Nahúm ¿Munayniyoj nasyuncunachuraj cay munduta mandaycan? ¿Imataj päsan juc nasyun Tayta Diospita mas munayniyoj cashanta yarpaptin? ¿Pitaj caran? Nahúm ninan caycan «Tayta Dios shogashan» ninanmi. Payga Elcos marcapitami caran. ¿Maychötaj willacuran? Nahumga willacuran sur caj nasyun Judäpitami. Pay willacuran munayniyoj Asiria nasyunpa capitalnin Nínive castigasha cananpaj cashantami. ¿Imaytaj willacuran? Nahúm willacuran Nínive siudä manaraj ushacaptinmi. Pay willacushan wichanga Asiriami Judá nasyunta munaynincho chararaycaran (612 a.C.). ¿Imataj caycan cay librucho? Profëta Nahúm y profëta Abdiasllami willacuran juc-lä nasyuncunallapaj. Willacuran chay nasyun runacuna mana allita rurashancunata y castigasha cananpaj cashantami. Asiria runacuna fiyu captin y mana allita ruraptinmi Nahumga fiyupa rabyaran. Chay nasyun caran fiyupa munayniyoj, llapanta manacajman churaj. Achca runacunatami fiyupa ñacachiran. Chaymi Nahumga Asiria runacunapaj willacur niran: Santo Dios cashpan castigananpaj cashanta. Chaynöpis willacur niran runacuna runa-masinta ñacachinanta Tayta Dios mana munashanta. Chay jäpa nasyun runacunapämi Nahúm rabyar willacuran. Chayno willacur quiquinpa nasyunnincho juchata ruraycashantaga mana rimarannachu. Nahúm yarpächimanchi imanöpis Tayta Diosninchi cashantami. Chaymi musyachimanchi payga rabyaj Dios, castigacoj Dios, chaynöpis cuyapäcoj y salbacoj Dios cashanta.
1 Cay libroga caycan Nínive*Isa. 10.5–34; 14.24–27; Sof. 2.13–15 imano cananpaj cashantapis Nahumta Tayta Dios ribilashanmi. Nahúm tiyaran Elcos marcachömi.
Niniveta Tayta Dios castigananpaj nishan 2 Tayta Diosga payllata sirbinanchïtami munan. Mana allita rurashaga pay rabyar castigacunmi.*Éxo. 20.5–6; Deut. 4.24 Pay nishanta mana rurajcunataga rurashanmannömi castïguta gon. Paypa contran cajcunapäga fiyupami rabyan. 3 Tayta Diosga fiyupa munayniyojmi. Chaymi jucha ruraj cajtaga castigänita mana cachaycongachu. Ichanga juclla manami rabyacunchu. Tayta Diosga aywan löcu tamya jananpami, gachwariycar aywaj wayra jananpami. Pucutayga caycan chaquin polbuta jatarachishanmi. 4 Lamartapis ollgöparga chaquirachinmi. Paymi camacächin llapan mayucuna chaquinanpäpis. Chaymi Basán particho, Carmelo jircacunacho jachacuna caycajpis wañuytacäcun. Libanucho caycaj waytacunapis wañuytacäcun. 5 Payta ricashpanga puntacunapis sicsicyan. Paypa ñaupanchöga puntacunapis jurucäcunmi.*Sal. 97.5; Miq. 1.4 Payta ricashpanga intëru cay mundumi mancharin. Cay pachapis, cay pachacho tiyajcunapis llaquicun. 6 Pay fiyupa rabyasha caycashan öraga ¿piraj ichiraycanman? ¿Piraj awantanman rabyasha caycaptenga? Paypa rabyaynenga nina wapchacojnömi. Chaynöpis, paypa ñaupanchöga gagacunapis shillicäcunmi. 7 Tayta Diosga fiyupa allimi. Payga ñacaycashanchi öra pacamajninchïmi. Payman yäracoj cajcunataga imapitapis chapanmi. 8 Paypa contran cajcunatami ichanga mayu chayar ima-aycatapis apacushanno illgarachin. Paypa contran cajcunataga yanauyaycaj chacaychöpis gaticachangami. 9 Nínive runacuna ¿gamcunaga imanirtaj Tayta Diospa contran yarparcaycanqui? ¡Payga ushajpämi illgarachishunquipaj! Paypa contran cajcunataga illajpitami ushajpaj illgarachenga. 10 Shiraca chaquir jiracasha caycajtanömi, chaquisha ogshata nina ushacurcojnömi usharenga. 11 Nínive siudä, gampitami yurimusha Tayta Diospa contran jatarëga. Chay runami juc runacunata shimita jatipaycan. 12 Chaypitami Tayta Diosga Judá runacunata nin: «Asiria runacunaga callpayoj aypalla cashpanpis illgangami. Nishänömi ushacangapaj. Gamcunataga ñacachishcänami. Cananpitaga manami ñacachishayquipänachu. 13 Ñacachishushpayqui yüguta churapäshushayquitapis ichic-ichicllami paquirishaj. Wataraycashayqui cadinatapis agullargärishämi.» 14 Nínive runacuna, gamcunapäga Tayta Dios caynömi nisha: «Gamcunapita mirar aywäga manami cangapänachu. Diosniquicunapa templuntapis juchuchishämi. Uywa-niraj ïduluyquicunatapis illgächishämi. Gamcunatapis melanaypaj captiquimi ushajpaj usharishayquipaj.» 15 ¡Judá runacuna, masqui ricay! Willacoj maynami jircacunapa aywaycämun alli goyay cananpäna willapata apamushpan.*Isa. 52.7 Diosta adurana fistayquicunata rurayna. Tayta Diosta aunishayquicunatapis cumliyna. Yapayga imaypis manami fiyu runacunapa munaynincho canquipänachu. Chay fiyu runacunaga ushajpänami ushacasha.
NAHÚM 2 ->
1 Cay libroga caycan Nínive*Isa. 10.5–34; 14.24–27; Sof. 2.13–15 imano cananpaj cashantapis Nahumta Tayta Dios ribilashanmi. Nahúm tiyaran Elcos marcachömi.