MELKAHKA KAN 48

Saion, Kahnimw en Kohtz

1 KAUN-O me uhdahn lapalahpie oh warohng ale kaping

nan kahnimw en atail Koht, pohn sapwellime dohl sarawi. a

2 Saion, sapwellimen Koht nahna me ile oh kaselel;

kahnimw en nanmwarki lapalapo kin kaparanda sampah pokon.

3 Koht ketin kasalehda me mie wasahn ruk reh

nan kelen kahnimw wet.

4 Nanmwarki kan ehupenehr

oh kamwakidadahr mahwen kapilpene Nahna Saion.

5 Ahpw ni ar mahsanihadahr duwen kahnimwo, re inenen dahkihla;

re ahpw masepwehkada tangdoaui.

6 Re masepwehkada oh rerrerki ar pwunod mwuledek,

rasehngala lih liseian men me nektehn pahn neitik,

7 re rasehngala sohp akan me kin pwungupwungudekseli nan madau ni ahnsou en melimel kehlail.

8 Se patohwan rongehr dahme Koht ketin wiadahr,

oh met se kilangehr

nan kahnimw en at Koht, KAUN-O Wasa Lapalap;

e pahn ketin sinsile kahnimwet kohkohlahte.

9 Maing Koht, nan Tehnpasomwi,

se kin patohwan medemedewe sapwellimomwi limpoak poatopoat.

10 Wasa koaros aramas akan kin kapikapinga komwi,

oh kapingpomwi kipedier sampah pwon.

Komw kin ketin kakaunki ni me pwung;

11 tohn Saion koaros en nsenamwahula!

Komw kin ketin kadeik ni me pwung;

kahnimw en Suda kan en pil iang pereperen!

12 Kumwail sapwellimen Koht aramas akan, kumwail kapar pidahki Saion, oh wadekada wasa kehlail kan en kahnimw wet;

13 kumwail tehk mwahu kehl kan oh kasawih kelen mahwen kan,

pwe kumwail en kak patohwanohng dih en mwuhr kan:

14 “Koht menet, iei atail Koht kohkohlahte;

e pahn kin ketin kahluwa kitail erein ahnsou me pahn kohdo kan.”