1 Namur taa ra kum utnaa mi, iaau babo raa aangelo bulung i waan pari taanginaanga u ra maawa. I paam akoto a dekdek na naagagon ma nuna minamaar i wakaapakaapa a rakrakaan buaal. 2[a]Ma i kulkulaai ma ina ngaala na ingaana lenbi,
“A ngaala na taamaan Baabilon ia puka! Ia puka!
Mari ia a pakaana anu ra kum tabaraan
ma a ruma na karabus anu ra kum tabaraan
ma a ruma na karabus anu ra kum pika baa diat durdur ma diat milmiluan.
3[b]Ia puka, kabina maa a kum wunwuna taara raap diat aa inim paa a dekdek na waain i ra nuna paamuk na mangamangaan.
A kum king ko ra rakrakaan buaal diat paam aakaina mai.
Ma a kum tena wiura ko ra rakrakaan buaal diat tadaaru ma ra ngaala na wuwuwung ko ra nuna kum aakaina mangamangaan,
baa pa i wawirwir mai.”
4[c]Iaau walangoro balet in ingaan raa taanginaanga u ra maawa i piri lenbi,
“Anung taara, muaat a pari koni,
kupi koku muaat laa ungaai mai u ra nuna kum aakaina mangamangaan,
ma kupi koku muaat kaai muaat kariaana ana kinadik ungaai mai.
5[d]Maa anuna kum aakaina mangamangaan ia tuk paa a maawa,
ma God ia nuk akoto anuna kum aakaina pinapaam.
6[e]A mangamangaan i paami karom muaat, din paami balet karomi,
a utnaa i paam taai un muaat, din baalui welaar ma ru pakaan karomi.
A kaap baa i wainim muaat mai ma muaat aaka uni,
din watengi ta ru pakaan kupi din wainimi mai.
7[f]I paam akoto a ngaala na minamaar ma a kini na tadaaru,
io, din taar a ngaala na kinadik ma ra ngaala na tapunuk taana.
I nuki un ia ut lenbi,
‘Iaau a kwin, ma iaau ki u ra nung kiki na kwin.
Wakir iaau a walaa,
pang tapunuk laar paai.’
8 Bi ia kabina baa a kum kinadik mi, a minaat, a tapunuk ma ra minolo
diat a waan paat karomi un raa bung ot ku.
Ma din tun wai ma ra nguan
maa a Tadaaru God i dekdek aakit,
ia baa in taar taa a naagagon na binabaalu karomi.
9[g]“A kum king ko ra rakrakaan buaal, baa diat paam aakaina ungaai ma ra paamuk na tabuan maa, ma diat kakale ungaai u ra nuna kum wuwuwung ko ra kum aakaina mangamangaan, baa diat a babo in tubal ko ra nguan baa di tun a tabuan maa uni, diat a tapunuk ma diat a luan. 10 Diat a tur welwelik taau maku koni, maa diat burutaana kinadik baa di wakadiki mai. Ma diat a piri lenbi,
‘A ngaala na taamaan Baabilon ia aaka. Ia aaka!
Baabilon, a dekdek na taamaan!
Un 60 minit ot ku amaam naagagon na binabaalu ia waan paat karom ui.’
11[h]“A kum tena wiura ko ra rakrakaan buaal diat a luan ma diat a tapunuk kupi, kabina maa pa te ma in kul anundiat kum utnaa na wiura. 12[i]A kum utnaa na wiura lenbi: a goled, a silwa, a kum ngaatngaat na waat ma ra kum kiaau na kalaang, ma ra kum kokoina maalu, a kum maalu i welaar ma ra pupu na taawu, a kum maalu i silika ma ra kum taar na maalu, ma ra kum diwaai baa i aangawian wakwakaak ma ra aalawur mangaana utnaa baa di paami ma ra kom i ra elepaan, ma ra kum ngaatngaat na diwaai, ma ra braas, a aaen ma ra ina ngaatngaat na waat di waatungi ma ra maabel. 13 Ma raa kum utnaa i aangawian wakwakaak, lenbaa a sinamon, a mira, ma ra kum bulit baa a tubalina i aangawian wakwakaak, ma ra waain, a wel na oliwa, a palawaa ma ra wit, ma ra kum bulumakaau ma ra kum sip, a kum os ma ra kum kaaris, ma ra taara baa diat a papaam na wilawilaau.
14 “A kum tena wiura diat a piri lenbi, ‘A kum utnaa baa u nem aakiti diat aa panaai. Anum kum wuwuwung ma ra num kum minamaar diat kaai diat aa panaai kon ui, ma pa un babo ta diat balet ma.’ 15[j]A kum tena wiura baa diat laana wiura a kum utnaa mi, diat baa Baabilon i watadaaru diat, diat a tur welwelik taau maku koni, maa diat burutaana kinadik baa di wakadiki mai. Diat a tapunuk, diat a luan, 16 ma diat a kulkulaai naa,
‘A ngaala na taamaan Baabilon ia aaka! Ia aaka!
Ia baa i mong ma ra kum kokoina maalu, a kum maalu i welaar ma ra pupu na taawu ma ra kum maalu baa i taar,
ma di wamongi ma ra goled, ma ra kum ngaatngaat na waat ma ra kum kokoina gaaragaara.
17[k]Un 60 minit ku di baanaakaka raap wa anum ngaala na wuwuwung aakit!’
“Ma a kum kiaapten raap ma diat baa diat waan taltalili ma ra kum paraau, a kum tena pinapaam ko ra kum paraau, ma diat baa diat babo maani ko ra kum paraau, diat a tur welwelik taau maku koni. 18[l]Baa diat babo in tubalin Baabilon diat a kulkulaai naa, ‘Woi na taamaan i welaar ma ra koina taamaan aakit mi?’ 19[m]Diat a lamira a kum kabu u ra kum lorindiat ma diat a tapunuk, diat a luan ma diat a kulkulaai naa,
