[ 1 Yesu ighae ku Oliv koyana. 2 Ma mara boiboiyai ivovirame da Taparoro Numana garina kamonai ivi kiimakiiyei ma wawaya peyarisi iriyei kurina da ivivi beyebeyesi. 3 Ma vonaviyoyovana vibeyebeyena wawayisi ma Perisi damsi, wavine sago irutinapiyei da koroto maghinosiyai ivi miirini. Wavinena na ivi pekana wapawapa, tomowa sago ke kawana vaghata ma yavata ivivi pekana na wawaya ipanani. 4 Ma ivona bo, “Bada, weni wavinena kapanani da ivivi pekana wapawapa. 5 Moses ina vonaviyoyovana kamonai igiruma da wivine weni nakanani bera ina bera beroi na wakimiyai kata kiivunusi. Ma tam, am nota na ikikava?”[a] 6 Weni vitarakiiyanina iterei da Yesu iti sisiya bero na iti wavui. Ma kegha da Yesu itawopika ma ivi karei da dowiyai imarakorakonai ivivi girugiruma. 7 Ma wawayisi patana da ivivi tarakiiyanei. Tuna kubiine Yesu ivomiiri ma ivonesi bo, “Tam iyai ke meyani berabero kuta berai na kevi karei da weni wavinena wakimiyai kuna ravi.” 8 Vaghina ma itawopikame da dowiyai ivivi girugiruma. 9 Ma wawayisi weni sisiyina ivi yanei na ivi karei da sago sago duma inae. Magumagurisi ivi nao, da peyarisi Yesu ikuyowei. Ma wavinena na patana da imiimiiri. 10 Yesu ivomiiri ma nani wavinena ivi tarakiiyanei bo, “Wavine, wawayisi ivivi wavum na mike ivi neyana? Wawaya sago ku berona iterem, bo kegha?”

11 Ma wavinena ivona bo, “Bada, ke sago iyai.”

Ma vaghina, Yesu ivonei bo, “Taku bade nakanani, ke ku berona ana terem. Kenae, ma berabero ke kuna bera meyei.”][b]

12 Yesu ivi karei da koroto kurisi ivi sisiya na ivonesi bo, “Taku na dobu kana yasegana. Wawaya ina kiviniku na ke meyani nubakutuvai ina baba, ma nani yaseganinai na yawasa vaghata ina panani.”[c]

13 Ma Perisi damsi ivonapotei bo, “Kibero. Tam mani kisisiya meyem ma ke sago wawaya ku murim ita miiri da iti sisiya kubiim, tuna kubiine aviyavisina kuvonei na iyamna kegha.”[d]

14 Ma Yesu ivonapotesi bo, “Taku mani aisisiya meyeku, ma kegha da aku sisiya na vonavaghata, iyamna taku akovi da imapatana apisi ma mike ana nae. Ma tami na ke kotakovi. 15 Tami mani ami akova tepanai da koitupavireku. Ma taku na ke sago wawaya ati tupavirei. 16 Mikeda ati tupavira ma ata vonakiiyaragha da wawaya ibera beroi na nani kamonai aku nota na maninina kavakava, iyamna taku na ke ina kiku kava. Aku Mamai ivonataweku na tuna gwabikuwai. 17 Ami vonaviyoyovana kamonai igirumi da wawaya ruwa sisiyina sago ini mamatarei na tuna vonavaghata.[e] 18 Taku mani kubiiku aisisiya ma kaku viruwa na aku Mamai, tuna ivonataweku.”

19 Ma ivi tarakiiyanei bo, “Am mamai na imapatana?”

Yesu ivonapotesi bo, “Tami ke kotakovi da taku iyai ma bade aku Mamai ke kotakovi. Kotakoviku na aku Mamai kotakovi.”

