1 Nikanor rongada me Sudas oh ienge ko mihmiseli nan sapwen Sameria, ih eri koasoanehdi en mahweniong irail ni rahnen Sapad ehu, ni pein ih eh sohte pahn diar apwal ehu. 2 Mehn Suhs ko me idihdohng re en iangala eh pali ahpw peki reh en dehr wia tiahk lemei oh suwed wet, ahpw en wauneki rahn me Koht, me kin mahmahsanih mehkoaros, ketin kawauwihalahr oh wiahkilahr rahn me keieu sarawi. 3 Eri, Nikanor ohl me keieu sohte ih mehkot nin sampah, ahpw idek ma mie emen kaun lapalap nanleng me koasoanehdi re en wauneki rahnen Sapad. 4 Mehn Suhs ko sapengki, “Ei; Kaun-o me ketin ieias, me ketin kakaun nanleng, me koasoanehdi se en wauneki rahnen Sapad.”

5 E ahpw sapengkin irail, “Ngehi me kaunen sampah, oh I koasoanehdi kumwail en ale noumwail tehtehn mahwen kan oh wia dahme nanmwarki mahsanih.” Eri eh koasoandio sohte pweida.

6 Nikanor ahpw suweiki nan eh aklapalap me e pahn kauwada mehn kataman ehu ong eh pahn powehdi Sudas. 7 Ahpw Sudas koapworopworki me Koht pahn ketin sewese, 8 ih eri koangngoangehki nah sounpei ko re en dehr masak ar imwintihti kan. E kakehlakahki nan kepehdirail kan re en tamataman duwen Wasa Lapalahpie eh ketin sewese irail ni ahnsou samwalahr ako oh koapworpworki me e pahn pwurehng ketin sewese irail met. 9 E pil kakehlaka ar koapworopwor ni eh wadekohng irail Kosonnedo oh duwen soukohp ko oh duwen mahwen kan me re pweidahr loale. 10 Ni nah sounpei ko ar onopadahr, e ahpw kihong irail eh koasoandi, oh padahkihong irail re en dehr likihala mehn liki ko, pwehki ar sohte kin dadaur ar inou kan. 11 E kihong nah sounpei ko tehtehn mahwen, kaidehn ni eh koangngoangehkin irail re en koapworopworki neirail kedlahs kan oh mehn sansar kan, ahpw ni eh wiahiong irail mahsen en kakehlaka nan kepedirail kan. E pil kamwakid kapehdirail ni eh koasoiaiong irail eh ouramano, soangen kaudiahl me re kak koapworopworki.

12 E ndaiong irail me e kilang kaudiahlpen Onias, Samworo Lapalap en mahs, ohl me diren kadek oh mpahi oh waun, me kadek kapahrek oh aleier padahk mwahu sang ni eh tikitik pwe en ahneki mour mwakelekel. E kilangada duwen eh kapahda peh kan oh wie kapakapki mehn Suhs koaros. 13 Sudas eri pil kilangada emen ohl me pitenmoange pwetepwet oh mwomwen waun oh manaman. 14 Onias nda, “Met iei sapwellimen Koht soukohp Seremaia, me kin poakohng ienge mehn Suhs kan oh kin kalap kapakapkin kitail oh kapakapki Serusalem, kahnimw sarawio.”

15 Seremaia eri kapalahng Sudas kedlahs kohl pwoat, oh mahsanih, 16 “Kedlahs sarawi wet iei sapwellimen Koht kisakis. Ale oh kamwomwkihla omw imwintihti kan.”

17 En Sudas koasoi ko eri kakehlakahda irail koaros, oh kahrehiong pwutak ko en pei duwehte ohl ekei. Ar kahnimwo, ar pelien lamalam, oh ar Tehnpas Sarawio milahr nan keper laud. Mehn Suhs ko eri medewehda me re solahr pahn kasohlapahla ahnsou, ahpw re pahn kommwad oh tepida mahweniong ar imwintihti. 18 Re sohte nohn kesempwalki ar peneinei kan oh kisehrail kan duwehte ar kesempwalki Tehnpas Sarawio. 19 Oh aramas ako me mihmi Serusalem, inenen pwunodki mwomwen ar pahn peipene ni paliwar.

