1 Nipwongo, ni nanmwarkio eh sohte kak seimwokla, e ahpw mahsanihong sapwellime sounntingo en patohwandohng pwuken wehi oh wadekohng. 2 Sounntingo ahpw wadewadek pwuhko lao lel wasa me koasoaiepen Mordekai eh kasalehda koasoandi suwed ehu en kamakamalahn nanmwarki—koasoandi me ohl lekwusol riemeno me kin papah nan tehnpaso wiahda. 3 Nanmwarkio eri keinemwe, “Dahme kitail katingiheki Mordekai ni ire wet?”

Sapwellime papah ahpw sapengki, “Sohte mehkot wiawihong Mordekai.”

4 Ni ahnsou me nanmwarkio wie kekeinemwe duwen dahme wiawihong en Mordekai eh wiewia mwahwo, Aman pa pedolong nan kelen tehnpaso. E patohdo pwehn peki rehn nanmwarki pwe Mordekai en kalusiamala ni pasapas me e kaunopadahro.

Nanmwarkio ahpw keinemwe rehn papah ko, “Ihs me mihmi nan kelen tehnpaset?”

5 Papah ko ahpw sapengki, “Aman, e awiawih pwe en tuhwong komwi.”

Nanmwarki ahpw sapengki, “En patohdo.”

6 Aman eri pedolong nan sapwellimen nanmwarki pereo, nanmwarkio ahpw keinemwe reh, “Mie aramas emen me I men kawauwih oh katingiheki eh wiewia mwahu. Dahme konehng I en wiahiong aramas menet?”

Aman ahpw mengimengloalki, “Ihs me nanmwarkio kupwurki kawauwih? Uhdahn ngehi.”

7-8 E ahpw sapengki nanmwarkio, “E konehng papah kan en patohwando ehu likou kaselelen—ehu sapwellimomwi likou ko. Oh re en patohwando oahs me komwi kin ketin dakeo. 9 Eri, komwi kupwure pwe likowo oh dakoapomwi oahso en kohieng emen ohl me lapalap akan en wehiet pwe en kalikawihkihda ohl me komwi kupwukupwure likou reireio oh patohwandahng pohn dakoapomwi oahso. Ohl lapalapo ahpw pahn pakapakairki ni ara pahn kohkohwei: ‘Kumwail patohwan duwen nanmwarkio eh kupwurki kawauwih aramas emen me e kupwurki eh wiewia mwahu kan!”

10 Nanmwarkio eri mahsanihong Aman, “Mwahu! Ale Mordekai, ohl en Suhso, me ahneki pwukoa laud nan tehnpaset, oh wiahiong soahng pwukat koaros; kaleke ehu soahng me komw koasonedier de sohte wiawi.”

11 Aman eri ale likou reireio oh oahso, kalikawihada Mordekai, patohwandahng pohn oahso oh kahreseli mwohn aramas koaros nan kahnimwo, pakapakairki ong aramas akan, “Kumwail kilang duwen nanmwarkio eh kupwurki katingih aramas emen me e kupwurki kawauwihala!”

12 Mordekai eri pwuralahng nan kelen tehnpaso, a Aman kohkolahng ni imweo, perepere mese pwehki eh namenek. 13 E ahpw koasoiaiong eh pwoud oh kompoakepah koaros dahme wiawihong. Irail koaros eri ndahng, “Omw manaman wie tikitiklahr sang en Mordekai. Ih mehn Suhs, ke ahpw sohte kak powehdi. E uhdahn pahn kaloweiukedi, pwe Koht kin ketin ieiang!”

14 Nindokon ar koasoakoasoi, ohl lekwusol ko me kin papah nan tehnpaso ahpw leledo pwe re en kahrehla Aman ni en Ester eh kamadipwo.

<- ESTER (Krihk) 5ESTER (Krihk) 7 ->