10
1 Varevaresiku, aku kayowana ghamanakina da aku wawaya Israel damsi yawasa makamakii nonowina ita viiya. Ti kubiisi na God kurina aniponipowana kirakai. 2 Kubiisi na avonavona da nuwanuwasi kudubina isabibira da God ita kivini. Ma kegha da vonavaghata akovina ke ita vii bubuni da ketana vaghata ikiiyakiri. 3 Ti na ke damisi ita viivii kiimatani da ikikava God wawaya etitinariyisi ma evonavonesi da ti na ina wawaya maninisi. Ti mani enotanota meyesi da aviyavisina eberaberai na tuna ketanai God ita vona da ti na ina wawaya maninisi. Tuna kubiine God ina keta vaghata na ibarei, ke ita votekatekei. 4 Keriso ipisi na Moses ina vonaviyoyovana ivi kovi tuwanonowi. Karako na iyavo kava Keriso ina vivitumaghanei na God ina vonakiiyaragha da kudubisi na ina wawaya maninisi.
Yawasa makamakii nonowina na peyarita kubiita.
5 Iyavo kava vonaviyoyovana enununuri da God ita kayowesi na kubiisi Moses igiruma bo, “Vonaviyoyovana kudubina kuna nununura yavui na yawasa kuna panani.”
* 6 Ma iyavo kava Keriso itumaghanei da ti na God ina wawaya maninisi na ti damsi na weni nakanani ita vonem. “Ke kuna vona bo, ‘Kade wawaya sago ita ghae ku kunuma’ ” da Keriso ita rutini itoru, iyamna namada ioru.
* 7 Ma bade, “Ke kuna vona bo, ‘Kade wawaya sago itoru ku tanama’ ” da Keriso irabobo ioru na ita rutini ita vovira, iyamna namada rabobowai ivovira.
8 Ma bade Moses igiruma bo, “God vonana namada inekiibau kurimi na kawamiyai koisisiyei ma nuwanuwami kamonai damina koviiviiya.” Nani vonana kadimadimei da wawaya iti tumaghanei na weni.
9 Iyi tam kawamatarai kuna vona bo, “Yesu tuna Bada,” ma nuwanuwam kudubinai kuni tumaghana da Yesu irabobo ma God iberai da rabobowai ivomiiri na God yawasa makamakii nonowina ina verem.
10 Nuwanuwam kudubinai kuni tumaghana ma kawamuwai kuni mamatara na God ina vonakiiyaragha da tam na ina wawaya maninim ma ini yawasim.
11 Giruma katamana ivona bo, “Iyavo kava i vitumaghana kurina ina terei na ke meyani da ina kitatawesi.”
* 12 Weni sisiyina na wawaya peyarita kubiita, iyamna ke ita vonavona da Jiu damta na bogiiyai ma kupuna damsi na bogiiyai. God na sago kava ma tuna na kudubita ita Bada. Ma iyavo kava ikwatu kurina na kudubisi ibiibiinisi,
13 iyamna giruma katamana ivona bo, “Iyavo kava Bada kurina ikwatu na kudubisi ini yawasisi.”
*14 Wawaya Bada ke ita vivitumaghanei na ikikava ini kwatu kurina? Ma Bada varana ke iti yanei na bade ikikava da ini tumaghanei? Ma wawaya ke ita dima kurisi na ikikava varana ini yanei ma akovina ina viiya? 15 Ma vitumaghana damsi na dima wawayisi ke ina vonatawesi ina kiibau na iyi ina dima? Giruma katamana ivona bo, “Yonayona vara biibiina ina viini ina pisi ma maranai ina nekiibau na tinuwabiibii kirakiiyei.”* 16 Ma kegha da ke wawaya peyarisi Israel kamonai God varana biibiina ita kayowei. Peroveta Aisaya ivona bo, “Bada, sisiya kuverekai kaiyonayonei na ke peyarisi iti tumaghanei.”* 17 Weni notasi kubiine yonayona wawayina ini sisiya kurisi, tuna berana ini nao ma muriyai Keriso ini tumaghanei, iyamna yonayona wawayina na Keriso varana biibiina ini sisiyei.
18 Ma wena aitarakiiyanota, wawaya sisiya ivi yanei bo kegha? Sisiya da vaghina ivi yanei. Giruma katamana evonavona bo,
“Gamo didisi dobu kudubina ivi yanei,
i sisiya ikiibau inae da dobu ku pusirina.”
* 19 Ma bade ani tarakiiyaname. Israel damsi vara biibiina iyamna iviiya bo kegha? Ti na vaghina iviiya, ma ibara. Moses ivi nao, igiruma da God ivona bo,
“Kupuna wawayisi na ke dam vaghata
ma ani biibiinisi da kona nuwakapiyesi,
Ti damsi na makiiwapasi ma ani biibiinisi
da nuwanuwami ina pughu.”
* 20 Ma bade Aisaya ere tepatorana igiruma da God ivona bo,
“Wawaya ke itekwekwiku ma kegha da ipananiku,
wawaya ke ita vivitarakiiyaneku ma kegha da anekiibau kurisi.”
* 21 Ma Israel kubiisi na ivona bo,
“Avororona kupom dam tinapotapotasi ma kawakiikiisi kurisi. Ma akoyagha kavisi.”
*
<- Rome 9Rome 11 ->
