1 Toranoo kara emin! Ami ta parluu duiꞌ mae, Ramatuaꞌ a mamai na, laꞌe liꞌu hida, do bulaꞌ a faiꞌ hida. 2 Huu fo emi basa bubuluꞌ, Ria mamai Na, nakekeꞌ a, sama leoꞌ naꞌo a mai nai fai hatuꞌ.[a] 3 Ria mamai Na sama leoꞌ lahenda ratuuꞌ nee-nee, kekeneu te ara hapu soe boe. Ma sama leoꞌ ina kairus a, kekeneu te nameda bobokiꞌ. Maneniko basa ia ra dadi, sona ita ta bisa tipa heni si soꞌ! Ramatuaꞌ a natafali mai na leo naꞌ boe.

4-6 Toranoo kara emin! Bosoꞌ losa, Ria mamai Na, noi saaꞌ na emi, sama leoꞌ naꞌo a mai fatilada na, naraa no emi suku mamanee. Bosoꞌ losa leo naꞌ! Ita ta tasoda nai maꞌiu-mahatuꞌ a daleꞌ, sama leo lehenda fekeꞌ fo suku ramanee. Nana huu ita fo tamahere neuꞌ Yesus, tasoda nai makaledoꞌ a so, sadia fo sipoꞌ Ana, ma tanea tatalolole ita masoda na. Basa hihii-nanauꞌ ia ra emi bubuluꞌ asa so! 7 Lahenda suku nai hatuꞌ, ma lahenda mafuꞌ boe nai hatuꞌ. 8 Emi bosoꞌ tao leo naꞌ, huu fo ita tasoda nai makaledoꞌ a daleꞌ so. Emi muste manea masoda mara. Maneniko emi mamahere maroo neuꞌ Ramatuaꞌ a, ma esa sue-lai esa, sona sama leoꞌ soldadu fo pake hata babaa araꞌ. Ma kalu emi mamahena maroo neuꞌ Ramatua Yesus fo riꞌ soi-tefa na emi meme Manetualain nasa-boliin mai, sona sama leoꞌ soldadu a babaa laka na pake silaka besi.[b]

9 Manetualain ta here na ita, fo ela hapu Ria huhuku nara. Tehuu Ana here na ita, fo hapu soda-moleꞌ, nana huu tamahere neuꞌ Yesus Kristus ita Ramatua Na. 10 Ana mate kati ita so. De, neuꞌ ko Ana natafali mai, sona leo mae ita mana mate do, bei tasoda do, basan hapu soda-moleꞌ manabasa taꞌa.[c] 11 Huu ria na, pake au dedea-nafadak sira fo esa matetea esa dalen, ma matulu-mafali ao sama leoꞌ maꞌulu na emi tao a.

12 Toranoo kara emin! Fee hada-horomata neuꞌ ina-ama mauli-malaka uma mamasoꞌ ara. Sira roi-tao mela-maku raan seli fee emi. Ma sira fee nafarereneꞌ ela emi bosoꞌ tuda. 13 Doruꞌ asa meniꞌ emi susue-lalai mara, huu fo ara roi-tao rahere soa neuꞌ emi. Masoda mole-dame esa no esa.

14 Toranoo kara emin! Ami sakaꞌ mafarereneꞌ fee emi leo iaꞌ: masaꞌai aomataꞌ ara fo roi-tao tebe-tebe. Matetea dale manadodaꞌ ara, tulu-fali lahenda aanaꞌ ara, ma manenete dale mara mo basa lahenda ra.

15 Bosoꞌ balas tadaluꞌ no tadaluꞌ. Tao noi nonoi-tatao malole fee basa lahenda ra. Tao malole neuꞌ lahenda fekeꞌ ara, bosoꞌ noi neuꞌ ita lahenda nara.

16 Mamahoꞌo-matadale maroo. 17 Hule-haradoi laꞌo naroo. 18 Leo mae susa do, mamahoꞌo do, hule makasi neuꞌ Manetualain. Huu fo, Ana nahiiꞌ basa lahenda fo tuka Yesus Kristus a tao leo naꞌ.

19 Bosoꞌ tao ena-babaa neuꞌ Dula-dale Malalao-malalafuꞌ a nonoi-tataon. 20 Maneniko toranooꞌ esa nae, Dula-daleꞌ a nafada ria haraꞌ neme Manetualain mai, sona bosoꞌ afi mae, toranooꞌ ria dedea-nafadan mudaꞌ a! 21 Muste parisaꞌ matalolole dedea-nafadaꞌ ria, fo bubuluꞌ mae, huu na tebe-tebe nemeꞌ Manetualain mai, do taꞌa. Kalu tebe, sona tuka leo. 22 Maheoꞌ memeꞌ basa tadaluꞌ ara mai.

23-24 Au hule-haradoi neuꞌ Manetualain ela tao malalao-malalafuꞌ emi. Ria riꞌ, tao na ita tamole-tadame ao esa no esa. No ria na, fai fo ita Ramatuan Yesus Kristus natafali mai, emi bisa mapadeiꞌ nai Ria mata Na ta no sala-sikoꞌ soꞌ. Tebe! Ramatua Yesus naloo na emi dadi meuꞌ Ria lahenda Nara. Ria dale na roos. Ana dedea ubeaꞌ, sona tao natetun. De ita bubuluꞌ tae, neuꞌ ko Ana napipipi-nalalaꞌo emi no malalao-malalafuꞌ, leo Manetualain mata Na meu.

25 Toranoo kara emin! Bosoꞌ mafarene henin fo hule-haradoi fee ami nai ia.

26 Au hule ela emi fee haraoe soda-moleꞌ neuꞌ basa Manetualain lahenda kamaheren fo rai na.

27 No Ramatua Yesus kuasa Na emi muste lees au susurak ia, fee basa lahenda kamahereꞌ ara.

28 Au hule neuꞌ ita Ramatuan Yesus Kristus, fo natudu dale malole Na neuꞌ emi basa.

Teꞌe adaꞌ ia leo,