लूका के व्दारा लिखा यीसु मसीह का सुसमाचार

लूका लक लिख्यो यीसु मसीह को साजरा बारता
परिचय
लूका रचित सुसमाचार नवा करार की उन चार किताब गीन लक एक आय, जेको मा यीसु को जिंदगी को बारे मा से। उन हर एक किताब गीनला साजरा बारता कह्यो गयो सेत। यीसु को मरन को बाद मत्ती, मरकुस, अखिन योहन ना यो किताब गिनला लिख्यो से। लूका न सीरप यीसु को जिंदगी को बारता च नही लिख्यो, बल्की ओको मरन को बाद ओको चेलागिन को काम को बारे म भी लिख्यो। “पेरीत को काम” नाव की किताब मा एको बारे मा वाचन ला भेटयो सेत। लूका को साजरा बारता कहांन अखिन कब लिख्यो गयो से एको बारे मा पक्को मालूम नहाय? पर लगत सो वाचन वालो यो माना सेत का लूका लक लिख्यो साजरा बारता यीसु को जलम को करीब 70 साल को बाद लिख्यो गयो से।
या किताब को लेखक खुद लूका आय जोन बईद होतो। ओको लिखन को तरीका अखीन भासा लक यो पता चला से का लूका एक पढ़यो लिख्यो मानूस होतो। लूका चाहत होतो की यीसु को जिंदगी को घटना ला सही-सही लिख्यो जाये, अखिन घटनागीन जसो भयी ठीक वसोच लिख्यो जाये, जोन लक उनको बारेमा वाच के फायदा होये। लूका यहूदी नहीं होतो। कुलुस्सियो 4:10-14 ओना असो परकार लक लिख्यो का गैरयहूदी भी ओकी लिखित साजरा बारता सरलता लक समज सके, जोन परकार लक यहूदी रीति रिवाज गिनको बारे मा लिखयो गयो से, ओको लक यो पता चलयो से। 1:8
लगत मातरा मा लूका लक लिख्यो साजरा बारता मत्ती अना मरकुस को किताब गीन जसी से। तीन च किताब गीनमा उच घटना गीनको बारेमा एक जसो सांगयो गयो सेत। पर लूका को किताब मा बप्तिस्मा देवन वालो योहन को जलम को बारे मा सब लक ज्यादा जानकारी मिला से। लूका मा “माफी को बारे मा सब लक ज्यादा लिख्यो से।” अध्याय 3:3; 11:4; 17:3-4; 23:24; 24:47 अना पिराथना 3:21; 5:16; 6:12; 11:1-12; 22:32 वालो मा जोर देवासे।
रुपरेखा
1. भूमिका 1:1-4
2. योहन बप्तिस्मा देवनवारा, अना यीसु को जलम, बचपना। 1:5—2:52
3. योहन बप्तिस्मा देवनवारा को जनता सेवा। 3:1-20
4. यीसु को बप्तिस्मा अना परखो जानो। 3:21—4:13
5. गलील नगर मा यीसु को जनसेवा। 4:14—9:50
6. गलील ले येरुसलेम नगर तकन यातरा। 9:51—19:27
7. येरुसलेम नगर मा आखीर हफ्ता। 19:28—23:56
8. परभू को जित्तो होवनो, चोवनो अना सरग जानो। 24:1-53

परिचय

थियुफिलुस को समरथन

1 ओ पियारो थियुफिलुस, जोन गोस्टी हमरो संग मा बितो से। मि ना उनला लिखन को मन बनाइ सेव हमरो लक 2 पयले यीसु को उन गोस्टी ला चोवन अखीन आयकन वालो दास होतिन। उनना सबच गोस्टी ला हमि तकन धाडिसेस। 3 एकोलाई अगो थियुफिलुस अबा मोला यो साजरो लगि से, का उनच, गोस्टी ला खरो-खरो जाँचकेना, एक को मघा एक, ठिख-ठाख मालुम करके लिखु। 4 जेनको लक तू जानले, का वा गोस्टी, अना जोन को गियान तुना पाईसेस। कसो अटल से?

