19
Koulen Nsensuwed
1 KAUN-O ketin mahsanihong ie I en koulki koulen nsensuwed pwoatet ong soupeidi riemen en Israel:
2 Omw nohno iei laion lih men!
E apwalihada wah ko nanpwungen laion ohl kommwad ekei.
3 E apwalihada wah men oh padahkihong duwen eh pahn rapahki seike;
e ahpw wiahla sounsaik aramas.
4 Wehi kan ahpw rongada duwen laiono
oh lidipihedi nan pwoahr ehu.
Re ahpw kihong kehs oh ruwahdekilahng Isip.
5 En laiono eh nohno ahpw awiawih lao eh esehda me solahr eh koapworopwor.
E ahpw pil apwalihada emen wah ko,
oh wiahla emen laion kommwad.
6 Ni laiono eh laudlahr,
e ahpw kin ieiangseli laion teiko.
E ahpw pil esehla rapahki seike oh wiahla sounsaik aramas.
7 E kin kauwehla kehl kehlail kan, oh kauwehla kisin kahnimw kan.
Tohn wehio kin masepwehkada
ahnsou koaros me e kin weriwer.
8 Wehi kan eri pokonpene pwe re en mahweniong;
aramas akan kohdo sang wasa koaros.
Irail eri pahkpeseng ar uhk kan
oh kalowehdi nan ar lidip.
9 Irail eri kihdiong nan kehl ehu
oh walahng rehn nanmwarkien Papilonia.
Irail eri kin sinsile,
pwe aramas en dehr pwurehng rong ngilen eh weriwer
pohn dohl kan en Israel.
10 Omw nohno rasehng tuhkehn wain pwoat
me poad limwahn pilitik pwoat.
Pwehki eh diren pihl,
tuhkehn waino losolosala oh wahnla.
11 Rah kan me inenen kehlail
oh keirda wiahla sokon en nanmwarki kan.
Tuhkehn waino ahpw reireila oh leldalahng nan depwek;
aramas koaros eri kilang duwen losolos oh reirei en tuhkeo.
12 Aramas lingeringer kei ahpw usada
oh kesediong nan pwehl.
Kisinieng en palimese ahpw kamangala wah kan.
Rah kan pil tipwasang,
mengila oh mwasikala.
13 Eri, met e poadidier nan sapwtehn,
nan sahpw madekeng oh sohte pihl.
14 Kahlepen tuhkeo eri lulda;
kisiniei eri kamwasikahla rah oh wah kan.
Rah ko solahr pahn pwurehng kehlailda,
solahr pahn wia sokon en nanmwarki.