1 मी किंखेया नगर को कलीसिया की खास सेविका आमरो बहिन फिबे को लाय तुमी लोकगीन लक सिपारिस करके कव्हसू। 2 का तुमी पिरभू मा वोला असो रित लक अपनाने जसो परमेस्वर को लोक गिनको लायक सेत। वोला तुमरो लक जसो मदद पाहिजे तसोच वोकी मदद करो। काहेका वा मोरो समेत लगत लोक गिनको मदद करियो सेत।

3 प्रिस्किल्ला अना अक्किला ला जोन यीसु मसीह मा मोरो संग काम करनवारा सेत। उनला मोरो नमस्कार।[a] 4 उनना मोरो जान को लाय आपरो जीवन ला जोखिम मा डाख दियो होतिन, अना केवल मी च नही पर गैरयहुदी गिनको सारो कलीसिया भी उनको धनवाद करासेत।

5 उनको घरमा जोन कलीसिया से, वोला भी नमस्कार मोरो चहेतो इपैनितुस ला, जो मसीह को लाय आसिया मा पयलो फर सेत, नमस्कार 6 मरियम ला, जोन ना तुमारो लाय गजब महेनत करीसेस, वोला नमस्कार। 7 अन्द्रुनीकुस अना युनियास जोन मोरो रिस्तेदार सेत, अना मोरो सग कैद भई होतिन, अर वय पेरीत गीन मा नामी गामी सेत। अना मोरो लक पयले मसीह मा सेती, नमस्कार।

8 अम्पलियातुस ला, जोन पिरभू मा मोरो चहेतो से नमस्कार। 9 उरबानुस ला जेना मसीह मा आमरो संग काम करनवारा सेत, अना ओ मोरो चहेतो इस्तखुस को नमस्कार। 10 अपिल्लेस ला जो मसीह मा सच्चो अना काबील से, वोला नमस्कार। अरिस्तुबुलुस को घराना ला नमस्कार 11 मोरो रिस्तेदार हेरोदियोन ला नमस्कार। नरकिस्सुस को घराना को जेन लोक पिरभू मा सेत, उनला नमस्कार।

12 तुरूफेना अना तुरूफोसा ला जेन पिरभू मा महेनत करसेति वा ला नमस्कार। मोरो चहेतो पिरसिस ला जेन ना पिरभू मा गजब मेहनत करीसेस नमस्कार। 13 रुफुस ला जोन पिरभू मा बेचो होवासे। अना वा की माय ला जोन मोरो भी माय लगासेत। वा दूई ला नमस्कार 14 असुंक्रितुस अना फिलगोन अना हिर्मेस अना पतरुबास अना हिर्मास अना उनको सगी भाऊ गिनला नमस्कार। 15 फिलुलुगुस अना यूलिया अना नेरयुस अना वाकि बहिन, अना उलुम्पास अना उनको सग को सब पवीतर लोकगीन ला नमस्कार।

16 आपस मा पवीतर चुम्मा लक नमस्कार करो। तुमला यीसु मसीह को सबा कलीसिया गीन को कन लक नमस्कार।

17 अबा ओ भाऊ अना बहिन गीन, मि तुमरो लक बिनती करासू का जोन लोकगीन वोना सिक्सा को विरोध मा जोन तुमीना पाइसेव, फूट डाखन अना ठोकर खावन को कारन सेत। उनला ताड़ लेव अना उन लक दुहुर रव्हो। 18 आपरो पोट को सेवा करनवारा, अना चिकनो-चिकनो साँग के सिदो-सादो मन को लोकगीन ला बहकानवारा, असो लोकगीन पिरभू यीसु मसीह को सेवा नही करा सेस, पर वय आपरो सेवा करसेस। 19 तुमरो हुकूम मानन को चरचा सब लोकगीन मा फैल गयो सेत, एको लाय मी तुमरो लाय खुसी मनावसू, पर मी यो चव्हासू, का साजरो लक अक्कलवर अना बुराई को लाय भोला बनो। 20 सान्ती को परमेस्वर सैतान ला तुमारो लात मा लवकर खुदवा देहेत।

आमरो पिरभू यीसु मसीह को किरपा तुमरो पर होतो रव्हे।

21 मोरो संग काम करनवारा तीमुथियुस को, अना मोरो रिस्तेदार लूकियुस, अना यासोन अना सोसिपतरुस को तुमला नमस्कार।

22 मी चिठ्ठी लिखन वारा तिरतियुस को पिरभू मा तुमला नमस्कार।

23 गयुस जोन मोरो अना सब कलीसिया को पोहनाइ करनवारा, अना यो नगर को खजांची एरास्तू अना भाऊ क्वार्तुस तुमी लोक गिनला नमस्कार कव्हसेत। 24 आमरो पिरभू यीसु मसीह को किरपा तुम सब पर बनो रवहे। आमेन

25 वोना अमर परमेस्वर को स्तुति हो, जोन तुमी लोकगीन ला मोरो साजरा बारता अना यीसु मसीह को बारता को लक मजबूत राखन मा ताकतवर सेत। यो साजरो बारता वोना राज को सुरुवात से, जोन जुग-जुग लक लुको सेत। 26 पर अबा परगट हो गयो से। यो भविस्यवक्ता गिन को भविस्यवानी मोसे को नियम को लक अमर परमेस्वर को हुकूम लक, सब लोक गीन मा मुनादी कियो गयो से। जेनको लक वय भरोसा को लक अधिनता स्विकार करे।

27 वोच केवल एक गियान को रुप परमेस्वर को महिमा यीसु मसीह लक जूग-जूग तकन होहे आमेन

<- रोमियो 15