‹Jeꞌ wili nikꞌor i hin reꞌ choplic wuꞌum i wuku̱b chi chꞌimi̱l ru̱cꞌ risecꞌa̱j nikꞌab eh reꞌ wilic woꞌ wu̱cꞌ i wuku̱b chi manlic wach noꞌjbal wilic reh i Dios. Reꞌ hin wehtꞌalim i wili chiri̱j abano̱j tak: To̱b ta wilic abiral tak chi xa cow chic i niminic naꞌn tak, til pa ricorquil maꞌ cꞌahchiꞌ ta woꞌ acꞌacharic tak chi jeꞌ reꞌ. 2 Ruꞌum aj reꞌ nipahkaj aweh tak chi cꞌachlic ok awach tak eh ticowjok woꞌ tak pan animinic tak maj reꞌ Dios maꞌ nponic ta chiwach nicꞌ wach i cꞌacharic cꞌahchiꞌ abanam tak. Jeꞌ reꞌ kꞌuruꞌ reꞌ animinic tak reꞌ ncꞌutunic chi xa quimic chic reh, chayew tak ricowil chi manlic. 3 Chi jeꞌ reꞌ na̱banam tak, nipahkaj woꞌ aweh tak chi chacana̱ꞌ tak ribanaric i cꞌahbilal naꞌn tak cu yuꞌna chi kꞌi̱j eh reꞌ chic i wili chaꞌn tak chi jelow-bal: Cꞌolok pan acꞌux tak i tijinic reꞌ xacꞌul tak pan awa̱mna tak naxkꞌormojic aweh tak eh chanimej woꞌ tak chi coric i tijinic reꞌreꞌ. Jeꞌ reꞌ nikꞌor maj wi maꞌ xatcꞌacharic tak chi cꞌahchiꞌ acowonic pan animinic tak, reꞌ hin nanicꞌulic lok chi riyeꞌeric chana̱ tak i tiꞌcꞌaxic chi maꞌ cꞌahchiꞌ ta anaꞌbem tak nicꞌulic jeꞌ ricab nok jenoꞌ aj lekꞌ maꞌ riyew ta rehtalil chi xa nicꞌ yuꞌ ncꞌulic lok chi lekꞌ pan jenoꞌ pa̱t. 4 Jeꞌ reꞌ nikꞌor maj chaxilac hat-tak aj niminel aj Sa̱rtis cu wilque̱b take juꞌjun awich aj niminel tak reꞌ maꞌ xquicana̱ꞌ ta chi jenoꞌ mahc erijotꞌ quiniminic jeꞌ ricab chi wilic take cꞌacharel maꞌ nca̱j ta quichꞌuwaꞌrem soꞌ wach quisoꞌ. Ruꞌum chi jeꞌ reꞌ ncaꞌn, reꞌ take reꞌ naquiwihꞌic ru̱cꞌ risakil wach noꞌjbal jeꞌ ricab chi sak ta nak wach quisoꞌ. Jeꞌ reꞌ nikꞌor maj ricꞌul woꞌ chi queh chi jeꞌ reꞌ naquiwihꞌic. 5 Jeꞌ reꞌ kꞌuruꞌ, xa hab wach cꞌacharel riyew pan ro̱k ribanaric i cꞌahbilal, naniyeb reh jenaj sak laj tzꞌih reh chi naricojom chi risoꞌ. Maꞌ xa ta reꞌreꞌ, chipam laꞌ woꞌ i hu̱j reꞌ tzꞌihmbimaj wi̱ꞌ quibihnal nicꞌ paꞌ nimal take yeꞌo̱j chiqui̱j chi naquicꞌacharic chi junelic, nanibanam chi maꞌ jaruj ta chic enjucꞌuric lok ribihnal chi junelic. Jeꞌ woꞌ chic, nachꞌukurok kꞌoric china̱ i cꞌacharel reꞌreꞌ, reꞌ hin ar chiwach wAja̱w Dios richꞌi̱l take raj tzꞌeꞌ wa̱ch ar pan taxa̱j, naniyeb nichi̱ꞌ chiri̱j chi reꞌreꞌ til waj tahkanel nok wilic chi coꞌlbal reh i cꞌacharel reꞌreꞌ, nqui xikꞌor wi̱n.

6 Reꞌ xkꞌoric wu̱cꞌ wili, reꞌ woꞌ reꞌ nkꞌoric reh chi xa hab wach enbirinic reh take kꞌoric wili curman woꞌ chi reh chi ericoj rehtal chi coric i kꞌoro̱j ruꞌum i Lokꞌ laj Uxlabal queh take juꞌjun chꞌuk chi aj niminel nquimol qui̱b chi rilokꞌonjic wach i Dios.

‹Chiwi̱j hin nkꞌormojic chi reꞌ hin xnikꞌahsaj wi̱b chi ribanaric ricamaj i Dios eh til xniban i camanic reꞌreꞌ chi manlic. Reꞌ hin xyeꞌeric wajawric jeꞌ ricab nok reꞌ kꞌatal kꞌoric aj najtir reꞌ maꞌ Tawiy xiyew rajawric i jenaj raj camanom naxiyew reh rila̱wahil i pa̱t reꞌ riban wi̱ꞌ kꞌatoj kꞌoric. Jeꞌ reꞌ nikꞌor maj xa reꞌ aj wach i camanom reꞌreꞌ wilic ru̱cꞌ i la̱wa chi riteheric jeꞌ woꞌ chi ritzꞌaparic ritzꞌahpil i pa̱t reꞌreꞌ eh maꞌ hab ta chic wach jenoꞌ enchol riteheric, maꞌ woꞌ ritzꞌaparic i tzꞌahp reꞌreꞌ. Reꞌ hin kꞌuruꞌ nikꞌor aweh tak i wili: 8 Reꞌ hin wehtꞌalim i wili chiri̱j abano̱j tak: Chi reꞌ hat-tak maꞌ acana̱b ta tak riyeꞌeric acꞌux tak chiwi̱j, xa chꞌiclic laