Lahenda nadedenu nara Tutui na 8

1 Saulus nai mamanaꞌ ria boe. Ma ana sipoꞌ noo malole, ara raꞌisa Stefanus ria.

Saulus tao na Ramatuaꞌ Yesus lahenda nara doidoso

2 Stefanus mamate na, ria nana lahenda hida rahiiꞌ ra Manetualain seli. Ara reu oꞌo ra Stefanus popora na, de reu ratoin, ma ara dola rasaꞌeꞌedu neuꞌ ana.

Neme faiꞌ ria mai, lahenda tao ra Ramatuaꞌ Yesus lahenda nara doidoso nai kota Yerusalem, losaꞌ ara doidoso mamateꞌ, ara ralai kofelaꞌ leo Propinsi Samaria a reu. Basa sii ralai, foa elaꞌ noi Yesus lahenda nadedenu nara rai Yerusalem.

3 Tehuu, Saulus saka enoꞌ naroo fo hela nafali Yesus lahenda nara. Ana saka sii nai basa mamanaꞌ ain. Ana masoꞌ-kalua uma ra fo neu saka sii. Leo mae inaꞌ do touꞌ, ana hopu neni sii, fo tee sii leo bui daleꞌ reu.✡Lahenda Nadedenuꞌ ara Tutuin 22:4-5; 26:9-11

Felipus tui Ramatua Yesus Tutui Malole na nai Propinsi Samaria

4 Leo mae lahenda tao rasususaꞌ Yesus lahenda nara, losaꞌ ralai kofela, tehuu ara tui rafada raroo Ramatuaꞌ Yesus Tutui Malole na nai basa mamanaꞌ ain. 5 Sama leoꞌ tepoꞌ ria, Filipus ana leo kota esa nai Propinsi Samaria, fo tui nafada lahenda ara tutuiꞌ ria laꞌe Lahenda fo Amaꞌ Manetualain tudu memaꞌ ana nai faiꞌ a ulu na, riiꞌ Yesus. 6 Tepoꞌ fo lahenda dodouꞌ rita hata mana dadi bebeuꞌ fo rina ana tao ni a, boe ma sira rabua, de nenene ratalolole ria dedea na.

7 Nai naa, hapu lahenda nitu hekeꞌ ara boe. Tehuu, nitu ra ralai elaꞌ lahenda sira, ma bobouꞌ rambebera ina. Lahenda lukuꞌ ara, ma ei helaꞌ ara boe, dodouꞌ teꞌe ra ao nara. 8 Huu ria naa, de lahenda rai nusaꞌ ria, nana ramahoꞌo ramateꞌ ao nara.

9 Nai kota ria touꞌ malela esa nade Simon. Ana tao lahenda Samaria ra dooꞌ inaꞌ a soo, pake ria namalada na. Ana dedea koaoꞌ nae, “Au ia lahenda padoaꞌ!”

10-11 De nai kota ria, ana aanaꞌ do lahenda bauinaꞌ, ina-touꞌ, basa sii sesei-oꞌotoꞌ touꞌ ria nade na rae, “Wii! Lahenda ia padoaꞌ a leon! Hata fo ria taon ia nana neme Amaꞌ Manetualain kuasa na mai ria.” No ria malelan sira, de neme ulu mai, nana lahenda dodouꞌ rahiiꞌ pake ni.

12 Tehuu besaꞌ ia, ramanene Filipus nanori sii laꞌe Amaꞌ Manetualain pareta na. Ma ana natudu enoꞌ, fo ara bisa dadi reuꞌ Manetualain lahenda nara, pake Yesus nade[b] Na. Ramanene basa leoꞌ naa boe ma, lahenda dodouꞌ nau dadi reuꞌ Manetualain uma-isi nara. Ina-touꞌ boe basan nau dadi leo naaꞌ. Huu ria naa, de ara sarani sii. 13 Seko-nate, Simon boe hule fo nau dadi neuꞌ Yesus lahenda na. Boe ma ara saranin. Basa boe ma, Filipus beaꞌ neu na ana tuka-tuka dea. Faiꞌ bea ma nita Filipus tao na hata mana dadi beuꞌ soo na, noi leleuꞌ laka na nae, “We! Leoꞌ ia soo na, padoaꞌ a!”

