63
Contra cajcunata Tayta Dios castigashan
1 «Juc runami Edomcho caycaj Bosra siudäpita aywaycämun.*Isa. 34.5–17; Jer. 49.7–22; Eze. 25.12–14; 35.1–15; Amós 1.11–12; Abd. 1–14; Mal. 1.2–5
Röpanpis pucaman tiñisha aywaycämun.
Achicyaypa achicyaycaj röpan jatisha aywaycämun.
Payga fiyupa munayniyojmi aywaycämun.
¿Piraj chay aywaycämöga?»
«Noga llapantapis alli arriglajmi aywaycämö.
Salbanäpäpis munayniyoj caycajmi aywaycämö.»
2 «¿Imanirtaj röpayquega übasta bïnupaj lluchcajta pillchipashano puca caycan?»
3 «Japallämi übasta lluchcajno conträcunata ushashcä.*Lam. 1.15; Joel 3.13; Apoc. 14.20; 19.15
Manami pipis yanapämashachu.
Fiyupa rabyashami conträcunataga lluchcar-ushashcä.
Fiyupa ollgushami llapirishcä.
Chaymi yawarnenga röpäman pillchipämasha.
Röpätapis yawar tiñisha.*Apoc. 19.13
4 Nogaga maynami yarpaycarä juc junaj llapanpita jusganäpaj.
Acrashä runacunata salbanäpaj caj chayamushanami.
5 Ricachacurishpä manami pitapis ricarächu yanapämänanpaj shamojta.
Yanapämänanpaj pipis mana captin almirasha ricacurä.
Ichanga quiquëmi munayniyoj cashpä llapanchöpis alli llojshishcä.
Rabyallawanmi llapanta usharishcä.*Isa. 59.16
6 Fiyupa rabyasha cashpämi nasyuncunataga llapirishcä.
Fiyupa ollgusha carmi illgarachishcä.
Yawarninpis yacunörämi pampapa aywasha.»
Israelpaj Tayta Dios alli cashan
7 Nogaga Tayta Dios cuyapäcoj cashantami parlayta munä.
Tayta Diosga noganchïpaj ima-aycatapis rurashami.
Israel runacunata fiyupami cuyapasha.
Cuyacoj cashpan yanapämashanpitami payta alabayta munä.
8 Tayta Diosga niran: «Paycunaga acrashä runacunami.
Paycunaga manami gongaycamangachu.»
Chaymi Tayta Diosga salbaran.
9 Llapan ñacaycunapitami runacunataga salbaran.
Paycunata salbananpäga manami anjilnintachu cachamuran.
Chaypa ruquenga quiquin Tayta Diosmi cuyapäcoj cashpan paycunata salbaran.*Deut. 32.11–12
Paymi jatarcachishpan margacurcur shuntasha.
Imaypis chaynömi yanapasha.
10 Chaypis paycunaga Tayta Diospa contranmi ricacuran.
Chaymi Santo Tayta Diosta rabyachiran.
Chaynöpami Tayta Diosga paycunapaj rabyacurcuran.
Nircur contran ricacur castigaran.*Deut. 32.15–25
11 Chayrämi paycunaga yarpäriran unay watacunacho imano cashantapis,
Moisés cashan wichan imano Tayta Dios salbashantapis.
Chaymi ninacuran:
«¿Maytaj uyshërunno caj Moiseswan acrashancunata lamarpita salbaj Dios?
¿Maychötaj caycan Moisesman Espíritu Santunta churäga?
12 ¿Maychötaj caycan fiyupa munayninwan Moisesta yan'gaj?
¿Maychötaj caycan imaycamapis rejsisha cananpaj
lamar yacuta ishcayman raquirej Dios?*Éxo. 14.21
13 ¿Maytaj acrashancunata lamarpa päsachej?
¿Maytaj chunyaj jircapa cawalluta mana lluchcacayllapa päsachejno acrashancunata pushamoj?
14 Uywacuna guechwa pampaman chayaycur alli guewacho cushicushannömi
Tayta Diospa Espiritunpis jamayta tarichiran.
Chayno alli jamananpämi acrashayqui runacunataga pushamurayqui.
Chayno rurashayquipitami munayniyoj cashayquita may-chaychöpis parlasha.»*Sal. 77.20
Yanapänanpaj Tayta Diosta mañacushan
15 Tayta Dios, fiyupa rispitädu particho tiyaycashayqui syëlupita-pacha ricäramuy ari.
¿Maytaj fiyupa cuyacoj cayniquiwan munayniyoj cayniquega?
¿Imanirtaj nogacunataga mana yarpämanquinachu?
¿Nogacunataga mananachu cuyapämanqui?
16 ¡Gammi canqui nogacunapa papänë!
Abraham «manami wamrächu canqui» nimaptinpis,
Jacob nogacunata mana yarpämaptinpis
Tayta Dios, gamllami canqui nogacunapa papänëga.
Imaypis nogacunata yanapämäga gamllami canqui.
17 Tayta Dios, ¿imanirtaj camacächishcanqui munashayquita ruraycashäpita gongaycärinäpäga?
¿Imanirtaj manana rispitanäpaj shongöcunatapis jucnöman ticrachishcanqui?
Acrashayqui runacuna caycaptëga, sirbishojniqui runacuna caycaptëga cuyapämashpayqui yanapaycamay ari.
18 ¡Acrashayqui runacunaga goycushayqui nasyuncho wallca watallami tiyasha!
Cananga conträcunami Templuyquita pasaypa ganraycächin.
19 Chaymi nogacunaga caycä imaypis mana mandashayqui nasyun runacunanöna,
imaypis mana alabashoj runacunanöna.