1 Iaau babo a buk u ra ot na limaan ia baa i ki u ra kiki na king. A buk maa di aa pipin taai, di aa timtimu raap taau u ra ru papaarina, ma di aa bulit baat taai ma 7 na bulit baa a wakilang kuraa ma un diat. 2 Ma iaau babo a dekdek na aangelo i wetiri ma ra ina ngaala na ingaana lenbi, “Woi maa i takado kupi in wawaaka wa 7 na bulit bi ko ra buk, ma in palaai?” 3 Pain te inaanga u ra maawa, ma min napia, baa nabalaa ra pia in pet laar paai kupi in palaa a buk maa, ma in baboi. 4 Ma iaau luan dekdek, maa pa te i takado kupi in palaa a buk maa, ma in baboi. 5 Io, raa mukmuga i piri taang naa, “Koku u luan! Baboi, a laaion anu ra wuna taara Iuda, in aakaarin Dewid, ia a tena niuwia. In pet laar paai kupi in wawaaka wa 7 na bulit ma in palaa a buk maa.”
6 Namur iaau babo a Naat na Sip, i babo lenbaa di aa aak doko taai, i tur naa ra kiki na king, ma waat na lalaaun na wawaki ungaai ma ra kum mukmuga diat tur lili paai. A Naat na Sip maa 7 na komina, ma 7 na kiok na mataana. Diat a 7 na nion God baa di tula wai u ra rakrakaan buaal raap. 7 A Naat na Sip i waan ma i lo paa a buk ko ra ot na limaan ia baa i ki u ra kiki na king. 8 Baa i lo paa a buk maa, waat na lalaaun na wawaki ma 24 na mukmuga, diat puka ruru taau namuga naa ra Naat na Sip. Diat raap diat paam raaraa gitaa ma raaraa laa baa di paami ko ra goled. A kum laa maa diat teng ma raa mangaana bulit baa di tuni ma a tubalina i aangawian wakwakaak. Diat maa a kum aaraaring anu ra taara anun God. 9 Ma diat kele a matakina kelekele lenbi,
“Ui ut u takado kupi un lo paa a buk ma un wawaaka wa a kum bulit koni,
kabina maa di aak doko ui,
ma u kul talili paa a taara karom God ma ra gaapim,
a taara ko ra kum wunwuna taara raap, a taara ko ra kum aalawur mangaana pirpir raap, a taara ko ra kum taamtaamaan raap ma ra taara ko ra kum wunwuna mataanitu raap.
10 U waki diat kupi diat a naagagon ungaai ma ui,
ma diat a kum tena wetabaar karom anundaat God,
ma diat a naagagon u ra rakrakaan buaal.”
11 Namur iaau bababo ma iaau walangoro kum ingaa ra mongoro na aangelo baa diat tur lili paa a kiki na king ma waat na lalaaun na wawaki ma ra kum mukmuga. A kum aangelo diat mongoro aakit, pa te in luk laar pa diat. 12 Diat kelekele ma ra ngaala na ingaandiat lenbi,
“I takado aakit baa a Naat na Sip baa di aak dokoi
in paam akoto a dekdek, a ngaala na wuwuwung, a manaana ma ra niongor.
Ma i takado aakit baa din rui, din wangaala paai ma din pir walaawa paai!”
13 Ma iaau walangoro a kum ingaa ra kum wawaki raap inaanga u ra maawa ma u ra rakrakaan buaal ma nabalaa ra rakrakaan buaal ma nabalaa ra pakaana taai, a kum utnaa raap baa di waki diat, diat kelekele lenbi,
“Karom ia baa i ki u ra kiki na king, ma karom a Naat na Sip,
din pir walaawa pa diaar, din ru diaar ma din wangaala pa diaar.
Ma diaar a paam akoto a dekdek,
pa in raap ma pa in raap.”
14 Ma waat na lalaaun na wawaki maa diat piri naa, “Aamen,” ma ra kum mukmuga diat puka pari ma ra urur ma diat lotu.
<- Binabo 4Binabo 6 ->