14 Tepoꞌ ria, Ramatuaꞌ Yesus lahenda nadedenun fo rai Yerusalem, ramanene rae lahenda nai Propinsi Samaria ara, ramahere neuꞌ Manetualain Tutui Malole Na. Basa boe ma, ara fee Petrus noo Yohanis leo naaꞌ reu. 15-17 Tepoꞌ fo dua sii losa naa, boe ma ara bubuluꞌ rae, lahenda fo rai naa, ara bei ta sipoꞌ Manetualain Dula-daleꞌ Malalao-malalafu Na. Nana huu fo ara sarani sii pake noi Yesus nade Na. Basa boe ma, Petrus noo Yohanis fua lima nara reuꞌ lahenda sira, ma hule fo elaꞌ lahenda Samaria ra boe sipo Manetualain Dula-dale Malalao-malalafu Na. Basa boe ma, lahenda sira sipo tutiꞌ a.

18 Simon nita sira dua fua lima nara reuꞌ lahenda sira boe ma, ara sipoꞌ Manetualain Dula-dale Malalao-malalafu Na. Basa boe ma, Simon loo doiꞌ fee Petrus noo Yohanis ma hule nae, 19 “We! Papa kasa. Emi fee au kuasa ria boe. Fo elaꞌ faiꞌ bea ma au nau fua lima ka neuꞌ bea na, sira boe sipoꞌ Amaꞌ Manetualain Dula-dale Malalao-malalafu Na.”

20 Tehuu Petrus nasapaa ni nae, “Soe a dei laꞌe ko mo doim ria! O dale ma mae bisa asa ma Manetualain Dula-dale Malalao-malalafu Na muniꞌ doiꞌ? Taꞌa! Lahenda ta bisa asa Manetualain Dula-dale Malalao-malalafu Na fa! 21 O ta manuu hak hata-hata esa neuꞌ Manetualain Dula-dale Malalao-malalafu Na, te o dale ma ta roos a fa. O maminaꞌ noi naꞌedi-nafuleꞌ a! 22 O hahae memeꞌ sala ma mai leo. Malole lenaꞌ o hule neuꞌ Manetualain, fo kalu bisa na, Ana sasafe heni o duduꞌa-aꞌafi tadalum ria. 23 Au bubuluꞌ ae o henuꞌ noo napeda-daleꞌ a, ma hihii-nanau tadaluꞌ dodouꞌ heke ra o!”

24 Basa boe ma, Simon hule dua sii nae, “Papa kasa! Kalu leoꞌ naa soo na, emi hule fee au elaꞌ soe fo rina emi mafada a, bosoꞌ laꞌe au.”

25 Basa ria boe ma, Petrus noo Yohanis tui Ramatuaꞌ Yesus Tutui Malole Na katemaꞌ, ma ara rafada Manetualain Dedea-nafadan nai kota ria. Boe ma, ara fali Yerusalem reuꞌ. Ara tuli lalaꞌoꞌ koroꞌ nai Propinsi Samaria, fo tui-beka Ramatuaꞌ Yesus Tutui Malole Na fee lahenda manai naa ra.

Filipus naneta noo pegawe bauinaꞌ esa neme Afrika mai

26 Manetualain ei-laꞌo lima-lopen neme nusa sodaꞌ a mai nadenu Filipus nae, “Anaꞌ o ne! O laꞌo leo poꞌ ona ma mu. Tuka eno paraaꞌ fo neme kota Yerusalem sai leo kota Gasa a neu.” 27-28 Filipus namanene na pareta ria, boe ma ana laꞌo tutiꞌ a. Faiꞌ fo ana nai enoꞌ ria, boe ma nita touꞌ esa, ria nana lahenda bauinaꞌ esa neme nusa Etiopia.† Ria rina tao mataꞌ neuꞌ ina mane Kandake a hata nara katemaꞌ. Ana besaꞌ ko hule-haradoi main neme Yerusalem, ma besaꞌ ia ana fali saꞌe kareta. Tepoꞌ ria Filipus teo nita ni, ana natuuꞌ lees nai kareta lain. Ana lees nai Amaꞌ Manetualain mana-dedean baꞌi Yesaya, susura na. 29 Boe ma, Amaꞌ Manetualain Dula-dale Malalao-malalafu Na nadenu Filipus naneneaꞌ leo kareta ria neu, fo naneta noꞌ touꞌ ria. 30 Ana losa mata te namanene touꞌ ria lees nai baꞌi Yesaya susura na. Boe ma ana natane nae, “Papa! Papa ka bubuluꞌ hata fo papa ka lees ria aa, do taꞌa?”

