1 Gê vɨgwe Aikoniam Pol yuu Banabas vông i tɨyi wê yuu vông gê Antiok ge. Om yuu la vac xumac lɨlo wê he Yuda vông ge dɨ nêl kɨyang hɨxôn xêkɨzêc, om Yuda hɨxôn tɨbii ba he tɨbeac vông i vin Yesu. 2 Lêc he Yuda wê o vông i vin lêm ge nêl kɨyang vaxvax lec xomxo vông vinên om vông tɨbii wê o Yuda lêm gee he xêyaa vô nipaên vô xomxo vông vinên. 3 Mêd Pol yuu Banabas dô Aikoniam buc dia tya dɨ nêl Apumtau xolac hɨxôn xêkɨzêc, dɨ Apumtau vông xêkɨzêc vô yuu tɨyi wê yuu ob vông do levac toto ya ge, ên nêbê xomxo i yê dɨ xovô bê kɨyang wê yuu nêl lec xêyaa vin lecên wê Apumtau vông ge, kɨyang nôn vɨxôhɨlôg. 4 Lêc xomxo wê dô vɨgwe tigee hɨbu he la yuu, vɨlu vông i vin he Yuda dɨ vɨlu vông i vin sinale. 5 Mêd he Yuda hɨxôn tɨbii ba kɨdi lec hɨxôn lie levac, ên nêb he ob vông vɨyin vô Pol yuu Banabas dɨ nêx yuu ya ngɨdax mɨ yuu i yib. 6 Lêc yuu ngô wê he nêb ob hi yuu ge om yuu pec mɨ la Listla yuu Debi wê yêp vac vɨgwe levac Likionia ge, dɨ la vɨgwe wê yêp kwabo ge ya hɨxôn. 7 Mêd yuu nêl xolac vac vɨgwe tigee vɨhati.

8 Xomxo vux ti dô vɨgwe Listla, lêc ta kô i dɨ vɨxa vô xêlehelehe dɨ o mi vɨlee ti lêm. Mi dô kɨzêc. 9 Mêd xomxo tyo ngô kɨyang wê Pol nêl ge mêd Pol yê i xêkɨzêc dɨ xovô nêbê tyo vông i vin tɨyi wê ob vông i vô nivɨha lec ge, 10 om nêl vya levac ên nêbê, “Ông kɨdi lec mɨ le kɨsii.” Mêgem tyo kɨdi lec lutibed dɨ vɨlee mɨ la.

11 Tɨbii tɨbeac yê wê Pol vông xomxo tige vô nivɨha lec ge om he tyuc vac Likionia vya ên nêbê, “Anutu tu xomxo manôn dɨ lop mɨ lam vô il.” 12 Om he nêl he anutu kɨbun ga yuu lê lec Banabas yuu Pol, om nêl lê Sus lec Banabas dɨ nêl lê Hemis lec Pol, ên Pol ge wê mi nêl kɨyang tɨbeac. 13 Xumac ngɨbua wê Sus vông ge yêp kwabo vô vɨgwe tige nɨnya. Mêd xomxo wê mi si daa vô Sus ge ti la kô bwoc levac vux ya hɨxôn ngaola dɨ kô mɨ la vô vuayen ên xomxo nêb ob hi bwoc levac mɨ tung daa vô yuu. 14 Lêc Banabas yuu Pol ngô kɨyang tige om yuu nɨlô vɨyin dɨ yuu lêx ngakwi wê yuu vông ge sea dɨ tup mɨ la le vac xomxo mahɨgun dɨ nêl vya levac ên nêbê, 15 “Xamê, bêna lêc xam vông môp tibêge? Xii ga xomxo kɨbun ga xocbê xam ge. Lêc xii lam ên xii nêb xii ob nêl kɨyang nivɨha vô xam bê xam sea susu nôn maên tige dɨ pɨlepac nɨlôm i loc vô Anutu mavɨha wê tung lag yuu kɨbun dɨ gwec hɨxôn susu vɨhati yang ge. 16 Vɨxôhɨlôg, vô buc ilage xomxo vac vɨgwe vɨhati vông i tɨyi xovôên wê heche va vông ge, dɨ Anutu o le vac xôn lêm. 17 Lêc Anutu o xôpac ên xomxo dɨ vông he lungên i lêm. Nge, vông môp nivɨha vô il, xocbê vông lun lam gê kɨsii dɨ vông yaên vô nôn tɨbeac, om vông yaên tɨyi xam dɨ vông xam xêmyaa vô nivɨha.”

18 Yuu nêl kɨyang tige vô he, lêc he vô xêkɨzêc nêb he ob tung daa vô yuu, om yuu nêl kɨyang tige tii vac vac om he o tung daa vô yuu lêm.

19 Mêd Yuda ya lam gê Antiok yuu Aikoniam dɨ val pɨlepac xomxo nɨlô om he nêx Pol ya ngɨdax dɨ dɨdii i mɨ la vɨgwe nɨnyawehe ên he xo ên he nêb Pol yib. 20 Lêc xomxo vông vinên val le ngɨvina Pol dɨ i kɨdi lec dɨ lax vɨyangtôv, dɨ vɨgwe vɨdiiên ge yuu Banabas la vɨgwe Debi.

21 Yuu nêl xolac vô tɨbii Debi dɨ he tɨbeac vông i vin. Pyap dêc yuu lax mɨ la Listla yuu Aikoniam dɨ Antiok tii vac nang. 22 Yuu ngɨdu xomxo vông vinên xôn ya kɨyang dɨ nêl kɨyang xêkɨzêc vô he ên nêbê, “Xam le xêkɨzêc vac vông vinên dɨ xam o lêc sea lêm. Il ob kô vɨyin tɨbeac tax êdêc la dô vac Anutu ben tɨmuên.” 23 Mêd vac vɨgwe vɨhati yuu vɨnoo gyovɨxa wê ob viac xomxo vông vinên ge mêd yuu ngɨbua yaên dɨ kɨtaa lec he vɨhati ên nêb Anutu ti wê he vông i vin ge i viac he.

24 Pol yuu Banabas la vɨlee vac vɨgwe Pisidia dɨ la vac vɨgwe levac Pampilia 25 dɨ la nêl Anutu xolac vô tɨbii Pega. Pyap dêc loc mɨ la Atelia, 26 dɨ lec sip dɨ lax mɨ la Antiok. Antiok ge wê ilage xomxo vông yuu vac Anutu vɨgê nêb i viac yuu dɨ yuu vông yuac. Mêd yuu vông yuac tyo pyap om yuu lax mɨ la Antiok. 27 Yuu val Antiok mêd kɨtuc xomxo vông vinên dɨ nêl yuac vɨhati wê Anutu ngɨdu yuu xôn ge kɨtong vô he dɨ nêl hɨxôn ên nêbê, “Gwêbaga Anutu vông tɨbii wê o Yuda lêm ge he ngô xolac hɨxôn dɨ vông i vin.” 28 Mêd yuu dô buc ya hɨxôn xomxo vông vinên tigee.

<- SINALE 13SINALE 15 ->