1 Om a ob kɨnêg vô xam bêga bê Anutu ngɨloo i nue Islel vɨhati vêl, me? Ma vêl. Xam wê lê. A ga, a êno xomxo Islel ti wê a pum lec Eblaham dɨ a kehe yêp vac Bensamin. 2 Anutu o ngɨloo nue Islel wê vɨnoo he ilage lêm. Kɨyang wê Ilaija nêl vô Anutu mɨ i yêp vac kɨpihac xolac ge, xam mêd lungên, me? Ên Ilaija kɨtaa vô Anutu dɨ nêl lie Islel nên nipaên kɨtong bêga ên nêbê, 3 “Apumtau, he hi ông nume plopete yib dɨ dii ông alta wê ob si daa lec ge vêl. Lêc a tibed gên dô om he myag a ên nêb ob hi a xib.” 4 Dɨ Anutu nêl kɨyang tina vô Ilaija? Anutu nêl vô i ên nêbê, “O ôcông tibed lêm. Ên a nuge 7,000 gên dô wê a vɨnoo he pyap ge wê he o yev vɨxa kɨtu vô anutu mayibên Bal ge lêm.”

5 Om môp tibêge yêp gwêbaga hɨxôn, ên gwêbaga he Islel vɨwen dô wê Anutu nue ge, ên Anutu xo vɨgwe pɨsiv ên he dɨ vɨnoo he. 6 Lêc Anutu o vɨnoo he ên yuac nivɨha wê he vông ge lêm. Nge, ici va vɨnoo he tɨyi xocbê vông vɨzid pɨleva vô he ge. Ên Anutu obêc vông vɨzid vô he lec yuac nivɨha wê he vông ge od obêc tɨyi xocbê he kɨsuu ya yuac nivɨha wê he vông ge. Lêc o ngwe bêge lêm. Nge, Anutu vaci vông pɨleva vô he.

7 Om il ob xovô bêga bê xomxo Islel myag môp wê Anutu ob yê he nivɨha lec ge, lêc he o tulec lêm. He vɨlu bed wê Anutu vɨnoo he ge, he tulec. Dom he tɨbeac vô nɨnya kɨtu vô Anutu kɨyang, 8 tɨyi xocbê kɨyang wê yêp vac xolac bêga nêbê,

11 Xomxo Islel o vông i vin Yesu lêm, om tɨyi xocbê he tô mɨ la, om a ob kɨnêg vô xam bê he ob tô mɨ la dô xel, me? Ma vêl. Ên he pwoo kɨyang vac, om Anutu vông vɨzid la vô tɨbii ba dɨ vô he vêl ên he nên nipaên. Mêgem xomxo Islel obêc yê vɨzid nivɨha wê Anutu vông vô tɨbii ba ge od obêc vông he nɨlô yen yetac dɨ he ob lôm vô Anutu. 12 Xomxo Islel pwoo kɨyang vac, mêgem Anutu vông vɨzid levac la vô tɨbii vɨyang vɨyang, om he Islel vɨhati obêc pɨlepac he dɨ lôm vô Anutu ge od Anutu ob vông vɨzid levac lax mɨ la vô he vɨhati luu vêl.

13 A ob nêl kɨyang ti vô xam wê xam o Islel lêm ge. Anutu vɨnoo a nêb a nêl xolac vô xam wê o Islel lêm ge, om a xêgyaa nivɨha ên yuac tige, 14 ên a nêb mêd a lige Islel ob yetac ên vɨzid wê xam kô vô Anutu ge dɨ he ya ob pɨlepac he dɨ lôm vô Anutu ên i ngɨdu he xôn. 15 Anutu ngɨloo Islel vêl dɨ la vô tɨbii ba ên nêb he i tu i nue, om Anutu obêc vông he Islel lax tu i nue nang ge od obêc tɨyi xocbê Anutu tɨpi vô he kɨdi lec mavɨha vac yibên.

16 Xomxo ti obêc kô blet nipwo ti mɨ la kɨtaa lec ge od blet vɨhati ge tu Anutu xe. Dɨ xomxo ti obêc kô xax ngɨlôhô ti mɨ la kɨtaa lec ge od xax ngen vɨhati ge tu Anutu xe. Kɨyang tige nêl lec xomxo Islel, ên Anutu nêl vô Eblaham ilage nêbê i tu ixe, om Eblaham bue tɨvae ob tu Anutu xe hɨxôn.