योहन बप्तिस्मा देवन वालो को जनम को बारे सांगनो

5 यहुदिया को राजा हेरोदेस[a] को बेरा मा, अबिय्याह को दल मा, जकरयाह नाव को एक याजक होत्यो। अखीन वोको बायको हारून[b] को खानदान की होति। अखीन वोको नाव एलीसीबा होती। 6 वय दुई परमेस्वर[c] को नजर मा नेक होतीन। वय पिरभु को सबच, हुकूम ला मानत होतीन। 7 उन को कोनी लेकरा बारा नही होतिन। काहेका एलीसीबा वाखड होती, अखीन उ बुड़गा भई गई होतो।

8 जब जकरयाह आपरो दल को सगंमा परमेस्वर को पुजा-पाट करत होतिन। 9 तबा धुप-जलावन काजी, जकरयाह याजक को नाव लक चिठ्ठी हिट्यो। का उ मंदिर मा पिरभु को पूढा धुप जलाये। 10 तबा धूप जालावन को बेरा मा, सबच बिनती करत होतिन।

11 ओच बेरा मा पिरभु को सरगदूत ओला धुप वेदी[d] को उज्जो कन चोवयो। 12 जकरयाह डराय गयो, अखीन ओको “घिघगि बंध गयो।” 13 पर सरगदूत[e] न ओला सांगिस, ओ जकरयाह, भेव नोको खावजोस, काहेका तोरो पिराथना परमेस्वर ना आयक, लेइस। अखीन तोरि बायको एलीसीबा लक, तोरो लाय एक टूरा होहेत, अखीन तु वोको नाव योहन राखजोस। 14 तोला खुसी होहे। अखीन गजब लोकगीन, वोको जनम को कारन, खुसी मनाहेत। 15 काहे का उ पिरभु को पुढ़ा, मा महान होयेत। अखीन अंगूर को रस, अर दारु, कभी नही पिहेत। अखीन उ आपरो माय को पोट लक, पवीतर आतमा लक भरो होयेत। 16 अखीन भटको हुओ, इसरायल[f] को गजब लोकगीन ला, उनको परमेस्वर को रास्ता मा आनेत। 17 उ एलिय्याह[g] को आतमा अखीन ताकत मा, पुढा-पुढा चलेत, क आजा पुरखागीन को मन ला, लेकरा-बारा मा लगा देहेत। अखीन हुकूम नही मानन वालो ला, नेक बना देहेत। अखीन पिरभु को लाई, साजरो लोकगीन ला, तैय्यार करयेत।

18 जकरयाह ना सरगदूत सांग्यो, यो कसो होयेत? काहेकी मी, अखीन मोरो बायको, दूई को बुडगापन से।

19 तब सरगदूत ना वोला जवाब दियो, मी जिबराइल सरगदूत सेव। जोन परमेस्वर को पुढा उभो रहुसु, अखीन तोरो लक बात करन, अखीन यो खबर आयकावन काजी इता आईसेव। 20 जोन दिवस तकन यो गोस्टी पूरो होहेत, ओना दिवस तकन तू गुंगो रव्हजो। काहेका तू मोरी गोस्टी पर भरोसा नही मानीसेस।

21 लोग गीन जकरयाह को “बाट जोहत होतिन” अखीन चकित भईन। काहे का मंदिर मा, वोला उसीर भई गई होती। 22 जब उ बाहेर हिटयो, तो उ बोल ना सकयो, तब लोकगीन जान गईन, का मंदिर [h]पर कोनी दरस-परस भयो से। अखीन उ ईसारा करत होतो, अखीन गुगों भय गयो होतो।

23 जब वोको सेवा को दिवस पूरो भयो, तो उ आपरो घर चलो गयो। 24 काही बेरा को बादमा वोको बायको एलीसीबा पेट लक भई। वो 5 मास तकन आपरो ला छुपाय राखयो। 25 अखीन कव्हन लगयो, मोरो कलंक दुर करन काजी, पिरभु न किरपा करीसेस।

यीसु को जनम को पूढा सांगनो

26 छँटवो महीना मा, परमेस्वर कन लक, एक कुँवारी को कन जिबराइल सरगदूत[i] नाव को, सरग दूत ला धाडिस। वा टूरी गलील छेतर को, नासरत नगर मा, रव्हन वालो होती। 27 [j]जोकि पक्की राजा दाऊद[k] को खानदान मा, यूसुफ नामको टूरा संग भई होती। ओ कुँवारी टूरी को नाव मरियम होती। 28 सरग दूत ना, ओको कठा जायके सांगिस, नमस्कार[l] मरियम, पिरभु को किरपा तोरो पर भईसे।

