Pa'palakoanna Suho 2

Katuhunganna Penaba Maseho

2:1-13

1 Tappana lambi' allo kasalle Pentakosta, ma'hempummi indo ingganna to matappa'um dio mesa ongeam. 2 Pissananna nahingngim moni susi uhhunna hibu' kasalle tuhum yabo mai langi' umponnoi indo banua naongei tadongkom ma'hempum. 3 Iya naitaim titantam api susi lila tungga' uhhampoi indo tau illaam banua. 4 Silele dipatamai Penaba Maseho nasuhum manähä asam umpake ma'hupa-hupa basa situhu' kada napalosaiam Penaba Maseho la napotula'.

5 Dio Yerusalem eta too tohho to Yahudi buttu dio mai ma'hupa-hupa botto illaam inde lino. Tau ia too si untuhu'i si'da-si'da Puang Allataala. 6 Nahingnginna tau buda indo moni ma'uhhum, ma'silullu' siaham sule sisippi'-sippi'. Sangngim pusa' aka tungga' uhhingngi basana napake indo ingganna to matappa'um ma'kada-kada. 7 Sangngim pilla' lambi' sipa'tula'-tula' naua: “Taia haka tia to Galilea inde lako ma'kada-kada? 8 Maaka hia susi anna malai tungga' uhhingngikia' basata napotula'? 9 Susinna kitaa' to Partia, to Media, to Elam, issinna Mesopotamia, Yudea anna Kapadokia, Pontus anna Asia, 10 Frigia anna Pamfilia, Mesir anna lembäna Libia sikahuku' Kirene; anna to sule dio mai Roma 11 (susi to Yahudi teem to mentama peadasanna to Yahudi), to Kreta anna to Arab; tahingngi asammia' ma'kada-kada situhu' tula'taa' si mesa-mesa diona kaha-kaha memängä-mängä napogau' Puang Allataala.” 12 Sangngim pilla' anna mängä-mängä napasindum sipa'tula'-tula' naua: “Aka hia kalembasanna indea'i?”

13 Sapo' deem siam duka' tau piha mantelle-telle naua: “Inde lako tau mäbo'i aka buda sugali' anggur naihu'.”

Pa'tula'na Petrus

2:14-40

14 Sapo' tappa ke'de' Petrus sola indo to sapulo mesa solana napekasallei ma'kada naua: “O to Yahudi anna inggannakoa' issinna Yerusalem, pengngissanniia' anna umpaillaam penaba manappaia' inde kadangku. 15 Inde mai tau tä' tia mäbo' susi passangaimmua' aka temo mane tette' kaseha mebengngi'. 16 Sapo' iam too indee indo puha napa'paissangam Puang Allataala napalombum nabi Yoel naua:

17 ‘La dadi illaam allo ma'katampasanna susim too kadanna Puang Allataala:

La kutolloi Penaba Maseho ingganna hupatau,

nasuhum pessubummua' la umpalombum kadangku.

Susi duka' lako ingganna to mangnguhammua' la kulipi,

anna mala naita indo kaha-kaha la kupaitai.

Anna lako ingganna tomatua ulummua' la si kupalosai illaam tindo.

18 Susi duka' ingganna sabua'ku muane anna baine,

la kutolloi Penaba Maseho illaam allo ia too

anna umpalanda'i ingganna kaha-kaha indo la kupaissanniam.

19 Anna la kupadadi buda tanda memängä-mängä yabo langi'

anna ma'hupa-hupa tanda illaam lino

susinna haha, api, sola hambu pelamboho.

20 La pi'de mata allo lambi' la malillim pättä

anna bulam la malea susi haha

anna mane lambi' allo kasuleanna Debata.

Allo kasalle ia too la ponnom pole' kamatandeam.

21 Menna-menna mengkaala längäm Debata illaam wattu eta too,

iam too to la untahima kasalamasam.’[a]

22 O inggannakoa' to Israel, patananniia' talinga inde kadangku: Indo to nahua inde tula'ku Puang Yesus to Nazaret, mesa to natuho Puang Allataala. Aka umpogau' ma'hupa-hupa tanda illaam alla'-alla'mua' kahana kakuasaanna Puang Allataala anna nakamängä-mängäi asam ingganna hupatau susi puha muissanna'. 23 Ia toi puha dibeengkoa' anna umpebeenna' dipatei yabo kaju sitambem nakähä to kadake gau' situhu' pattujunna Puang Allataala. 24 Sapo' napatibangom anna nalappasam Puang Allataala dio mai kamateam aka tä' Ia la mala nataloi kamateam. 25 Aka puha natula' loppo' Daud tula'na Puang Yesus naua:

‘Puang Allataala liu kupahandam

anu' ia passappi' matoto'ku dio tandai kanangku,

nasuhum tä'ä' la mala tige'ge'.