17 Dɨ a ob nêl kɨyang pɨlepacên ti lec xax oliv. Ên xomxo Islel ge tɨyi xocbê xax oliv wê Anutu vaci tung he ge, dɨ xam wê xam o Islel lêm ge, xam tɨyi xocbê xax oliv wê vɨmen ge. Mêd Anutu xoo ngen ya vêl ên xax wê ici va tung ge, dɨ la kô xax ngen wê vɨmen ge dɨ lam yev lec dɨ ku xôn. Om xam dô dɨ kô vɨzid wê xomxo Islel vông ge tɨyi xocbê xax ngen kô hɨzi vô xax yatôv ge. 18 Om xam o lêc wê ngen wê Anutu xoo vêl ge nipaên lêm, dɨ xam o yong xam lêm. Ên xam ge ngen pɨleva dom xam o viac xax ngɨlôhô lêm. Nge, xax ngɨlôhô viac xam.

19 Lêc mêd xam ya obêc nêl bêga bê, “Xe ga, Anutu xoo ngen ya vêl ên nêb ob yev xe la le vac he nipɨlêhê.” 20 Xam nêl vɨxôhɨlôg, ên Anutu xoo he Islel vêl ên wê he o vông i vin lêm ge dɨ yev xam la le vac he nipɨlêhê ên wê xam vông i vin ge. Lêc xam o lêc yong xam lêm. Nge, xam viac xam dɨ xona nêm. 21 Ên Islel ge tɨyi xocbê ngen wê nôn ge, lêc Anutu o vông he le lêm. Nge, xoo he vêl. Om xam obêc sea vông vinên ge od Anutu obêc vông xam le lêm. Nge, obêc xoo xam vêl hɨxôn êno. 22 Om xam wê lê. Anutu ge wê ob vông vɨzid vô xomxo dɨ obêc vông myavɨwen nipaên vô xomxo êno. Om xomxo wê vông môp nipaên ge, Anutu ob vông myavɨwen nipaên vô he, lêc xam mô ge, Anutu vông vɨzid vô xam. Om xam dô vac vɨzid tige nɨlô, ên xam obêc sea ge od Anutu obêc xoo xam vêl. 23 Dɨ xomxo Islel obêc pɨlepac he dɨ vông i vin ge od he ob lax le vac xax tige i tii vac, ên Anutu tɨyi wê ob yev he lax le vac nipɨlêhê ge. 24 Xam tɨbii ba, ilage xam dô tɨyi xocbê xax oliv wê vɨmen ge ngen, lêc Anutu xoo xam vêl dɨ yev xam le vac xax xumac wê xam o le vac ilage lêm. Om Anutu tɨyi wê obêc kô Islel wê xoo vêl ge mɨ lax yev vac xax oliv wê he le vac ilage.

25 Xam lige, kɨyang wê yêp xôpacên ilage, a nêb a ob nêl kɨtong vô xam, êdêc xam o lêc yong xam dɨ nêl bê xam xovô kɨyang vɨhati lêm. Om kɨyang wê yêp xôpacên ilage bêga nêbê, xomxo Islel vô nɨnya kɨtu vô Anutu kɨyang, dɨ obêc mɨla vô buc wê tɨbii ba tɨbeac obêc pɨlepac he mɨ la vô Anutu ge od Islel vông môp wê vô nɨnya kɨtu vô Anutu kɨyang ge obêc tip la vô buc tige, 26 dɨ Anutu obêc vô he Islel vɨhati vêl. Tɨyi xocbê Anutu vya wê yêp vac xolac bêga nêbê,

33 Pɨyôp yuu xovôên wê Anutu vông ge, levac mabu luu vêl. Xomxo ti o tɨyi wê ob xovô pɨyôp wê Anutu vông ge kehe lêm, dɨ ti o tɨyi wê ob xovô môp wê i vông ge kehe êno lêm. 34 Tɨyi xocbê kɨyang wê yêp vac xolac bêga nêbê,