20 Yesu weni sisiyisi ivi sisiyei Taparoro Numana garina kamonai. Gawara sago imakamakai da wawaya i verena itutura ma nani gawarinai Yesu ivivi beyebeyena. Ma ke sago wawaya ita votatani, iyamna kana mara ke ita nekiibau.

21 Ma Yesu ivona meyesi bo, “Taku ana nekuyowemi da tami konekwa kaviku, ma ami bera beroberosi kamonai kona rukwa. Mike ana nae na tami ke kovokovoghina da nake kona nae.”

22 Ma Jiu babadisi ti mani ivivi tarakiikiiyana meyesi, “Tuna mani ini rabobo meyei bo? Mikeda tuna kubiine ivona da, ‘Mike ana nae na tami ke kovokovoghina da nake kona nae.’ ”

23 Ma Yesu ina sisiya ikwapanatini, “Tami na weni dobuna wawayimi, ma taku na kiidamo wawayiku. Tami ami dobu weni, ma taku na kegha. 24 Tuna kubiine avonemi da ami bera beroberosi kubiine kona rukwa. Namada avonemi da taku iyai. Ke koni tumaghaneku na vaghina, ami bera beroberosi kubiine kona rukwa.”

25 Ma ivi tarakiiyanei bo, “Tam iyai?”

Ma ivonapotesi bo, “Taku, mara nonowa avonavonemi. 26 Ami bera ipeyari kirakai da ati sisiyei ma bade ati tupaviremi ma ata vonakiiyaragha da berabero koberai ma kegha. Wawayina ivonataweku na tuna vonavaghata wawayina. Ma aviyavisina gwabinai aiyanei na tuna kava wawaya avonavonesi.”

27 Ma ti damsi na ke itakovi da ina Mamai ivivi sisiyei. 28 Tuna kubiine Yesu ivona bo, “Taku Wawaya Natusi kona voepiiku na konakovi da taku iyai. Ma ke taku mani aku kayowana ata beraberai, ma aku Mamai ikikava ivi beyebeyeku na nakanani aisisiya. 29 Wawayina ivonataweku na gwabikuwai. Ke ita kuyoweku, iyamna ina kayowana aberaberai.”

30 Yesu weni sisiyisi itereterei na wawaya peyarisi i vitumaghana kurina iterei.

31 Ma Jiu damsi iyavo kava Yesu ivi tumaghanei na ivonesi bo, “Aku vibeyebeyena kona votekatekei na tami na kaku kivikivina vaghata. 32 Vonavaghata konakovi na nani vonavaghatina gabura kamonai ina votawemi.”

33 Ma Jiu babadisi ivonapotei bo, “Tokai na Abraham tupurereghina. Ma ke meyani ita patumikai bo kati sleiv. Avi kubiine kuvona da ita votawekai?”[f]

34 Ma Yesu ivonapotesi bo, “Vonavaghata avonavonemi, tam iyai berabero keberaberai na am bera beroberosi ipatumim da kuvi sleiv. 35 Ma takovi da wawaya natuna ina rakaraka kamosiyai na ina gawara mara nonowa emakamakai. Ma sleiv na ke ina makii nonowa nani rakarakana kamosiyai, iyamna ke ina rakaraka vaghata. 36 Ma Wawaya Natusi ini yawasimi ma ina votawemi na ina votawe tuwanonowimi. 37 Akovi da tami na Abraham tupurereghina. Ma ke mara gurina na koni raboboku, iyamna aku sisiya ke kota vivitumaghanei. 38 Aviyavisina aku Mamai ivi debei kuriku na avonavonemi, ma tami na aviyavisina ami mamai gwabinai kovi yanei na koberaberai.”

39 Ma ivonapotei bo, “Akii mamai na Abraham.”

Ma Yesu ivona bo, “Mikeda tami Abraham tupurereghina na aviyavisina Abraham iberai na nani berasi kota beraberai. 40 Aviyavisina God gwabinai avi yanei na vonavaghata ma tuna avonavonemi. Ma kegha da tami kokayokayowei da kona kiivunuku. Ma Abraham ke nakanani ita berai. 41 Ikikava ami mamai berabero eberaberai na tami bade nakanani koberaberai.”

