1 ఈనె మో జట్టుకారీనెలింకె మీయి తొముకు కొయిలా సువార్తకు తొముకు తెలియపరిచిలీంచి తొమె అల్లా విస్వాసము నిలాకడగా టారించి. 2 తొమె సెడకు వొప్పిగినిసొ, సెడబిత్తరె బుల్లీకిరి అచ్చె. తొమె విస్వాసముకు నావ్యర్దమికుండ గాని, మియి కే ఉపదేసరూపంరె సువార్త తొముకు కొయించివొ సె ఉపదేసముకు తొమె గట్టిగా దరిగికిరిరొన్నె సె సువార్తవల్లరె తొముకు రక్సనకలిగిలాలింకె పనికిరి తాసొ. 3 మెత్తెదిల్లా ఉపదేసముకు అగరె తొముకు అప్పజెప్పించి. సాకరాక, లేకనములు ప్రకారము క్రీస్తు అమె పాపలకు వలరె మొర్నిజిసి, 4 లేకనములురె రాసిల పనికిరి సమాదికొరికిరి, సెయ్యె తింట దినొరె బుల్లికిరి జీవం సంగరె ఉటిసి.

5 సెయ్యె పేతురుకు, తర్వాతరె పన్నెండులింకు అపోస్తులుకు దిగదీసి.

6 సె తర్వాతరె తాకు వెంబడించిలా పంచసొయి కన్నా బుతులింకు గుటె గడియరాక దిగదీసి. యంకె తంకెబిత్తరె బడెలింకె ఉంచినెజాంక జీకిరి అచ్చె, ఈనె కుండిలింకె మొర్నిజిసె. 7 ఈనె సెయ్యె తర్వాతరె యాకోబుకు, సె తర్వాతరె అపోస్తులు సొబ్బిలింకు దిగదీసి.

8 సొబ్బిలింకన్నా కడపటి కలొరె జొర్నైలా మెత్తెకూడ ఆకరుకు దిగిదీసి;

9 కిరబుల్నే మియి అపోస్తులు సొబ్బిలింకు బిత్తరె తక్కువైలాటని పురువు సంగముకు హింసించిలందరె అపొస్తులుబులిగితె అర్హతనిలాట.

10 ఈనెను మియికిర యీకిరి అచ్చివొ సెడ పురువుకు క్రుపవల్లరాక యీకిరి అచ్చి. ఈనె మెత్తె అనుగ్రహింపబొడిలా తా క్రుప నిస్పలము యిలాటనీ గాని, తంకె సొబ్బిలికంటా మియిబుతు ప్రయాస పొడించి. ప్రయాసపొడిలటా మియినీ, మెత్తె తోడైకిరి తల్లా పురువురొ క్రుపాక. 11 మి యీనెకిర తంకె యీనెకిర, సాకరాక మియ్యి ప్రకటించిలించి, సాకరాక తొమెకూడ విస్వాసించొండి.

12 క్రీస్తు మొర్నొదీకిరి ఉటికిరి అచ్చిబులి ప్రకటింపబొడిలాబెల్లె తొమెబిత్తరె కుండెలింకె మొరిజిలలింకె పునరుత్దానముకు నీబులి క్యేకిరి కొయిలీసో? 13 మొరిజిలలింకె పునరుత్దానుముకు నారొన్నె, క్రీస్తు కూడ వుటికిరినీ. 14 ఈనె క్రీస్తు వుటికిరి నాతన్నె అమె కొరిలా ప్రకటన వ్యర్దమకా, తొమె విస్వాసముకు వ్యర్దమెకా.

15 పురువు క్రీస్తుకు ఉటదీసిబులి, తా కోసం అమె సాక్సం కొయిలించొ నీనా? మొరిజిలలింకె ఉటినె పురువు తాకు ఉటిదిల్లనీ కాబట్టి అమ్మాక పురువురొ విసయంరె సొరొ సాక్సిలునె పనికిరి దిగదిల్లించొ. 16 మొరిజిలాలింకె నావుటినె క్రీస్తు కూడ వుటిలానీ.

