1 ¡Tayta Diosta agradësicuy-llapa!

¡Paypaj willacuy!

Imata rurashancunatapis intëru marcacunaman willacuy.

2 Alabansacunawan payta alabay.

Almiraypajcunata rurashanta willacuy.

3 Rispitädu cashanpita cushicuy.

Tayta Diosta ashejcunaga cushisha cay-llapa.

4 Munayniyoj Tayta Diosninchïman guellicuy.

Paywan tincunayquipaj ashiy.

5 Fiyupa almiraypaj milagrucunata rurashanta yarparay.

Mandamintuncunata yachachishantapis yarparay.

6 Sirbejnin Abrahampita mirar aywajcuna yarparay.

Tayta Dios acrashan Jacobpita mirar aywajcuna yarparay.

7 Tayta Diosmi noganchïpa Tayta Diosninchëga.

Paypa maquinchömi caycan cay pachapis.

8 Payga aunishanta imaypis yarpashami.

Waranga miray aywajcamapis manami gongashachu.

9 Abrahamta aunishanta,[a]

Isaacta aunishantapis yarpashami.[b]

10 Jacobpäga camacächiran juc layno cananpaj;

Acrashan runacunapäna parlacushan conträtoga imaycamapis cananpaj.

11 Chaymi niran: «Canaán partitami goycushayquipaj gamcunapa partisyunniqui cananpaj.»[c]

12 Paycunaga caran wallcajllami.

Canaanchöga juc ishcay jäpa runacunalla caran.

13 Paycunaga nasyunnin-nasyunnin puricachaj runacunami caran.

Juc rayman juc rayman chayajmi caran.

14 Chaypis Tayta Diosga manami munaranchu paycunata pï ñacachinantapis.

Raycunatapis Tayta Diosga willaran:

15 «Ama yatapaychu acrashä runacunataga.

Profëtäcunatapis ama ñacachiychu» nir.[d]

16 Cay pachachöga fiyupa muchuymi caran.

Ima micuytapis manami wayuchiranchu.[e]

17 Paycunapa ñaupanta Tayta Diosga Josëta cacharan.

Josëtaga uyway cananpaj ranticuycuran.[f]

18 Paytaga charararan chaquincunata cadinacunawan watashalla.

Carsilcho wichgarächiran.

19 José rimashan cumlinancama carsilcho wichgarächiran.[g]

José willashan rasunpa cashanta chay junaj Tayta Dios musyachiran.

20 Aypalla runacunata mandaycaj raymi niran carsilcho caycaj Josëta cachaycunanpaj.[h]

21 Chayrämi Josëta churaran wasincho mandaj cananpaj;

ima-aycantapis ricananpaj.[i]

22 Churaran musyaj-yachajcunata, mandajcunata, auquincunatapis yachaj cayta yachachinanpaj.

23 Chaypitarämi Egiptuman Jacobga chayaran.

Cam nasyunchöga Jacobpita mirajcuna tiyaran jäpa runacunanöllami.[j]

24 Chaychöga acrashan runacunata aypallaman Tayta Dios mirachiran.

Paycunaga Egipto runacunapita mas callpayojmi caran.

25 Chaypis Tayta Diosga camacächiran acrashan runacunata Egipto runacuna chiquicarcärinanpaj,

achäquita ashipänanpaj.[k]

26 Chaymi Diosga sirbejnin Moisesta, Aaronta cachamuran.

Paycunaga caran acrashan runacunami.[l]

27 Paycunami chunyajcho milagruta ruraran Dios «ruray» nishancunata.

Cam nasyunchöpis fiyupa almiraypajcunata ruraran.

28 Tayta Dios camacächiran fiyupa chacacäcunanpaj.[m]

Chaypis Egipto runacunaga Dios nishanta mana wiyacuranchu.

29 Tayta Diosga mayu yacucunatapis yawarman ticrachiran.

Chaynöpami pescäducunapis wañuran.[n]

30 Chay nasyunchöga intëruchömi säputa yurichiran.

Asta raypa wasinmanpis säpuga yaycuran.[o]

31 Dios rimarcuptin intëru Egipto nasyuncho gashyaricuriran upucruywan gayish.[p]

32 Tamyapa ruquin runtu tamyata tamyachiran.

Nina ratariran chay particho.

33 Chacracho caycaj übascunata ïguscunata illgächiran.

Llapan yöracunatapis Egiptucho cajtaga illgächiran.[q]

34 Dios rimarcuptin chüpacacunapis aypalla yuricaramuran.

Yupaytapis mana atipaypaj caran.

35 Ushacurcuran intëru jircacho caj guewacunata,

allpacho wiñamoj cajtaga llapanta.[r]

36 Egipto runacunapa guechpa wamrancunatapis Tayta Dios wañuchiran.[s]

37 Nircur acrashan runacunata Tayta Dios jorgamuran gorintawan guellaynintawan.

Chay famillyacunachöga manami mayganpis gueshyaranchu.

38 Egipto runacunaga Israelcunata manchacuran.

Chaymi aywacojta ricarga cushicuran.[t]

39 Tayta Dios pucutayta mashtacächiran chapänanpaj.

Chacaypana achquiparan nina rataycajwan.[u]

40 Micuyta mañacuptin codorniz äbicunata yurichiparan.

Syëlupita mashtamushan tantawan sacsachiran.[v]

41 Gagata shillirachiran.

Chaypitana yacu llojshimuran chunyajpa mayuno aywananpaj.[w]

42 Chayno ruraran sirbejnin Abrahamwan parlacushanta yarparmi.

43 Chaynömi acrashan runacunata cushicachir gaparpaycajta jorgamuran.

44 Nircur goycuran juc-lä nasyun runacunapa chacranta,[x]

juc-lä nasyun runacuna arushan micuyta.

45 Chaynöga ruraran Tayta Diospa laynincunata,

mandamintuncunata wiyacur cumlinanpämi.

¡Aleluya! ¡Tayta Diosga alabasha cachun!

<- SALMOS 104SALMOS 106 ->