Ma ivonapotei bo, “Tokai na ke deba wawaya. God ina kina kava na akii Mamai ma tokai na natunatuna vaghata.”

42 Ma Yesu ivonapotesi bo, “Mikeda God na ami Mamai na nuwanuwaku kota viiya, iyamna God gwabinai apisi, tuna ivonataweku. Ma ke taku mani aku kayowanai ata pisi. 43 Avi kubiine aku sisiya ke kota viviyanei? Iyamna na weni. Tami ke ruvaruvami da aku sisiya konakova bubuni. 44 Tami ami mamai na Devil, ma kokayokayowei da tuna ina kayowana kona berai. Dobu karenai da ku karako, tuna na kiivunuwa wawayina. Ma bade vonavaghata ke ita kayokayowei, iyamna vonavaghata gwabinai kegha. Maranai ini bero na tuna ina yawasa vaghata ekivikivini, iyamna tuna na viviberona, ma tuna na vibero ina mamai. 45 Ma taku na vonavaghata aisisiyei tuna kubiine ke kota vivitumaghaneku. 46 Kamomiyai wawaya sago kovokovoghina da ita vona da taku berabero aberai bo kegha? Ke kovokovoghina. Vonavaghata avonavonemi ma avi kubiine ke kota vivitumaghaneku? 47 Iyi God rapenai na God ina sisiya iyanei. Ma tami na ke God ina wawaya, tuna kubiine ke kota viviyana.”

48 Ma Jiu babadisi Yesu kurina ivona bo, “Vonavaghata kavonavonei da tam na Sameriya wawayim ma kanuma berona gwabimuwai irunuma.”

49 Ma Yesu ivona bo, “Kanuma berona ke gwabikuwai. Ma taku na aku Mamai avovokaravei. Ma tami na kokiikiiviberoku. 50 Ke taku mani kaku vigheghena atekwekwai ma wawaya sago ina kayowana da wawaya ini ghegheniku. Ma tuna na vitupavira badana ma ina nota na maninina kavakava. 51 Ma vonavaghata avonavonemi da wawaya iyai vonaku ina votekatekei na tuna rabobo ke ina panani.”

52 Ma Jiu damsi ivonapotei bo, “Wekarakava kakovi da tam kanuma berona itowatepanim. Abraham irabobo ma bade peroperoveta nakanani. Ma tam kuvona da wawaya vonam ina votekatekei na rabobo ke ina panani. 53 Akii mamai Abraham kughekuyowei bo? Kegha taweyana. Ma tuna irabobo ma bade peroperoveta nakanani. Ma tam na iyai?”

54 Ma Yesu ivonapotesi bo, “Mikeda taku mani ati gheghena meyeku da kaku kadara ita rakata na nani vigheghenina na iyamna kegha. Aku Mamai, tuna kava ini ghegheniku. Ma tami na kovonavonei da tuna na ami God. 55 Ma kegha, tami God ke kotakovi, ma taku na akovi. Mikeda ata vona da ke atakovi na taku wawaya viviberoku nakanani ma tami. Ma taku God akovi, tuna kubiine vonana avovotekatekei. 56 Ami mamai Abraham ivi nuwabiibii kirakai da mara sago aku nekiibau marana ita kitai. Ma ikitai na ivi nuwabiibai.”

57 Ma Jiu damsi ivonei bo, “Tam karakava kam madegha ini 50 ma kuvona da Abraham kukitai.”

58 Yesu ivona bo, “Vonavaghata avonavonemi muriyai da Abraham ita tupuwa na taku namada amakamakai.”

59 Weni sisiyina kubiine wakima iyuna da ita ravi, ma Yesu koroto kamonai ionagha da Taparoro Numana garina ikiibutawei inae.

<- Jon 7Jon 9 ->