29 अखीन, यो बात ला आयक के, वा टूरी घबराय गई, अखी मनमा सोचन लगी, यो कसी गोस्टिसे? 30 तबा सरगदूत ना कहीस, मरियम तु भेव नोको कर, परमेस्वर को किरपा तोरो पर भईसे। 31 चोव! तु पोट लक होवजोस, अखीन तोरो लक एक टूरा जनम लेहे, तु ओको नाव यीसु[m] राखजो।[n] 32 उ महान होहे अखीन पिरभु को टूरा कहलाहे। परमेस्वर वोको आजा-पुरखा, दाऊद को सिघासन[o] वोला देहे। 33 अना उ तोरो पुरखा, याकूब को घराना मा, जुग-जुग लक राज करहे, अखीन वोको राज अमर[p] रहेत।

34 मरियम ना सरगदूत ला कहीस, यो कसो होहे, मी तो, कोनी मरद को संग नही सोयी सेऊ।

35 सरगदूत ना वोला साँगिस, पवीतर आतमा को ताकत तोरो पर आहेत, अखीन मोठो परमेस्वर तोरी, रक्सा करहे। एको लाई उ पवीतर, जो जनम लेवन-वालो से, परमेस्वर को टूरा कहलाहे। 36 अखीन देख, तोरो कुटुम्ब मा एलीसीबा लक वोला बुड़गीपन मा टूरा होवन वालो से। अब वोको छँटवो महीना से। 37 काहे की परमेस्वर की गोस्टी खरी ठयरासे। कभी खोटो[q] नही होवासे।

38 मरियम ना सांगिस, चोव, मी, पिरभु की सेविका सेउ। मोला तु जसो सांगासे, वसोच गोस्टी भई जाहे। तब सरगदूत ओको कठा लक चलो गयो।

39 वो ना बेरा मा, मरियम लवकर तैय्यार भई अखीन आपरो कुटुम्बी एलीसीबा को यहूदा देस को पहाड़ी गांव मा गई। 40 वो जकरयाह को घर मा गई। अखीन एलीसीबा ला नमस्कार करीस। 41 जेंधावर एलीसीबा ना, मरियम को नमस्कार आयकिस, तसोच, वोको लेकरा पोट मा उचलो, अना उ पवीतर आतमा लक भर गई। 42 अना वा चिल्ला के कहीस, तु सबच आई-माई गीनमा धन्य से। अना धन्य से तोरो पोट को फर। 43 मोरो ऊँचो किस्मत से का, मोरो पर दया कसो भई? पिरभू को माय मोरो घरमा आई सेस। 44 काहेका, जसो तोरो नमस्कार मीना आयकीसेव, लेकरा मोरो पोट मा, खुसी लक उछल पडयो। 45 तू धन्य सेस, जोन ना बिस्वास लक असो करीसेस, का पिरभू ना जोन गोस्टी साँगीसेस, वो पूरी भई जाहेत।

मरियम को गाना

46 एको पर मरियम असो गावन लगी,

“मोरी जीव (मन) पिरभु को गुन-गान करासे।” 47 मोरो जीव, आपरो मुक्ती देवन वालो,

परमेस्वर को खुसी मनावसे। 48 काहे का वोना आपरो सेविका को गरीबी[r] पर,

किरपा करीसेस। अब लक सब पीड़ी,

मोला धन्य कहेति। 49 काहे का, गजब सक्तिसाली परमेस्वर ना,

मोरो लाय मोठयो काम करीसेस,

पवीतर से वोको नाव। 50 वोको तरस वोको भविस्यवक्ता गीन पर,

पीढ़ी-पीढ़ी लक बनो रव्हसे। 51 परमेस्वर ना अपरो ताकत दिखाईसेस, वोना घमन्डी गीन ला,