17 క్రీస్తు ఉటికిరిరొన్నె తొమె విస్వాసము వ్యర్దమకా, తొమెయింక తొమె పాపంబిత్తరకా అచ్చొ. 18 సెత్తనీ, క్రీస్తురె మొరిజీలాలింకె కూడా నసించిలా పనికిరిరాక. 19 అమె ఏ జీవిత కలొ వరకాక క్రీస్తురె నిరీక్సించిలాలింకె యీనె మనమానె సొబ్బిలింకె బిత్తరె అం కన్నా దౌర్బాగ్యులునె కేసే రొన్నింతె.

20 ఉంచినినె మొరిజీలాలింకె బిత్తరె అగరె పలముగ క్రీస్తు మొర్నొదీకిరి ఉటికిరి అచ్చి. 21 గుటె మనమ వల్లరె మొర్నొ అయిసి సెడకు గుటె మనమ వల్లరాక మొరిజిల్లాలింకు పునరుత్దానుము కలిగిసి.

22 ఆదాముదీకిరి సొబ్బిలింకె క్యాకిరి మొరిజిల్లీసెవొ, సాకరాక క్రీస్తురె సొబ్బిలింకె జీవురొ వూసి. 23 ప్రతిజొనె తా, తా వరసానె చొప్పురె జీవురొ వూసి; అగరె పలము క్రీస్తు; సెడ తరవాత క్రీస్తు అయిలాబెల్లె తల్లలింకె జీవురొ వూసి.

24 సె తర్వాతరె సెయ్యె సొబ్బిటికు ఆదిపత్యముకు, సొబ్బిటిరె అదికారముకు, బలముకు మరికిరి తా బోయిలా పురువుకు రాజ్యము అప్పగించుసి; సెల్లె అంతము ఆసి. 25 కిరుకుబుల్నే తా సత్రువుల సొబ్బిలింకు తా పాదము తొల్లె రొయిదిల్లాజాంక క్రీస్తు రాజ్యపరిపాలన కొరిసి. 26 ఈనె చివరకు వొడించిబొడిలా సత్రువూనెకు మొర్నొ. 27 పురువు సొబ్బిటికు క్రీస్తు పాదము తొల్లె లోపరిచికిరి అచ్చి. సోబ్బిను లొబొడికిరి అచ్చిబులి కొయిలాబెల్లె తాకు సొబ్బికూడ లోపరిచిలాట తప్ప సొబ్బిను లోపరిచిబొడికిరి అచ్చిబుల్లా సంగతి వాస్తవమాక. 28 ఈనె సొబ్బిను తాకు లోపరిచిబొడికిరి తల్లాబెల్లె పురువు సర్వమురె సర్వమైలా నిమిత్తము పో తాకు సొబ్బిను లొపరిచిలా పురువుకు సెయ్యెకా లొబొడుసి. 29 పున్నరుతనము నారొనె మొరిలలింకె కోసం బాప్టీసం కడిగిలలింకె కిరకొరిసె? మొరిలలింకె మాత్రమ జీనె మొరిలలింకె కోసం తంకె బాప్టీసం కడివురొ కిరుకు? 30 ఈనె అమె గడిగడికు మొర్నొ దొరొసంగరె రొవ్వురొకిర? 31 మో జట్టుకారీనెలింకె అమె ప్రబువుయిలా క్రీస్తు యేసురె ఏకమైతె మియ్యి దినొదినొకు మొరిజీలించి బులి కొయిలించి. 32 మనమా పనికిరి, మియ్యి ఎపెసురె మ్రుగముల సంగరె లాగినె మెత్తె లబ్బొకిర? మొరొజీలాలింకె బులికిరి నాజీనె “అయిండి కల్లికు కైయిమా పిమా.”

33 మోసజీతానాండి. దుస్టసాంగత్యము బొల్ట సలకు చెడమరుసి.

34 నీతి ప్రవర్తగలలింకె పనికిరి వుటికిరి, పాపము కొరితెనాండి; పురువు గురించి జ్ఞానము కుండిలింకు నీ. తొముకు లజ్జొ అయితె యాకిరి కొయిలించి.

