1 Basa riaꞌ boe ma Yakob laꞌo naroo leo dulu neu. 2 Faiꞌ esa, boe ma ana nita oe dodoluꞌ esa naneneaꞌ no koroꞌ esa. Naneneaꞌ nai naa, hapu kedaeꞌ, bibi-lopo bubuaꞌ telu ara rahani fo rinu oe. Tehuu batu bauinaꞌ esa mantatanaꞌ nai oe dodoluꞌ ria. 3 Biasa kalu kedaeꞌ, bibi-lopo ra basa si tesa, sona besaꞌ ko manafoo ra eso heni batu ria, fo aso oe fee banda sira rinu. Rinu basa, nana ara tatana seluꞌ batu a neuꞌ oe dodoluꞌ ria.

4 Boe ma Yakob neu natane manafoo sira nae, “Ae! Emi meme beaꞌ mai?”

Ara rataa rae, “Ami meme koro Haran mai.”

5 Basa de Yakob natane bali nae, “Emi malelaꞌ au toꞌo ki Laban, do? Ria nana Nahor anan.”

Boe ma ara rataa rae, “Ami malelaꞌ ana.”

6 Boe ma Yakob natane naroo bali nae, “Ana soda-moleꞌ, do?”

Ara rataa rae, “Tou lasiꞌ a soda-moleꞌ. Soba mete. Ana feto na riꞌ naꞌ, nade Rahel, foo neni bibi nara, mai fo hani si rai ia. O mahani leo.”

7 Basa de Yakob dedea bali nae, “Besaꞌ ia, ledo a bei nai lain. De, malole lenaꞌ banda fo rabua rai ia, sona emi hani si leo. Basa nana foo meni si leo moꞌ reu fo raa nau-aidoo bali.”

8 Tehuu ara radedea laka rae, “Ae! Ta bisa leo naꞌ fa! Ami muste mahani basa manafoo ra reni banda nara, mabubua si rai ia dei. Besaꞌ ko ami eso heni batu ria, fo fee banda ra rinu.” 9 Yakob bei dedea no lahenda sira, te Rahel foo neni papa na bibi nara losa so. Ria riꞌ biasa foo banda sira.

10 Yakob nita Rahel no bibi nara, boe ma ana neu eso heni oe dodoluꞌ ria batu tatana na. Boe ma ana fee toꞌo na banda nara rinu. 11 Basa boe ma ana holu na Rahel de deꞌin ma dola. 12 Ana tui Rahel nae, “Fadi, ee! Au ia nana o papa ma feton Ribka anan.” Boe ma, Rahel nalai neun de nafada papa na.

13 Fai fo Laban namanene Rahel tui laꞌeneuꞌ Yakob, feto ni Ribka ana na, boe ma nalai fo neu soruꞌ ana. Naneta noo ni, boe ma Laban holu nan de deꞌin, basa de no Yakob leo uma reu. Boe ma Yakob tui basa-basan neuꞌ Laban. 14a Basa boe ma Laban dedea nae, “Tebe leoꞌ na! Ita dua kileoboboki esa!”

14b Yakob leo no si losa bulaꞌ esa so, 15 Laban dedea noo ni nae, “Leo iaꞌ, Ako! Au ta nau o moi-tao hihiiꞌ fee au, nana huu ita dua kileobobokiꞌ esa. O hule kadi ma bau bea?”

16 Na, Laban nanuu ana fetoꞌ dua. Uluꞌ a nade Lea. Fadiꞌ a nade Rahel. 17 Lea mata makanaroꞌ.[a] Tehuu Rahel sona napuꞌ mesan, ma ao-ina na deseꞌ-dese. 18 Yakob nahiiꞌ Rahel. De, ana nataa Laban nae, “Au oi-tao fee toꞌo ka teuꞌ hitu, sadi toꞌo ka fee au sao Rahel.”

19 Laban nataa nae, “Au sipoꞌ! Berako au fee Rahel sao lahenda fekeꞌ, malole lenaꞌ sao o, au kileoboboki ka! De, o leo mahaniꞌ ia, fo moi-tao fee au.” 20 Yakob noi-tao teuꞌ hitu, ela bisa hapu Rahel. Tehuu ana nahiiꞌ na Rahel seli. De, teuꞌ hitu nana, ana nameda nan nonooꞌ nae adaꞌ noi faiꞌ hidaꞌ a.

