148
Nanleng oh Sampah Pokon en Kapinga Koht
1 Kapinga KAUN-O!
Kumwail tohn powe kan,
kumwail kapinga KAUN-O sang nanleng.
2 Kumwail, sapwellime tohnleng kan, kumwail koaros kapinga,
kumwail, sapwellime karis en nanleng, kumwail koaros pil kapinga.
3 Kumwa, ketipin oh maram, kumwa kapinga;
kumwail usu lingaling kan, kumwail pil kapinga.
4 Kumwail, lahng ileilehie kan, oh pihl [a] kan me mi pohn pwelengen lahng,
kumwail kapinga.
5 Mepwukat koaruhsie en kapinga mwaren KAUN-O!
E ketin mahsente, a re wiawihda;
6 pwehki sapwellime mahsenohte, re ahpw soandier nan dewerail kohkohlahte,
oh re sohte kak sapeik.
7 Kumwail kapinga KAUN-O sang sampah,
kumwail mahn kamasepwehk kan en nan madau, oh kapin madau kan koaros,
8 lioal oh keteu, sinoh oh depwek kan,
oh pil melimel kan me kin peikiong sapwellime mahsen kan.
9 Kumwail dohl oh nahna kan, kumwail kapinga;
tuhke me kin wah kan, oh tuhkehn nanwel kan;
10 oh pil mahn akan koaros, me mand oh me lawalo kan,
mahn kerep oh menpihr kan.
11 Kumwail kapinga, kumwail nanmwarki kan oh aramas akan koaros,
soupeidi kan oh soangen soumas teikan koaros;
12 mwahnakapw oh peinakapw akan,
me mah oh pil seri kan.
13 Irail koaruhsie en kapinga mwaren KAUN-O!
Mware me lapalap sang mwar teikan koaros;
sapwellime lingan kin ketiket pohnangin lahng oh sampah.
14 E ketin kakehlahda sapwellime wehi,
pwe sapwellime aramas akan koaros en kapinga—
aramas en Israel kan me e kin ketin loalloale.