26 Nasuhum ponno kakassiam illaam penabangku

anna lemba' katilallasam dio pudu'ku,

susi duka' bätä puntingku la masannam anna ponno pahhannuam

27 aka tä'ko umpäbäi sungnga'ku la tohho illaam kamateam,

anna tä' toi la umpäbäiä' Kao inde To Masehomu la bosi.

28 Iko puha umpatuhoiä' lalam lu lako katuboam sule,

anna tiala inabangku aka Iko tontä umpasolaiä'.’[b]

29 Dadi inggannakoa' solasubungku, kupassubungangkoa' issi penabangku untula' diona Daud nene to taponene puham mate anna puha dilamum, anna ku'bu'na da'da' liupi taitaa' sule lako temo. 30 Sapo' indo Daud mesa duka' nabi, dadi naissam naua puha ma'pinda Puang Allataala la napatadongkongam mesa pessubunna la untadongkonni okkosam kahajaanna. 31 Puha naissam Daud aka la napogau' Puang Allataala lambi' natula' loppo'um diona katuboanna sule To puha dilanti' la mepasalama'. Indo anna natula'i inde naua:

‘Aka tä' Ia la napäbäi tohho illaam kamateam

anna tä' duka' la bosi bäbä.’[c]

32 Puang Yesus-um too indo napatibangom sule Puang Allataala anna kami'um too to ussa'bii. 33 Anna naäkä'um Puang Allataala untadongkonni ongeam kamatandeam sola kakuasaam nabeem Ambena anna untahima Penaba Maseho indo puha didandiam. Iam too natolloam yabo mai, indo puhaa' taita anna tahingngi. 34 Aka taia Daud längäm suhuga sapo' Daud dia ma'kada naua:

‘Ma'kada Puang Allataala lako Debatangku naua:

Okko'ko dio tandai kanangku

35 sule lako wattunna la kupadadi pehhondoammu ingganna balimmu.’[d]

36 Dadi pahallu muissam si'da-si'da inggammua' to Israel muua indo Puang Yesus to puhaa' umpatei yabo kaju sitambem naäkä'um Puang Allataala mendadi Debata anna To puha dilanti' la mepasalama'.”

37 Tappana nahingngi kaha-kaha ia too tappa tillä'bä' buana ingganna tau to dio heem lambi' mekutana lako Petrus anna ingganna solana naua: “Akam la kipogau'?”

38 Natimba' Petrus naua: “Tihokongam asangkoa' gau'mu ammu behoia' kalemu ditedo' sola sanganna Yesus Kristus anna mala diampunniangkoa' dosamu anna la nabeengkoa' Penaba Maseho Puang Allataala. 39 Aka ikonna' too sola pessubummu anna ingganna tau taianna to Yahudi nahua pa'dandiam ia too. Anna la budapi tau natambai situhu' pattujunna Puang Allataala.”

40 Iya budapi tula' senga' napakaingasam indo tau buda anna napa'sule-sulei napakilala naua: “Äläikoa' kalemu illaam mai alla'-alla'na inde mai to kadake gau' anna malakoa' salama'.”

Pa'palakoanna jumaa' uhu-uhuna

2:41-47

41 Ingganna to untahima indo tula'na Petrus umbeho asam kalena ditedo', lambi' allo eta too kehängäm to matappa' kiha-kiha tallu sa'bu tau budanna. 42 Iya sangngim manontom muanda'i pepa'guhuanna suhona Puang Yesus, anna tontä liu umpasakalebu kalena. Anna si ma'mesa liu dio mesa ongeam umpiä'-piä' hoti naande pada-pada anna ma'sambajam.

43 Mahea' asam ingganna to dio heem tappana muita buda tanda memängä-mängä anna ma'hupa-hupa tanda napadadi Puang Allataala nakähä suhona. 44 Anna ingganna indo to matappa' tontä liu ma'mesa anna ingganna aka-akanna naampuam pada-pada. 45 Susi toi ke deenni to umbalu' aka-akanna nataba-taba indo allinna lako solana situhu' kapahalluanna si mesa-mesa. 46 Sola kamanontongam umpamesa penaba si ma'hempum allo-allo illaam Banua Debata anna umpasibala'-bala' banuanna naongei umpiä'-piä' hoti anna mangngande pada-pada sola katilallasam anna sakalebu penabanna, 47 napasindum umpuji sanganna Puang Allataala. Napohäe asam tau anna allo-allo tuttuam buda aka nahängänni liu Puang Allataala bilanganna to la salama'.

<- Pa'palakoanna Suho 1 Pa'palakoanna Suho 3 ->