छितराय देईसे। 52 वोना मोठो अधिकारी गिनला,

उनको सिघासन लक उतार दियो से।

अखीन, गरिब[s] ला, महान बनायो से।

53 वोना भुखो-लाघो गिनला, साजरो-साजरो जेवन देइसेस।

अखीन धनी गिनला,

रिकामो हात लौटा दियो से।

54 वोना अपरो दया, ला ध्यान देके ना, आपरो दास इसरायल ला

संभालयो से। 55 जसो कसम, हमरो बाप-दादा लक खायो होतो।

का अबराहम अखीन ओको सन्तान पर,

परमेस्वर को करुना सदा बनो रहेत।

56 तीन महीना मरियम एलीसीबा को घर रहकेना, अपरो घर आय गई।

योहन बप्तिस्मा देवन वालो को जलम

57 एलीसीबा को जचकी को बेरा पूरो भयी। अखीन वोना एक टूरा ला जलम दियो। 58 जब वोको पड़ोसी, अखीन रिस्तेदार ना यो बात आयकिन, का पिरभु को किरपा से। तब सब वोको संग खुसी मा सामील भईन।

59 आठवा दिवस टूरा को खतना[t] को बेरा आयो। तब लोकगीन वोको नाव वोको बाबूजी जकरयाह को नाव पर, राखन चाव्हत होतीन। 60 पर वोको माय ना सांगीस, नही, एको नाव योहन राखबिन।

61 तब वोना लोकगीन कव्हन लगीन, तुम्हारो कुटुम्ब मा, कोनी को असो नाव नहात। 62 तब लोकगीन ईसारा करके वोको बाबूजी लक पुसन लगीन, उ का नाव राखन चाव्हसेस।

63 वोना पाटी मागंके ओमा योहन नाव लिख्यो। 64 वोच बेरा मा, जकरयाह को जुबान खुल गयो, अखीन उ परमेस्वर को धन्यवाद करन लगयो। 65 तब सब सेजारीगीन मा भेव छाय गयो। अखीन उनको गांव को आखा-पाखा मा अना यहुदिया देस मा यो गोस्टी को चरचा फैल गयो। 66 सब आयकन वारा मन मा विचार के, ना कव्हन लगीन, का यो लेकरा का बनहेत? काहे का सचमूच मा पिरभु को “वोको पर हात होतो।”

जकरयाह को भजन

67 योहन को दादजी जकरयाह, पवीतर आतमा लक भर गयो। अखीन असो कव्हत, आवन वारो गोस्टी साँगन लग्यो।

68 धन्य से इसरायल को परमेस्वर, वोना आपरो लोकगीन को सूधी लेवासे,

अखीन उनको मोक्स करोसे। 69 अखीन आपरो दास दाऊद को घराना,

लक एक सूटकारा देवन वालो

सींग[u] हिटिसे। 70 उ आपरो पवीतर भविस्यवक्ता को टोन्ड ले,

पूरानो जमाना लक, यो कव्हतो आयो सेस। 71 क उ बैरी अखीन सब

बैरी हुन को हात लक,

हमीला सूटकारा करीसेस। 72 का आमरो बाबूजी दादजी पर

दया करके आपरी

पवीतर वायदा ला हेत करयेत। 73 वोना किरया खायके ना,

हमारो पुरखा अबराहम लक, असो सांग्यो होतो। 74 क उ हमारो दुस्मन को हाथ लक,

हमीला छुड़ाय लेहेत।

75 जोन को लक हमी बेधड़क,

पवीतर, अखीन न्यायी पन लक

वोको सेवा करयेत। 76 उ टूरा सब लक मोठो परमेस्वर को भविस्यवक्ता कहलाव जोस,

तू पिरभू को पूढ़ा चलन वालो दूत बनजो!

तू वोको मारग

तैय्यार करजो। 77 अखीन वोको लोकगीन ला,

उनको पाप छिमा को कन लक,

मुकती को गियान देवजोस। 78 हमारो परमेस्वर को यो माया,

अखीन दया लक, हमी ला सरग लक,

उजाड़ो मिलहेत। 79 जेनको लाय उ इन्धीयारो अखीन,

मरन को सावली मा, जो लोग बस्यो से,

वोला उजाडो देवजो! अखीन हामरो पाय ला सान्ती को रास्ता मा ले जाहेत।

80 लेकरा योहन मोठो होवन लग्यो, अखीन वोको आतमा बल बढन लगयो! उ इसरायल को सामने चोवनो को पूढ़ा सुनसान जघा मा रव्हन लग्यो।

लूका 2 ->