1 एना बेरा राजा हेरोदेस न कलीसिया[a] का काही मानूस गीन ला परेसान करन लाई उनको पर हात डाकिन। 2 उनना योहन को भाऊ याकूब की तलवार लक मारवय डाकिन। 3 जबा वोना देखीस का यहूदी ऐना गोस्टी लक खुसी भयो, ता वोना पतरस ला भी धरनो को सोचीस। यो सादो भाकर[b] को तिहार होत्यो। 4 अना वोला धरके जेल मा डाक देईन, अना चार-चार सिपाई गीन को चार दल को पहरा मा एकोलाय राखीन का बलिदान तिहार को मंग, वोला बाहेर लोक गीन को पुढ़ा आनेत। 5 पतरस ला जेल मा बेंड देईन पर कलीसिया वोको लाई परमेस्वर लक लवलीन भयके पिराथना कर रही होतीन।

6 जेनो रात मा हेरोदेस वोला बाहेर आनन वालो होत्यो पतरस ला दूई हतकड़ी लक बांध देईन। जेल को चौकीदार बेसकुड़ मा जेल की देख-रेख करत होतीन। 7 अना पिरभू को एक सरगदूत एकाएक परगट भयो अना वोच जेल को खोली मा उजाडो भयो, अना ओना पतरस को पसली पर हात मारके ओला जगाईस अना साँगीस, “सटाकनेरी उभो होय!” अना वोको हात लक हतकड़ी पड़ गईन। 8 तबा सरगदूत न वोला साँगीस, “तु कमर बाँध, जुता कपरा पहर वोना वसोच कर लेईस, मंगा सरगदुत वोला साँगीस का मोरा मंघा आव।” 9 उ बाहेर हिटके अना वोको मंघा-मंघा चलतो गयो पर वोकी समझ मा यो नही आय रहयो होतो, का जोन काही सरगदूत कर रहीसे उ खरो मा से! पर वोना सोचीस का मी कोनी सपना चोय रहीसेऊ। 10 अना जबा वय रात को पहलो पहेर अना रात को दुसरो पहेर लक हिटके लोहा गीन को बेसकुड़ मा आइन जोन नगर कन होतो। वा बेसकुड़ उनको लाई अपरो आप उघड गयो, वय बाहेर हिटके एक गली मा लक चली गईन। तबा सटाकने सरगदूत वोला छोडके चली गयो।

11 जबा पतरस ला होस आयी तबा वोना कहीस अबा मी खरो खर मा जान गईसेऊ का पिरभू न अपरो सरगदूत धाडके मोला हेरोदेस को हात लक सूटकारा देइसेस अना यहूदी गीन की सारी आसा तोड़ देईस।

12 यो जानके उ ओना योहन की माय मरियम को घर आयो, जो मरकुस कहलावासे। वहान लगत लोक एकठ्ठो भयके पिराथना कर रही होतीन। 13 जबा ओने किवाड़ ला खटखटाइस, तबा रूदे नाव की बायको जवाब देवन आयी। 14 जबा ओना पतरस की आवाज ला चिन्हिस त खुसी को मारे किवाड़ खोलयो बगैर परायके भीतर गयी। अना सांगीस का पतरस फटका मा उभो से। 15 उनना ओकोलक कहीस, “तु बावरो सेस।” पर वा हिम्मत लक बोलत रही ऐतरो पर ओना सांगीस उ सरगदुत होहे। ऐतरो पर भी पतरस बाहेर किवाड़ को जघा खटखटातो रव्हो। हिम्मत लक कहीस का असोच से।

16 पर पतरस खटखटातो रहयो। जबा उनना किवाड़ खोलिन ता वय ओला दिसके चकित रव्ह गईन। 17 तबा ओने उनला चुप्पी रव्हन लाई हात लक ईसारा करयो, अना साँगीस का पिरभू ना कोन रिति लक मोला बन्दीघर लक बाहेर हेड़ीसेस, मंग उनलक कहीस, “याकूब अना अखिन भाऊ गीन ला यो खबर देव।” तबा उ वहान लक हिटके कोनी दुजो जघा ला चली गयो।

18 सक्कारी होतच सिपाही मा मोठी खलबली मच गईन का पतरस ला काजक भय गयो।

19 हेरोदेस न जबा वोकी मोठी जाँच करीस अना उ नही मिलयो ता वोना देख-रेख करन वारा गीन लक पुछ ताछ करीन की हुकूम देईस की उनला लीजायके मार डाको अना पतरस यहुदिया लक कैसरिया मा जायके रव्हन लगीस।

20 उ सूर अना सैदा को लोक गीन लक लगत गुस्सा मा होत्यो। वय एक मेल होयके वोको जवर आयो। अना राजभवन को मुखिया बलास्तुस को मनायके मेल करनो चाहिन, काहेकी राजा को देस लक उनको देस को पालन-पोसन होत होतो।

21 ठैरायो दिवस आय गयो अना हेरोदेस राज घराना का कपरा पहेर के, नियाव आसन पर बसयो अना उनना गोस्टी आयकावीस। 22 अना लोक गीन ला हाकलता रव्हयो “या ता मानूस की नही परमेस्वर की आवाज से।” 23 गदने सरगदूत न वोला मार डाकीस, काहेकी वोना परमेस्वर पिरभू की महिमा नही देईस वोको बदन मा कीड़ा पड़ गईन अना वोना दम तोड देईस।

24 पर परमेस्वर को गोस्टी बड़तो गयो अना फैलतो गयो।

25 बरनबास अना साऊल जबा अपरो सेवा काम पूरो करके ता येरुसलेम लक लवटीन अना अपरो संग योहन ला भी जोन मरकुस कहेलावसे आनीन।

<- पेरीत 11पेरीत 13 ->