1-3 Nanmwarkio eri keinemwe, “Dahkot mwo Ester? Mahsanihong ie, dahme komw inangih, I pahn kihong komwi, mehnda ma pil apali en ei wehi.”[b]

4 Ester eri sapengki, “Rahnwet rahn kesempwal ehu ong ie. Ma komw ketin kupwurki, a komw ket ni kamadipw ehu me I patohwan kaunopadahr rahnwet, iangahki Aman.”

5 Nanmwarkio eri mahsanih pwe Aman en patohdo pwe ira en iang ket ni en Ester eh kamadipwo. Ira eri ketla iang kamadipwo. 6 Ni ar konokonot wain nanmwarkio pil pwurehng mahsanihong Ester, “Lih Nanmwarki Ester, komw mahsanih pwe mehkoaros pahn mweimweiong komwi; komw mahsanihong ie dahme komw kupwurki; omwi pekipek pahn pweida, mehnda ma komw pil peki apali en ei wehi.”

7 Ester eri patohwan, 8 “Eri, ma ei kaun pahn kupwure ei pekipek, I patohwan peki pwe komwi oh Aman en ketido lakapw ni kamadipw ehu me I pahn patohwan kaunopada ong komwi. E pahn duwehte met.”

9 Aman eri patopatohla sang rehn nanmwarkio nan eh pereperen nsenamwahu; ahpw ni eh kilangada Mordekai ni ewen kelen tehnpaso, e ahpw lingeringerda kowahlap oh kohkohla ni imweo. 10 Ih eri ekerpene ni imweo kompoakepah ko iangahki eh pwoud, Seres. 11 E ahpw suweikihda mwohrail eh dipwisou kan, wahu me nanmwarki ketikihong ni eh ketin kasapwilada en keriaun kaunen wehi. 12 E pil ndaiong irail, “Pil ehu, Lih Nanmwarki Ester sohte luke emen tohrohr ong ni kamadipw ehu me e kaunopada, ahpw ngehite oh nanmwarkio me e lukeiong ni eh kamadipwo lakapw.” 13 Ahpw mepwukat koaros sohte kaperen ong ie erein ei pahn kilikilang Mordekai, ohl en Suhso, eh kin wie mwomwohd ni ewen kelen tehnpaso.”

14 Eh pwoudo oh kompoakepah ko ahpw ndaiong, “Dahme komw sohte kauwadahki eh pasapas en kalusiam me pahn ilehki piht 75, oh nimenseng en lakapw komw ahpw sekerehki nanmwarki en koasoanehdi pwe Mordekai en kalusiamala ie? Eri komw ahpw pahn iang nanmwarki ketla ni kamadipwo pereperen.” Aman eri medemedewe me kaweid mwahu ehu met, e ahpw ruwese pwe pasapas en kalusiamo en wiawihda.

<- ESTER (Krihk) 4ESTER (Krihk) 6 ->