tao rasususaꞌ au, losaꞌ ara tee au leo bui daleꞌ u. Tehuu Ramatuaꞌ a Tutui Malole Na nanatui-nanabekaꞌ laꞌo naroo, 13 losaꞌ soldadu fo ranea nai uma mana pareta a, ma basa lahenda fekeꞌ ara boe bubuluꞌ rae, au masoꞌ bui a nana huu au tuka Yesus Kristus.✡Lahenda Nadedenuꞌ ara Tutuin 28:30 14 Manetualain lahendan nara boe rita hata fo dadi a, leo mae au nai bui daleꞌ. Huu ria na, de ara boe-boe raparani, losaꞌ ara ta bii soꞌ. Ma ara dedea lelekaꞌ, Ramatuaꞌ a Dedea-nafadan nai basa mamanaꞌ ara.

15-17 Nai ia, hapu lahenda rupaꞌ dua riꞌ makate ranori-rafada laꞌeneuꞌ Kristus. Riꞌ ruma roi-tao no dale roos, ma ruma bali roi-tao no dale peko-pakiꞌ. Roi-tao no dale roos a, nana dale nara malole a roo au. Ara bubuluꞌ matetuꞌ rae, au lepa-asaa susa ia, nana huu alalaꞌo au nonoi-tatao ka, ma ta heoꞌ baiꞌ boeꞌ.

Tehuu, roi-tao no dale peko-pakiꞌ a, ara rapeda daleꞌ, ma saka nadeꞌ. Ara tao nabika-nabatiꞌ neuꞌ lahenda kamahereꞌ ara, sadi ruma tuka si. Ara saka enoꞌ, ela bisa io ao nara rae, sira kahereꞌ lena neme au mai. Sira afi rae, maneniko hapu lahenda tuka si, sona neuꞌ ko tao na au susa ka nambera nai bui daleꞌ.

18 Tehuu pesi si remeꞌ na! Au ta tao daleꞌ neuꞌ lahenda fo nanori-nafada no dale roos do, taꞌa. Penting na riꞌ ara ranori-rafada laꞌeneuꞌ Kristus! Ria riꞌ tao na au dale ka namahoꞌo.

Ma au amahoꞌo tebe-tebe, 19 nana huu au bubuluꞌ ae, emi hule-haradoi fee au, ma Yesus Kristus Dula-dale Na tulu-fali au. Huu ria na, de au bubuluꞌ neuꞌ mateꞌe na, malole a. 20 Leo mae au asoda do, mate do, ta hata-hata fa. Sadi Manetualain pake au fo soꞌu adedema Yesus Kristus nade Na, ma anori-afada lelekaꞌ laꞌeneuꞌ Ana, losaꞌ ta hapu hata esa tao namamaeꞌ au boeꞌ. Au amahehenaꞌ au tao aroo basa ia ra, losaꞌ doo-doo na neu.

21-23 Au afi ae leo iaꞌ: maneniko au asoda, sona ela au asoda abua-aesa oo Kristus, ma au alalaꞌo aroo Ria nonoi-tataon. Ria nana malole a. Tehuu maneniko au mate, au onto lena bali. Nana huu au bisa foa ela dae-bafoꞌ ia, ma asoda seluꞌ fo leo sama-sama oo Kristus nai nusatetu-ikutemaꞌ a. Huu ria na, de au dale ka kadudua, ma au ta bubuluꞌ ae bea riꞌ malole lena fa! 24 De, leo iaꞌ! Huu no emi bei parluu au nai ia, de malole lenaꞌ au leo sama-sama oo emi nai dae-bafoꞌ ia. 25 Au amahere ae au teu-fai ki bei naruꞌ a, de au bisa leo sama-sama oo emi. Ramatuaꞌ a nau au tao atetea emi dale mara, boe ma emi boe-boe mamahere Ni no dale namahoꞌo. 26 De, neuꞌ ko emi bisa soꞌu madedema Yesus Kristus nade Na, nana huu Ana soi enoꞌ de au bisa fali seluꞌ mai dama emi.

27-28 Tehuu leo mae leoꞌ bea boe, emi masoda ma muste matetuꞌ, huu fo emi nana, Ramatuaꞌ a lahendan. De, emi masoda ma muste naraa, ma tao tuka hata fo Kristus Tutui Malole Na, nanori-nafadan neuꞌ emi so a. Maneniko au dadi atafali mai dama emi, do oi amaneneꞌ a neme lahenda mai rae, emi masoda no malole, sona au amahoꞌo. Au bisa bubuluꞌ ae, huu no Dula-daleꞌ malalao-malalafu a tataon, de emi masoda daleꞌ esa. Ma au bisa bubuluꞌ ae, emi sadia fo sama-sama malalaꞌo Ramatua Yesus Tutui Malole Na, fo ela lahenda fekeꞌ ara boe ramahere. Ma emi ta bii fa, leo mae lahenda soaꞌ emi. Ria dadi tanda fee musunooꞌ ara nae, Manetualain nau tuꞌu-tapa heni si leo ai-pila naraka daleꞌ reu. Tehuu, Ana fee emi soda-moleꞌ manabasa taaꞌ a. 29 Huu no Manetualain malolole na seli, de Ana soi enoꞌ, fo emi bisa mamahere Kristus, ma dadi meuꞌ Ria lahenda nara. Ta adaꞌ noi namahereꞌ a fa, tehuu Ana fee lelaꞌ fo emi hapu susa, nana huu emi tuka Ni. 30 Au ae leoꞌ na, huu fo lahenda ruma rai na soaꞌ emi, nana huu emi malalaꞌo Kristus Tutui Malole Na. Mafareneꞌ, te faiꞌ naa ra, ara soaꞌ au leo naꞌ. Ma besaꞌ ia, bei hapu lahenda fekeꞌ nai ia, soaꞌ au boe.✡Lahenda Nadedenuꞌ ara Tutuin 16:19-40

Filipi 2 ->