1 God, Nowa ma ghamoghamo peyarisi waka kamonai inotanotisi. Ma yanunu ivonatawei da ivosisina ma okowa ivi karei da iororu. 2 Ma namada dowiyai vusira igudupotapota ma iberai da kunumai garewakatuna ivoterei. 3 Ma okowa na mara 150 kamonai nuwatuwai iororu. 4 Kutukutuva ivi karei inenae da nawaravi miikovi murinai na waka Ararati koyana ku tepana ivi kiikenei. 5 Okowa patana iororu da nawaravi kana vi 10 ina karena na koya vovosi irumatara.

6 Garewa ikatuna ikovi murinai, Nowa ikoyagha da mara 40 ikovi ma waka tarabogina kana gudu ivotawei. 7 Ma oghogha ivonatawei ikiibau ma ke ita vovira. Irovorovo yawara ma ivivi koyakoyagha da okowa ita mamaghatawei. Ma Nowa, oghogha ikoyagha kavai. 8 Ina kayowana da akova ita viiya da okowa ioru da imapatana, tuna kubiine bade gabubu ivonatawei inae. 9 Ma kegha, okowa patana da dobu ikiimumui da gabubu gawara iekwa kavai da iti yakam. Irovo ivovira ku waka ma Nowa ivororona da iviiya, ma itereruwei ku waka. 10 Ivi koyakoyagha da mara 7 ikovi ma gabubu ivonatawe meyei. 11 Raviyai ivovira kurina ma mutunai na oliv kiina ruguruguna matina ikaratani. Nowa nani ruguruguna ikitai na iakovi da okowa namada ioru kirakai. 12 Ivi koyakoyagha da mara 7 ikovi na gabubu ivonatawe meyei. Ma ke ita vovirame kurina, ine vaghata.

13 Nowa kana madegha 601 ma nani madeghina karenai okowa imamaghatawei. Waka kana tarasovo ivotawei ikitavirevire ma ikitai da dowa ivovokanakana. 14 Ma mara kana vi 27 nawaravi kana viruwa kamonai na dobu kudubina ikanakana tuwanonowa.

15 Vaghina ma God, Nowa ivonei bo, 16 “Tam kawam yavata ma natunatum ere kakawasi na waka kokiibutawei. 17 Ma bade ghamoghamo waka kamonai, kiu, ghamoghamo manamisi, siya dipa ma dowatetetesi na peyarina kerutinakiibuwesi. Ina kiibau da ini tuwa ma ina peyari kirakai dobuwai.”

18 Ma vaghina, Nowa kawana yavata ikiibau, ma natunatusi ere kakawasi na peyarisi waka ikiibutawei. 19 Ma bade ghamoghamo manamisi, siya dipa, dowatetetesi ma kiu na peyarina ere kii nevaneva waka ikiibutawei.

20 Nani murinai Nowa wakima ivi daburi da suwara kana kema iyamoni. Ma meni ghamoghamosi ma kiusi Bada ivi vaghinei da suwara kubiine na kamosiyai viya iviinisi ma ivunuwa da suwara kana kema tepanai ikapuna, Bada God kurina isuwara. 21 Bada suwara ghabuna iyoni ma nuwanuwana iviiya ma ivona bo, “Ke meyani dobu animaga meyei wawaya i berabero kubiine. Akovi da gegeyai da i ku rabobo na i nota didibarisi emakamakai. Akovi ma namanaki, ke meyani da bera yavu yawayawana ana kiipupuna meyei.