San Mateo 4

Señor Jesucristota Satanas tentayta munangan

(Marcos 1:12-13; Lucas 4:1-13)

1 Tsaypitam Espïritu Santo tsunyaman Señor Jesucristota pushargan. Tsay tsunyachömi Satanas llutanta ruratsir engañayta munargan. 2 Tsaychömi chuscu chunca junag y chuscu chunca pagas mana ni imata micurnin, Señor Jesucristo mallagargan. 3 Tsaymi Satanas nirgan: “Rasumpa Diospa Tsurin carga, mä cay rumicuna manday tantaman ticrayänanpag.” 4 Señor Jesucristonam nirgan: “Diospa Palabran gellgashgachömi nin:

‘Runaga manam tantata micurllatsu cawanga,

sinöga Dios Yayapa Palabran mandacunganta

rasumpa cäsurmi mas allish cawacunga’ nir.”[a]

5 Tsaypitam Señor Jesucristota Satanas Jerusalénchö juc jatun iglesia niyangan templuman pushargan. Tsay templupa janan mas altucag puntanman lätarcatsirmi, 6 nirgan: “Rasumpa Diospa Tsurin carga, mä caypita jegarpuy. Diospa Palabran gellgashgachömi nirgan:

‘Gammanmi Dios angelnincunata cachamunga,

alcäbu cuidar maquincunawan achcuyäshuptiqui,

mana rumicunawan chaquiquitapis tacacunayquipag.’ ”[b] 7 Tsaynö niptinam, Señor Jesucristo nirgan: “Diospa Palabran gellgashgachömi nirgan:

‘Diosniquitaga ama ni ima pruebamanpis churanquitsu.’ ”[c]

8 Tsaypitanam jirca puntanman Señor Jesucristota Satanas pushaycur, entëru munduchö llapan jatusag shumag marcacunatawan imayca riquësancunata ricätsir, 9 nirgan: “Gongorpacuycur adoramaptiquiga, cay llapan imayca ricaycangayquitam garaycugman.” 10 Señor Jesucristonam nirgan: “Caypita witiy Satanas. Diospa Palabran gellgashgachömi nin:

‘Juc japallan Diosllayquitam adorarnin servinayqui.’ ”[d] 11 Señor Jesucristo tsaynö niptin Satanas aywacusquiptinmi, angelcuna shamur Señor Jesucristota serviyargan.

Señor Jesucristo Galileachö yachatsicuyta gallarin

(Marcos 1:14-15; Lucas 4:14-15)

12 Juan Bautista carcelchö gaycuraycanganta musyasquirmi, Señor Jesucristo Galilea marcaman aywargan. 13 Nasaretpita aywacurmi, Capernöm marcachö täcurgan. Tsayga Galilea gocha cuchunchö, Zabulón, Neftali runacunapa marcancunachömi cargan. 14 Tsaynömi Dios Yayapa unay profëtan Isaías gellgangan cumplirgan:

15 “Wiyayay Zabulon y Neftali marcacuna

lamar cuchunpita Jordan mayu wac tsimpanyag.

Wiyayämay Galilea marcacunachö täcug runacuna. 16 Tutapaychö cawagcunam alläpa atsicyayta ricäyargan.

Wañushganö tutapaychö cawagcunapagmi

imayca rupay yargamugnörag actsi yurirgan.”[e]

17 Tsaypitanam Señor Jesucristo willacurnin yachatsicur gallaycurgan: “Jutsa rurayniquicunata dëjasquir, Dios Yaya munangannö shumag cawacuyay. Dios Yayapa Mandacuy Reynon tiempu chaycämunnam.”

Señor Jesucristo chuscugta gayan discïpuluncuna cayänanpag

(Marcos 1:16-20; Lucas 5:1-11)

18 Tsaypita Galilea gocha cuchunpa Señor Jesucristo aywaycarmi, ishcag waugentin runacunata ataräyancunata yacuman jitaycäyagta tarirgan. Paycunam cayargan pescädo achcug Simón Pedrowan waugen Andrés. 19 Tsaymi Señor Jesucristo nirgan: “Nogata gatiyämay. Pescädo achcuyta yachatsiyäshungayquinö, noga yachatsiyäshayqui runacunata gorisquir yachatsiyänayquipag, paycunapis gatiräyämagnï cayänanpag.” 20 Tsaynö niptinnam, jina öra ataräyancunatapis dëjasquir Señor Jesucristota gatircur aywacuyargan.

21 Tsaypita päsasquirnam, Señor Jesucristo Zebedeopa tsurincuna Santiagotawan waugen Juanta tarirgan. Büquichö ataräyancunata taytan Zebedeowan allitsaycäyagta. Tsaymi ishcanta Señor Jesucristo gayargan. 22 Jina öram büquichö taytancunata dëjasquir, Señor Jesucristota gatircur aywacuyargan.

Señor Jesucristo yachatsicurnin geshyagyashacunata cuticätsin

(Lucas 6:17-19)

23 Tsaypitanam Señor Jesucristo maytsaypa purirnin Galilea marcacunapawan judiucuna goricäyänan wajicunachö yachatsicurgan. Dios Yayapa Mandacuy Reynonpa Alli Willacuyninta willacurmi, tucuyläyawan geshyagyashacunatapis cuticätsirgan. 24 Maytsay Siria marcacunachömi Señor Jesucristo llapan geshyagyashacunata cuticätsinganta parlayargan. Paymanmi supayyogcunatawan cuerpuncuna mana cuyuptin geshyagyashacunata y carcariar wañunagcunatapis apayämurgan. Tsaynömi tsay llapan geshyagyasha runacunatapis cuticätsirgan. 25 Atscag runacunam Señor Jesucristota gatiyargan maytsay marcacunapita Galilea, Decapolis, Jerusalén, Judea, Jordan mayu wac tsimpancunapitapis.

<- San Mateo 3 San Mateo 5 ->