1 Kenota bogai, karako da ku mara damona na berabero ina rakata. 2 Nani kamonai na wawaya gwabisiyai notameyena ina rakata, mura ina matamatighei, ina kayotata ma ina voepepa meyesi. Viavabero ina rakata, wawaya i maduwa da i mamai ke ina vopepetisi, ma iyavo kava ini vitesi na ke ini kiikiiwesi, ma i yawasa na ke vovokaravina. 3 I nuwaviina kegha, notatawena gwabisiyai kegha, wawaya ini avaberowesi. Ti na kayoghakighakisi, kayakayayisi, ma biibiina ini tupaketowanei. 4 Ti mani turaturasi ma ini beroberowesi. Ti na nuwatekatekasi da yaghiyaghinai bera beroberosi ma neghaneghasi ini karei. Ti na kayovigesirosi. God nuwanuwana ke ita viiya ma tupuwa ina kayowana nuwanuwasi ivii kirakiiyei. 5 Ini taparoro ma ina berai da ti nakanani ma Keresiyana ma kegha, i vitumaghana na kwebuna, ma God ina rewapana ina tatakuputei. Nani wawayisi na kekitatawesi. 6 Wawayisi kamosiyai na viya ina nae wawaya i ku numa da wivine notapekupekusi ini nuwatinisi da i kayowana ina berai. Nani wivinesi ti mani i bera dowadowasi vitana damina eviiviiya. Ma nota magura gwabisiyai kegha ma bade tupuwa ina kayowana beroberosi ibadesi da berabero eberaberai. 7 Wivinesi na mara nonowa i kayowana da vibeyebeyena ini yanei ma kegha da sisiya vaghata damina ke meyani ita viiya. 8 Iyavo kava weni berasi eberaberai na ti nakanani ma Janes ma Jambaras,*Janes ma Jambaras na kiivavo Pero ina kasiko wawayisi. Exod 7:11 rorova mara katamaninai Moses ivi ghaviyei. Ma bade nani vibero damsi na sisiya vaghata ighaviyei. Ti na nota biibiisi gwabisiyai kegha ma i vitumaghana na kwebuna. 9 Ma aviyavisina eberaberai na ke mara gurina, iyamna ina rudeba da bera neghaneghasi eberaberai. Nakanani itupuwa Janes ma Jambaras kurisi.

10 Karako na aku vibeyebeyena kuakovi, aku yawasa, avi kubiine abigabiga, aku vitumaghana, aku nuwanuba, aku nuwaviina, ma ikikava amiirikikina da aku nota kudubinai biga ke ata voterei, 11 ikikava wawaya ivi tupaketowaneku ma bade aku vokwarakwara. Tam kuakovi aviyavisina kuriku itupuwa Antiyok, Aikoniyam ma Listra kamonai. Nani dobusiyai na wawaya ivi tupaketowaneku da berona ghamanakina apanani. Ma kegha da weni berasi kudubina kamonai Bada ivi yawasiku.*Apos 13:14-52, 14:1-7, 8-20 12 Vona bubuna da iyavo kava Keresiyana yawasina makiina ina kayowei ma Yesu Keriso yavata ini nuwasago na karakava vitupaketowana ina panani. 13 Ma vibero damsi na i vibero ina rakata kirakai da turaturasi ina viviberoberowesi ma bade turaturasi ina vomiiri da vibero damsi ini beroberowesi ma mara nonowa ina viviberovivirana. 14 Ma tam, aviyavisina kavi beyebeyena kurim da kuvi tumaghanei na kevotanakikini. Kuakovi da am vibeyebeyena wawayisi na tokai. 15 Ma kenotanotai da gisimuwai giruma vovokaravisi kuakovi na nota iverem ma ivi nowem da Yesu Keriso kuvi tumaghana bubuni da ivi yawasim. 16 Giruma vovokaravisi peyarina na God gwabinai ipisi ma nani girumisiyai wawaya tibeyebeyesi, tayeghisi, tatupavimaninisi, ma bade tiakovisi da ikikava yawasa maninina kamonai ina makai. 17 Weni nakanani taberai da God ina wawaya tivitesi, tavovunaghisi da bera biibiisi kava ina berai.

<- 2 Timoti 22 Timoti 4 ->