A Buk karom a taara

Ebraaio
A pirpir kaapa muga
A buk mi di timui karom a taara Iudaia, di waatung diat kaai naa a taara Ebraaio, maa diat pirpir ma ra pirpir Ebraaio. Pa te i nunurai woi maa i timu a buk mi.
A taara Iudaia baa di timu a buk mi karom diat, diat nurnur un Iesu, iaku a taara baa pa diat nurnur diat pet na bilbil un diat. Io, raa taara kon diat baa diat nurnur, diat nem na waan talili balet kup a lotu Iudaia. A buk mi i wapua diat naa koku diat waan talili. U ra nurnur karom Iesu ku diat a takado namataan God. Iesu i ngaala aakit, ia a Natun God ma i ngaala taa ra kum aangelo ma ra kum propet. Ma a matakina kunubu baa Iesu i paami i kiaana wa a mugaana kunubu. Iesu ia anundaat mukmuga na tena wetabaar karom God ma i wetabaar ma ra gaapina ut. I koina baa daat a nurnur ku un Iesu.
A winawaan i ra buk Ebraaio:
Iesu a Natun God ma i waiaa God karom daat (1:1-4)
Iesu i ngaala taa ra kum aangelo ma ia a Tena Walaaun (1:5–2:18)
Iesu i ngaala taan Moses ma Iosua (3:1–4:13)
Iesu anundaat mukmuga na tena wetabaar karom God (4:14–7:28)
A matakina kunubu (8:1–9:28)
A gaapin Iesu i una wa anundaat kum aakaina mangamangaan (10:1-39)
A nurnur (11:1-40)
Daat a nurnur un Iesu ma daat a taraam karomi (12:1–13:19)
A tintinip na pirpir (13:20-25)

Natun God i ngaala aakit taa ra kum aangelo

1 Namuga utbaai God i pirpir ma ra waa ra kum propet karom a kum taptabundaat. I pirpir lenmaa un mongoro na pakaan u ra aalawur mangaana aakapi. 2 Iaku u ra kum tintinip na bung mi, i pirpir ma ra waan Natuna karom daat. A Natuna baa i pilak paai kupi in kale a kum utnaa raap. Ma u ra limaan Natuna, God i waki a rakrakaan buaal raap. 3 Natuna i baarabaara aakit ma ra minamaar anun God, ma i welaar mulu ut ma God. I baboura a rakrakaan buaal raap ma ra nuna pirpir baa i mawaat aakit. I taar taa nuna lalaaun, kupi in wagomgom daat ko ra kum aakaina mangamangaan raap. Ma baa ia paam araap taa a pinapaam mi, i ki u ra papaara ot na limaan God, a ngaala na king aakit, inaanga u ra maawa. 4 U ra pinapaam maa God i wangaala paa Natuna kupi in ngaala aakit taa ra kum aangelo. I ngaala aakit welaar ma ra iaana, baa Tamaana i taar taai taana, i ngaala aakit taa ra iaa ra kum aangelo.

5 Maa God wakir i piri karom ta aangelo lenbi,

“Ui a Natunglik,

ma mi iaau Tamaam.” Kele 2:7

ma wakir i piri kaai un ta aangelo naa,

“Iaau Tamaana,

ma ia natunglik.” 2 Saam 7:14

6 Ma baa God i tula wa mugaana Natuna urin u ra rakrakaan buaal, i piri uni lenbi,

“I koina baa a kum aangelo raap anun God diat a lotu karomi”. Naag 32:43

7 Ma i piri lenbi u ra nuna kum aangelo,

“I puku anuna kum aangelo kupi diat a welaar ma ra dadaip,

a kum aangelo maa diat anuna kum tultul,

ma i puku diat kupi diat a welaar kaai ma ra kupkup i ra nguan.” Kele 104:4

8 Iaku i piri lenbi un Natuna,

“God, anum kiki na king in ki takum ma pa in raap.

U laana naagagon anum mataanitu ma ra takado na mangamangaan.

9 U nem aakit a takado na mangamangaan,

ma u milikuaana aakaina mangamangaan.

Bi ia kabina baa God, anum God, i pilak pa ui

ma i taar taa a gaaia ma ra urur taam,

baa i ngaala aakit taa ra nuna wetabaar karom a kum teptepaam.” Kele 45:6-7

10 Ma God i piri kaai karom Natuna lenbi,

“Tadaaru, u ra turpaaina, ui u waki taa a kabi ra rakrakaan buaal,

ma u waki a baakut ma ra limaam.

11 Diaar a panaai raap, iaku ui un ki takum.

Diaar a maulaana waanwaan welaar ma ra ina maalu.

12 Un pipin diaar welaar ma ina maalu na buburung,

un kiaana diaar welaar ma raa baa i kiaana wa in maulaana maalu.

Iaku ui, pa un wekiaa,

ma num kum kilakilaala pa in raap.” Kele 102:25-27

13 God wakir i piri kaai karom ta aangelo lenbi,

“Un ki u ra papaara ot na limaang,

tuk baa ang uwia paa anum kum ebaar

kupi diat a ki natudaangi ra num naagagon.” Kele 110:1

14 A kum aangelo raap diat a kum nion, baa diat papaam karom God, naka? I tula wa diat kupi diat a waraaut a taara, diat baa diat a lo a warwalaaun.

Ebraaio 2 ->