SAN MATEO 2

Koyllurcunamanta yachajcuna jamuncu

1 Judea provinciapi caj Belenpi Jesús nacerkan, gobernaj Herodes chaypi gobernachcajtin. Koyllurcunamanta yachajcuna inti llojsimuy ladomanta Jerusalenman chayamorkancu. 2 Tapucorkancutaj:

—¿Maypitaj judiocunapaj reynin nacin? Inti llojsimuynejpi paypaj koyllurninta ricuycu, chayraycu payta adoraj jamuycu.

3 Gobernaj Herodestaj tucuy Jerusalenpi cajcunapiwan chayta uyarispa, ni imanayta aterkancuchu. 4 Sacerdotecunapaj tucuy jefencunata leymanta yachachejcunatawan wajachispa, taporkan:

—¿Maypitaj Cristo nacinan carkan?

5 Paycunataj contestarkancu:

—Judea provinciapi caj Belenpi. Ajinata Diospaj profetan escriberkan:

6 ‘Kan, Judeapi caj Belén, manami sinchi mana

casurana jinachu canqui Judeapaj athun

llajtancuna chaupinpi, imaraycuchus uj

curaj gobernaj kanmanta llojsenka.

Pay Israel llajtayta sumajta michenka.’

7 Herodestaj pacallamanta koyllurcunamanta yachajcunata wajaspa, allinta taporkan ima rato chay koyllur paycunaman riqhuriskanta. 8 Belenman paycunata cachaspataj, nerkan:

—Puriychis, chay wawamanta allinta yachamuychis. Tarispataj willawanquichis nokapas adoramunaypaj.

9 Chay jina willaskawan yachajcuna puripojtincutaj, chay ricuskancu koyllur ñaupakencuta purerkan, wawa maypichus cachcarkan chaycama; chaypitaj sayaycorkan. 10 Yachajcuna koyllurta sayaycuskanta ricuspa, sinchita cusicorkancu. 11 Wasiman yaycuspa, wawata maman Mariatawan tariparkancu. Konkoriycuspataj, wawata adorarkancu. Cajoncitoncuta quicharaspa, korita, inciensota, mirratawan korkancu. 12 Dios moskoynincupi willarkan ama Herodesman cutinancupaj. Chayraycu wajninta llajtancuman cutiporkancu.

José familianpiwan Egiptoman escapancu

13 Yachajcuna ripojtincuña, Señorpaj angelnin Joseman moskoyninpi riqhurispa, nerkan: “Jatariy, wawata mamantawan pusaricuspa, Egipto nacionman escapay ujtawan kanman willanaycama, imaraycuchus Herodes wawata masc'achenka wañuchinanpaj.”

14 Josetaj jatarispa, wawata mamantawan chay tutapacha Egiptoman pusaporkan. 15 Chaypi camorkan Herodes wañunancama. Chayka pasarkan Señor Diospaj profetanpaj niskan junt'acunanpaj: “Egiptomanta Churiyta wajarkani.”

Herodes cachan wawacunata wañuchimunancupaj

16 Gobernaj Herodestaj yachajcunapaj engañaskanta reparacuspa, phiñacorkan. Cacharkantaj Belenpi campocunantinpi caj tucuy khari wawacunata wañuchimunancupaj iscay watayojmanta uranejman, Jesuspaj naciskan chay tiempomanta yachajcunapaj willaskanman jina. 17 Ajinata junt'acun profeta Jeremiaspaj escribiskan:

18 “Ramá llajtapi sinchi wakay athun llaquiycunapiwan carkan.

Raquel wakarkan churincuna wañuchiskaña

caskanmanta,

manataj sonkochaska cayta munarkanchu.”

19 Herodes wañupojtintaj, Egiptopi Señorpaj angelnin Joseman moskoypi nerkan: 20 “Jatariy, wawata mamantawan pusaricuspa, Israelman cutipuy. Wawata wañuchiy munajcuna wañurapuncuña.”

21 Chhicataj José jatarispa, wawata mamantawan Israelman pusaporkan. 22 Josetaj uyarerkan Arquelao Judeapi gobernachcaskanta tatan Herodespaj cuentanmanta. Chayraycu chayman puriyta manchachicorkan. Dios Joseman moskoyninpi willajtintaj, Galileaman puriporkan. 23 Nazaretman chayaspataj, chaypi tiyacorkan, profetacunapaj niskancu junt'acunanpaj: “Jesuska nazareno sutichaska canka.”

<- SAN MATEO 1 SAN MATEO 3 ->