21 Basa teu kahituꞌ sira, boe ma Yakob nafarereneꞌ fee Laban nae, “Toꞌo! Au oi-tao fee toꞌo ka teuꞌ hitu ian so, de besaꞌ ia fee au sao Rahel leo.”

22 Boe ma Laban tao feta kakabiꞌ, ma naloo basa lahenda rai nusaꞌ ria. 23-27 Hatun ria, Laban ta fee Rahel fa, tehuu ana fee Lea masoꞌ leo Yakob mamana leleon daleꞌ neu. De, Yakob suku noꞌ ana. Balahaꞌ besaꞌ ko Yakob bubuluꞌ nae, ana sao Lea. Boe ma Yakob neu nadedea laka no Laban nae, “Ubeaꞌ taon de toꞌo ka edi au leo iaꞌ? Au oi-tao sota an seliꞌ teuꞌ hitu, ela hapu Rahel! Tehuu ubeaꞌ taon de toꞌo ka kati ni neniꞌ Lea?”

Basa de Laban nataa nae, “O bosoꞌ mamanasa leoꞌ na! Tuka ami nai ia hada ma, fadiꞌ a ta bole sao nauluꞌ aꞌa a. De, malole lenaꞌ leo iaꞌ dei! O mahani losaꞌ basa feta kakabiꞌ ia faiꞌ hitu dei. Besaꞌ ko o hapu Rahel, sadi o moi-tao fee au teuꞌ hitu bali.” Basa de Laban fee ria ata inan, nade Silpa fo dadi neuꞌ Lea atan.

28 Yakob nataa. Huu ria na, de basa feta a faiꞌ hitu, boe ma Laban fee Rahel sao Yakob. 29 Basa de Laban fee ata inan esa bali, nade Bilha, fo dadi neuꞌ Rahel atan. 30 Basa boe ma Yakob suku noꞌ Rahel. Ana sue Rahel lena heni Lea. Boe ma ana noi-tao tamba seluꞌ teuꞌ hitu fee arama na.

31 Tehuu MANETUALAIN bubuluꞌ Yakob sue Rahel lena heni Lea. Basa de Ana fee noi Lea boki. Tehuu Rahel ta boki fa. 32 Basa boe ma Lea nairu, de boki na ana touꞌ esa. Ana foi anaꞌ ria nade, Ruben (sosoa na nae, ‘mitaꞌ, hapu anaꞌ’),†Nai dedea Ibrani, Ruben sosoa na ‘mitaꞌ, hapu anaꞌ’. Ma hiiꞌ nae sama leoꞌ dedeaꞌ esa sosoa na nae, ‘ana nita au susa ka so’. nana huu ana nae, “Tebe MANETUALAIN nita au susa ka so. Huu ria na, de besaꞌ ia au sao ka boe nau relu-natanae au.”

33 Basa ria, boe ma Lea nairu bali, de boki na ana touꞌ esa. Ana foi anaꞌ ria nade, Simeon, (sosoa na nae, ‘lahenda ramanene so’), nana huu ana nae, “MANETUALAIN namanene so nae, sao ka ta tao daleꞌ neuꞌ au. Huu ria na, de Ana fee tamba seluꞌ au anaꞌ esa bali.”

34 Basa ria, boe ma Lea nairu bali, de boki na ana touꞌ esa. Ana foi ana ria nade, Lewi,[c] nana huu ana nae, “No anaꞌ ia, basa au dedea ka so. Tantu au sao ko nanahekeꞌ no au, nana huu au boki feen ana touꞌ telu so.”

35 Basa boe ma Lea nairu bali, de boki na ana touꞌ esa. Ana foi ana ria nade, Yahuda (sosoa na nae, ‘io-oa’), nana huu ana nae, “Oeꞌ ia, au nau io-oa MANETUALAIN!” Basa ria, boe ma Lea ta boki soꞌ.

<- Tutui Masososaꞌ 28Tutui Masososaꞌ 30 ->