1 हुल्लड़ सान्ती होवनो को मघा पौलुस न चेला गीन ला बुलावन धाडिस। उनला बड़ावा को अना मजबूत होवन को गोस्टी समझायो। मंग वोना सार होयके मकीदुनिया कन चली गयो। 2 वोना सबच छेतर को दौरा करयो। अना सब लोकगिन ला सन्देस देयके जोस मा भरतो यूनान पहुचियो। 3 वहान वोना तीन महीना बीताईस अना जबा उ जहाज लक सीरिया जावन वालो होतो। पर जबा वोला मालुम भयो का यहूदीगीन वोको बिरोध मा साजीस करयो सेत। तो उ पिलान बदल के मकिदुनिया लौटन को इरादा बनायो। 4 बिरीया को रव्हन वालो पुर्रुस को टूरा सोपतरुस, थिस्सलुनीकिया को रहवन वालो अरिस्तखुरस, सिकुन्दुस, दिरबे को गयुस, तीमुथियुस अना एसिया को तुखिकुस अना तुरफियुस वोको संग होतो। 5 पर ये लोक हमरो लक पुड़ा पैदल चली गईन अना तोरआस मा हमारो बाट जोह रहया होतीन। 6 अखमीरी भाकर को तिहार को मंग हमी फिलिप्पी लक जहाज लक हिटके अना पाँच दिवस मा उनको जवर तोरआस पहुचयो। अना वहान सात दिवस तकन रहयो।

7 सनीवार को राती हफ्ता जबा हमी भाकर टोड़न को लाई इक्कठा भयो। त पौलुस गोस्टी करन लगयो। उ दुसरो दिवस जावन वारा होत्यो। एकोलाय अरधी रात तकन सिक्सा देवतो रहयो। 8 जो वरता पाटन मा हमी इक्कठा हुया होता। वहान सिड़ीगिन मा लगत सा टेमा पेटायो होतीन। 9 युतखुस नाव को एक मानूस होत्यो जोन खिड़की पर बस्या हुया। जप को झोक मा होत्यो। जबा पौलुस उसीर तकन जोर लक बोलता रहयो। त वोला जप आय गई अना उ दुय मंजिला लक खाल्या पड गयो। अना मरयो हुयो उचलेयो गयो। 10 पर पौलुस खाल्या उतरयो अना वोको पर झुक गयो मंग अना गरो लगायके कहीस “घबरावो नोको काहेकी वो जित्तो सेत।” 11 अना वरता जायके भाकर तोडीस, अखीन खायके येतरी देर तकन उनको लक गोस्टी करता रहयो का फर-फर भय गयो मंग उ चली गयो। 12 वय वोना जित्तो टूरा ला घर ले गइन एकोलक उनला लगत सान्ती भेटयो।

13 अमी जहाज लक पयले पहुचयो। अना अस्सुस जावन लाय हिट गयो। अमिला उतानी पौलुस ला जहाज मा चघानो होतो। काहेका उ रेगत-रेगत वहान जावन को योजना बनायो होतो। 14 जबा उ अमिला अस्सुस मा मिलयो त हमी वोला जहाज मा चघायके मितुलेने मा जावन लगयो। 15 वहान लक जहाज खोलके हमी दुसरो दिवस खियुस को पुड़ा पहुचया। मंग परो दिवस अमी सामुस मा आय गयो। मंग वोको दुसरो दिवस मिलेतुस मा पहुचयो। 16 काहेकी पौलुस जहान तकन होय सके पेन्टि कोस्त को तिहार को कारन हड़बड़ी करत होतो। उ असो पक्को करयो होतो। का इफिसुस मा रुकयो बिना पूड़ा येरुसलेम चलयो जाहेत। जोनलक आसिया मा बेरा बितानो ना पड़े।