20 Aramas koaros ahpw awiawih pwe re en ese ihs me pahn kana nan mahweno. Imwintihti ko mwekimwekidla, oh neirail sounpein dak oahs kan mi ni pengepengerail kan, oh neirail elepant kan mi wasa mwahu oh onopadahngehr mahwen. 21 Sudas Makapius kilenglahng neirail karis kalaimwuno, soangen mehn mahwen tohto, oh neirail elepant kommwad akan. E ahpw kapahda peh kan nanleng oh kapakapohng Kaun-o, me kin ketin wiahda manaman akan, pwehki e wehwehki me Kaun-o kin ketikihong powehdi irail kan me konehng ale, a kaidehn irail kan me naineki karis kehlail. 22 Sudas ahpw nda, “Maing at Kaun, ni Esekaia eh wia nanmwarkien Suda, komwi kadarodo sapwellimomwi tohnleng me kemehla nein Nanmwarki Senakerip aramas 185,000.[a] 23 Eri met, Maing Kaunen nanleng, komw pwurehng kadarodo sapwellimomwi tohnleng mwahu pwe en kamasakada oh karerehda at imwintihti kan. 24 Sang ni roson lapalap en limomwi, komw ketin kamwomwala aramas pwukat me kin lahlahwei komwi oh kodohng uhwong sapwellimomwi aramas akan.” Ih duwen Sudas eh kaimwisekala eh kapakap.

25 Nikanor oh nah kariso ahpw mwekidla ni ar rong ngilen sowi ko oh koulen tapihada mahwen,[b] 26 ahpw Sudas oh nah sounpei ko mwekidla ni ar usehla pekipeki sapwellimen Koht sawas. 27 Eri, ni ar pepeiki pehrail kan oh nan kapehdirail kan wie kapakapohng Koht, re ahpw kemehla imwintihti tohtohsang 35,000. Ia uwen ar kapingkalahnganki sawas me sang rehn Koht! 28 Ni mahweno eh imwisekla oh irail mwesemweselier kolahng kamadipwki ar powehdi, re ahpw kilangada Nikanor eh wonohn nan eh likoun mahwen kan wasa re mahwenieo. 29 Re ahpw weriwerki ar peren kapikapinga Kaun-o ni lokaiahn sapwarailo.

30 Sudas Makapius, me kin peiki paliwere oh ngeni ahnsou koaros pwehki ienge mehn Suhs kan, sohte mwahn adusuwed ni eh kin poadidiong wehi sang ni eh pwulopwul, e ahpw ruwese nah sounpei ko re en lupukasang moangen Nikanor oh peh palimaun oh walahng Serusalem. 31 Ni ar lel nan kahniwmo, e ekerpene aramas koaros, kihdiong samworo ko mwohn pei sarawio, oh ileklahng sounpei ko me mihmi nan kelen mahweno. 32 Ih eri kasalehiong irail moangen ohl suwed Nikanor oh peh palimaun me e kapahdalahng ni Tehnpas Sarawien Koht Wasa Lapalahpie nan eh aklapalap. 33 E ahpw lupukasang lowen ohl suwedo, ndinda me e pahn kapisetikihpene oh kamwengehkihla menpihr kan oh langadahng moangeo sallahng Tehnpas Sarawio, kasalepen dahme eh suwed kahrehiong ih. 34 Aramas koaros wasao eri saradahng nanleng oh kapinga Kaun-o, me ketin kasalehda sapwellime roson lapalap oh sohte ketin mweidohng sapwellime Tehnpas Sarawio en mwamwahlla. 35 Sudas langahda moangen Nikanor ni kelen mahweno, pwe en kasalehiong aramas koaros duwen sapwellimen Koht sawas. 36 Re usuhs oh pali moron usada me rahno pahn kin mie katamanpe, e pahn kin wiawi nan sounpar koaros nin soutik en mandahn Rahnen Mordekaio,[c] me iei rahn kaeisek siluh en kaeisek riau en sounpwong me adaneki Adar ni mahsen en Aramaik.[d]

37 Met ih me wiawihong Nikanor. Kahnimw Serusalem eri mihmihte rehn mehn Suhs kan sang ni ahnsowo kohdo, eri I pahn kaimwisekala ei koasoi kan wasaht. 38 Ma ntingdien pwuhk wet me mwahu oh dehde, eri I perenki; ma e sakanakan oh sohte kaperen, I nantihong uwen ei kak. 39 Kitail ese me e sohte mwahu ong paliwar en nimete wain de pihl, ahpw wain eh doalo pihl me kin iou. Eri, ni poadopoad ehu eh kin ntingdi kaselel kin kahrehiong aramas me pahn wadek en perenki. Ih met kaimwiseklahn ei koasoi.

<- 2 MAKAPI KAN 14