1 Xomxo wê vông i vin Yesu pyap lêc vông vinên wê he vông ge gên o vô xêkɨzêc lec lêm ge, od xam vông he lam dô vac xam mahɨgun, dɨ xam o lêc ngaênma lec kɨyang yaya wê xomxo tigee vông ge lêm. 2 Ên xomxo ya vông i vin xêkɨzêc om he xovô ên he nêbê susu yaên vɨhati ge nivɨha tɨyi wê he ob ya ge. Lêc xomxo wê vyac xovôên xolac ma ge, he vɨbu nêbê he ob ya bwoc lɨyôhô lêm. 3 Om xomxo wê mi ya susu yaên vɨhati ge, he i o lêc yê xomxo wê mi ngɨbua bwoc lɨyôhô ge nipaên lêm, dɨ xomxo wê mi ngɨbua bwoc ge, he i o lêc yê xomxo wê mi ya susu vɨhati ge dɨ nêl bê he vông i so lêm, ên Anutu kô he ge êno la tu ixe. 4 Bêna lêc xam nêb xam ob vông kɨyang vô xomxo ngwe nue yuacê? Xomxo tigee, Apumtau tu he nên levac om obêc yaxên môp wê he vông ge dɨ nêl bê tɨyi me tɨyiên ma. Lêc môp wê he vông ge obêc tɨyi, ên Apumtau vaci ob ngɨdu he xôn dɨ vông he le xêkɨzêc.

5 Xomxo ya nêl ên he nêbê buc ya levac i luu buc baba vêl, dɨ xomxo ya nêl ên he nêbê buc vɨhati ge tɨyima. Om xam toto yaxên lê, dɨ xam vyac xovô môp wê xam ob tɨmu vô ge dɨ hôm xôn pɨlihi mɨ i yêp vac xam pɨyôp. 6 Ên xomxo wê vɨnoo buc ya nêbê buc ge levac ge, he vông ên he nêbê he ob pɨmil Apumtau lec buc tige. Dɨ xomxo wê mi ya susu yaên vɨhati ge, he vông ên nêbê he ob pɨmil Apumtau lê om he pɨmil Anutu ên yaên vɨhati dɨ ya. Dɨ xomxo wê mi ngɨbua yaên ya ge, he vông ên he nêb he ob pɨmil Apumtau, om he êno pɨmil Anutu ên yaên wê he mi ya ge.

7 Il ob xovô bêga bê il obêc dô madvɨha ge od il o xovô icil va lêm, me il obêc xib ge od il o xovô icil va lêm. 8 Ên buc wê il dô madvɨha ge od il ob vông Apumtau lê i vô levac, dɨ il obêc xib ge od il ob vông Apumtau lê i vô levac hɨxôn. Om il obêc dô madvɨha me il obêc xib ge od il ob tu Apumtau xe. 9 Ên Kɨlisi yib dɨ kɨdi lec mavɨha om kehe bêga nêbê tu xomxo wê dô mavɨha hɨxôn he wê yib ge nên Apumtau.

10 Bêna lêc xam yaxên môp wê lime vông ge dɨ nêl ên xam nêbê tɨyiên ma, dɨ bêna lêc xam wê lime ya nipaênê? Ên il vɨhati obêc la le vô Anutu manôn dɨ ici va ob yaxên môp wê il toto vông ge. 11 Tɨyi xocbê kɨyang wê Apumtau nêl dɨ i yêp vac xolac bêga nêbê,

13 Om il ob sea môp wê il ob xê lige ngwe tɨyiên ma ge, dɨ il ob xovô môp bêga bê môp wê ob vông lige sea vông vinên wê he vông ge dɨ vông he la vac môp wê he yê nêbê nipaên ge, il ob vông môp tibêge lêm. 14 Apumtau Yesu vông xovôên vô a om a xovô ên a nêbê yaên ti o nipaên tɨyi wê ob vông il vô nipaên ge lêm. Lêc xomxo ti obêc yê susu yaên tɨyi xocbê nipaên ge od ob ya lêm, ên obêc ya ge od obêc vông i vô nipaên. 15 Om ông obêc wa yaên ti wê lim tige ngɨbua ge od obêc vông lim tige nɨlô vô vɨyin, om môp wê ông vông ge o tɨyi xocbê ông xêmyaa vin lec lim tige lêm. Kɨlisi yib ên xomxo tige hɨxôn, om xam viac xam ên yaên wê xam mi wa ge, êdêc yaên i o lêc vông lim tige i vô nipaên lêm. 16 Om môp wê xam wê ên xam nêbê nivɨha ge, xam viac xam êdêc xomxo i o lêc yê môp tige nipaên lêm. 17 Ên môp wê il tu Anutu nue dɨ la vac i kwa ngɨbi ge, kehe o yêp vac yaên yuu numên lêm. Nge, kehe bêga nêbê il dô vac môp nivɨha yuu kɨyang malehe dɨ xêyaa nivɨha wê Myakɨlôhô Ngɨbua vông ge. 18 Om xomxo obêc tu Kɨlisi nue yuac dɨ dô vac môp tigee ge od Anutu ob yê he nivɨha dɨ xomxo êno ob pɨmil he.

19 Mêgem il ob tɨmu vô môp wê xêyaa vin lec maên ge dɨ dô vac kɨyang malehe nɨlô, dɨ il ob ngɨduma xôn vac vông vinên. 20 Om yaên wê xam mi wa ge i o lêc vông yuac wê Anutu vông ge i vô nipaên lêm. Vɨxôhɨlôg, yaên vɨhati ge nivɨha tɨyi wê il ob xa ge, lêc yaên wê xam mi wa ge obêc vông lime la vac môp wê he yê nêbê tɨyiên ma ge od môp wê xam vông ge, xam vông i so. 21 Om il ob tɨmu vô môp bêga bê il ob xa bwoc me il ob num wain me il ob vông môp vae vae, lêc môp tigee obêc vông lige nɨlô vô vɨyin ge od il ob sea môp tibêge i loc yêp xel dɨ vôngên i ma. 22 Om môp yaên yuu numên yuu bêge, xam toto xovô môp wê xam ob tɨmu vô ge, lêc môp ge ông sea i loc vô Anutu vaci. Ên xomxo ti obêc tɨmu vô môp wê yê nêbê nivɨha ge, dɨ nɨlô yuu pɨyôp obêc vông kɨyang vô i lec môp tige lêm ge od xomxo tige ob dô hɨxôn xêyaa nivɨha. 23 Lêc xomxo ti obêc ya yaên ti hɨxôn nɨlô yuu ge od ge vông i so, ên xomxo tige o ya hɨxôn nɨlô tibed lêm. Nge, ya hɨxôn xonaên. Ên môp wê xomxo nêb ob vông ge, he obêc vông hɨxôn nɨlô yuu ge od ge nipaên.

<- LOM 13LOM 15 ->