31 Boe ma, touꞌ ria nataa nae, “Taꞌa. Lahenda muste rafada matalolole fee au soo na, dei au bubuluꞌ. Ae lain mai matuuꞌ mo au nai ia.” 32 Na, duduiꞌ ria lii na nae leoꞌ ia:

“Ara hela roon nonooꞌ leo lahenda hela reni bibi-lopo a,

fo sakaꞌ halan.

Ria boe dadiꞌ leo bibi-lopo anaꞌ fo lahenda kuti bulu na,

tehuu ta namee fa.

Ana ta huꞌa bafa na fa,

ma ta nataa heni hara na boeꞌ.

33 Basa boe ma, ramumulu-ramamaeꞌ ana;

Ara raꞌetuꞌ dedea na ta ma tetuꞌ fa.

Seko-nate ria salan taꞌa.

Na, ita bei tae ubeaꞌ bali,

Ana bei ta nanuu tititi-nonosiꞌ fa, te ara raꞌisan so,”✡

34 Lees basa boe ma, lahenda bauinaꞌ ria natane Filipus nae, “Leoꞌ bea? Baꞌi Yesaya dedea laꞌe ria ao-ina na, do laꞌe lahenda fekeꞌ?”

35 Basa boe ma, Filipus nanori touꞌ ria Ramatuaꞌ Yesus Tutui Malole Na. Ana mulai neme Yesaya dudui bisina naa mai, natudu enoꞌ fo tuka Yesus. 36 Ara bei laꞌo-laꞌo boe ma, rita oe nai lee esa. Basa boe ma, Filipus bei ta dedea basa boeꞌ, te ana nafada Filipus nae, “Papa. Soba mete dei, te oe a riiꞌ naaꞌ, de kalu papa ka ma taa soo na, ita onda fo sarani au maiꞌ ia leo.”

37 [Boe ma, Filipus sipoꞌ nae, “Kalu papa ka mamahere tebe-tebe neuꞌ Ramatuaꞌ Yesus soo, na bisa, te pupute-aꞌaiꞌ taꞌa. Mai ita onda fo au sarani papa ka leo.”

Boe ma, ana nataa nae, “Au amahere tebe-tebe ae, Yesus ia, nana Lahenda fo Amaꞌ Manetualain tudu memaꞌ ana neme uluꞌ mai soo. Ria nana Amaꞌ Manetualain Ana na.”]‡

38 Basa boe ma, touꞌ ria nadenu, de rateꞌe kareta a. Boe ma ara onda, de leo oe daleꞌ reu. Boe ma, Filipus saranin neuꞌ na.

39 Dua sii kalua reme oe daleꞌ mai boe ma, Manetualain Dula-dale Malalao-malalafu Na bau noo Filipus leo mamana fekeꞌ neu. Lahenda bauinaꞌ ria ta nitan sooꞌ. Boe ma, touꞌ a laꞌo naroo, ma dale na namahoꞌo nan seliꞌ. 40 Tehuu, Filipus keke nue te nai koroꞌ esa, nade Asotus.§Nai dedea Yunani daleꞌ, koroꞌ ria nade Asotus, ma maꞌulu na nade Asdod Neme naaꞌ mai, ana laꞌo naroo fo nafada lahenda ra Yesus Tutui Malole na. Ana tuli lalaꞌoꞌ basa koroꞌ ara, losa kota Kaisarea.

<- Lahenda nadedenu nara Tutui na 7 Lahenda nadedenu nara Tutui na 9 ->