17 वोना मिलेतुस लक इफिसुस मा कहेके धाडिस अना कलीसिया ला बुजरुक गिनला बुलवाइस। 18 जबा वय वोको जवर आइन। त वोना कहीस तुमी जानासेव का पहेलो च दिवस लक जबा मी आसिया मा पहुचयो। मी हर बेरा तुमरो संग कोनो पिरकार लक रहीसेऊ। 19 अना मोठी गरीबी लक अखीन आवा सेऊ मी आँसू बोहाय-बोहाय के मी सेवा करत रहयो। जोन यहुदीगिन को साजिस को कारन मोरो पर आयो होतो। 20 अना जोन-जोन गोस्टी तुमरो हित की होतीन उनला सांगयो अना लोकगीन को पुड़ा अखीन घरन-घर सिकावन लक कभीच न हिचकयो। 21 यहूदी अना यूनानी गीनला समान भाव लक मी मनला मुरकाके परमेस्वर कन मुड़न लाय कव्हसू, अना आमरो पिरभू यीसु मसीह मा विस्वास को लाय मी चेताय रहयो सेऊ। 22 अबा चोवो मी पवितर आतमा को अधीन होवके येरुसलेम नगर मा जावासू। अना नही जानासू का मोरो पर वहान काजक-काजक बीतेत। 23 मी बस एतरो जानासू का हरेक नगर मा पवीतर आतमा चेताय रव्हसे। क वहान बेड़ी अना दुख तोरो लाई तैय्यार सेत। 24 पर मी जान ला किमती नही समझसू। मी तो बस उ दौड अना वोकी सेवा ला पूरी करनो चाव्हसू। जोन मोला पिरभू यीसु देइसेस। उ यो से का परमेस्वर को दया मा गवाही देवनो।

25 अबा मोरो तोन्ड मग नहि दिसेत। काहेका मी परमेस्वर को राज को परचार करासु। 26 एकोलाय मी आज को दिवस तुमरो लक मुनादी करासू। का तुमरो मा लक कोनी को खून को दोसी नही सेऊ। 27 काहेकी मी परमेस्वर को सबरी मकसद लक तुमला पूरो रीत लक सांगन नही हिचकयो। 28 एकोलाय अपरी, अना पूरो हेड की चोकसी करो, जिनमा पवीतर आतमा न तुमला कलिसीया को मुखिया ठायराइसेस। जोनलक तुमी परमेस्वर की कलीसिया की देख-रेख करो, जेनला वोना अपरो खून लक मोल लेई सेस। 29 मी जानासेऊ का मोरो जावन को बाद तुमरो बीचमा हिंसक बीघा आहेत, जोन हेड़ ला नही छोड़ेत। 30 असो बेरा आहेत का तुमरो बीच मा लक असो मानूस उठेत, अना लोकगीन ला अपरो मंघा खीचन लाई बचनला तोड़ मरोड़ के सांगेत। 31 एकोलाय जागतो रहेयो अना हेत करो। का मी न तीन बरस तकन रात दिवस आसू बोहाय-बोहायके हर एक ला चेतावनी देनो नही छोडो।

32 अना अबा मी तुमला परमेस्वर को, अना वोको दया को वचन ला सौप देवासू। जोन तुमरी उन्नती कर सकसे, अना सब पवीतर किया गयो तुमरो लोकगीन ला वारसाना अधिकार दिलाय सकसेत। 33 मी न कोनी को सोना अना खुरो मुन्दरो अखीन कपरा को लोभ नही करयो। 34 तुमी खुदच जानासेव का मी एना हात लक मोरी अना संगी गीन की जरुरत की सेवा ला पूरो करीसेऊ। 35 मी न आपरो हरेक काम लक बतलायो। का महेनत करतो हुयो कमजोर गीन ला सम्भालनो। अना पिरभू यीसु को बचन ला हेत राखनो जरुरी सेत जसो वोना खुदच कहिसेत “लेवनो लक देवनो धन्य से।”

36 असो सांगके टोंगरा टेकके सब झन पिराथना करीन। 37 तबा वय सब रोईन अना पौलुस को गरो ला धरके वोला भेटन लगीन। 38 वय खासकर यो गोस्टी लक दुखित होतिन का पौलुस ना असो कहयो होतो का तुमला मी अबा कभीच नही भेटिन। तबा सबा लोकगिन वोला जहाज तकन पहुचाइन।

<- पेरीत 19पेरीत 21 ->