35 ఈనె మొరిజీలాలింకె క్యేకిరి వుటసె? తంకె ఏటాపన దేసంగరె ఆసె బులి జొనె పొచ్చరిలిసి. 36 ఓ బుద్దినిలాట, తువ్వు విత్తలట మొరిజినె గాని జీనీ నీనా. 37 తువ్వు విత్తిలాట గురించి దిగినె సెడ గోదుమ గింజ యినెను సరే, ఈనె కే గింజా యినెను సరే, సెడ గింజకాక విత్తిలీసి గాని జొర్నైలా దే విత్తువురొ నీ. 38 ఈనె పురువు తా చిత్తప్రకారము తువ్వు విత్తలటకు దే దూసి. ఈనె ప్రతి విత్తోనెకు సడరొ సొంత దే దిల్లీసి. 39 మోసోబ్బి గుటె విదమైలాట నీ. మనమరొ మోసో వేరు, జంతువునె మోసో వేరు, పక్సీరొ మోసో వేరు, మచ్చొ మోసో వేరు. 40 ఈనె మెగొనెరె దే అచ్చి, బూమిరొ దే అచ్చి; మెగొరొ దేనె మహిమ వేరు, బూమిరొ దే వేరు. 41 సూర్యని మహిమ వేరు, చంద్రుడురొ మహిమ వేరు, నక్సత్రమునె మహిమ వేరు, మహిమరె గుటె నక్సత్రముకు ఇంగుటె నక్సత్రముకు బేదము అచ్చి నీనా 42 మొరిజీలాలింకె పునరుత్దనుము సాకరాక. దే క్సయమైకిరి విత్తికిరి అక్సయమైల పనికిరి వుటసె;

43 గనహీనమైలాలింకె బుజ్జీదిలాలింకు గనులుపనికిరి ఉటువురొ వూసి; బలహినమైలా పనికిరి బుజ్జీకిరి, బలమైలపనికిరి వుటువురొ వుసి;

44 ప్రక్రుతి సంబందమైలా దేపనికిరి బుజ్జీదికిరి ఆత్మసంబందమైలా దేపనికిరి వుటిసి. ప్రక్రుతిసంబందమైలా దేయిలటా సెడకు ఆత్మసంబందమైలా దే కూడ అచ్చి.

45 ఏ విసయంరె ఆదాముకు “అగరె మనమా జీకుంటా మనమాయిసి రాసికిరి అచ్చి”. అగరె ఆదాము జీవించిల ఆత్మ యిసి. 46 ఆత్మ సంబందమైలాట అగరె కలిగిలాట నీనా, ప్రక్రుతి సంబందమైలా అగరె కలిగిలాట; తర్వాతరె ఆత్మసంబందమైలాట. 47 అగరె మనమా బూసంబందమైలా మట్టిదీకిరి జొర్నైలాట, దీటా మనమా పరలోకందికిరి అయిలాట.

48 మట్టిదీకిరి జొర్నైలాట కెసో మట్టిదీకిరి జొర్నైలాట సాటలింకాక, పరలోక సంబందం కేటవో పరలోక సంబందూనె సాటలింకాక. 49 ఈనె అమె మట్టిదికిరి జొర్నైలాటకు పోలిక పొగిలపనికిరి పరలోక సంబందియిలా పోలిక దరించికిరి అచ్చొ. 50 మో జట్టుకారీనెలింకె మియ్యి కొయిలాట కిరబుల్నే రొగొతొ మోసొ పురువురొ రాజ్యముకు స్వతంత్రించుగిను; క్సయత అక్సయతకు స్వతంత్రించిగిను. 51 ఇదిగొ తొముకు గుటె కొయిలించి; అమె సొబ్బిలింకె గుమ్మినింతొ గాని నిమిసమురె, గుటె రెప్పపాటురె, కడబూర మ్రోగలాబెల్లే అమె సొబ్బిలింకె మార్పు పొందుసి.

52 బూర మ్రోగుసి; సెల్లె మొర్నొకు అక్సయులుగా ఉటుసె, అమె మర్పు పొందుంచొ. 53 నాసించిలాట ఏ దే అక్సయతకు పిందిగివలిసిలా అవసరం అచ్చి; మర్త్యమైలా ఏ దేకు అమర్త్యతకు పిందిమంచి. 54 ఏ నాసించిలాట పిందిగెల్లబెల్లె, ఏ మర్త్యమైలా అమర్త్యతకు పిందిగెల్లబెల్లె, విజయం అగరె మొర్నొ మింగిబొడుసు బులి రాసికిరిరొల్లా వాక్యము నెరవేరుసు.