MELKAHKA KAN 101

101

Sapwellimen Nanmwarki Inou [~1~]

1 I pahn patohwan koulki duwen kupwur loalopwoat oh pwung,

Maing KAUN, I pahn patohwan koulkihong komwi.

2 I pahn idawehn mour mwakelekel.

Iahd me komwi pahn ketido rehi?

I pahn weweid nan mour mwakelekel nan imwei

3 oh sohte mweidohng me suwed en kin wiawi.

I kin kailongki wiewiahn irail kan me kin sohpeisang Koht;

I sohte pahn iang irail.

4 I sohte pahn duwehte aramas likamw akan

oh I sohte pahn patehng aramas suwed kan.

5 I pahn kin katokehdi mehmen

me kin mwengmwengininginki suwed en meteikan;

I sohte pahn iang aramas emen

me aklapalap oh pohnmwahso.

6 I pahn kin pwungki irail kan me kin loalopwoatohng Koht

oh mweidohng re en kin iang ie mihmi ni imweio.

Irail kan me uhdahn mehlel

iei irail me pahn mweimweiong en kin papah ie.

7 Sohte aramas likamw pahn kin iang mihmi nan imweio;

sohte aramas liksansalamwahu men pahn kak uh mwohi.

8 Rahn koaros I pahn kin kamwomwala

aramas suwed kan en nan sapwatailet;

I pahn kalipehla aramas suwed koaros

sang nan kahnimw en KAUN-O.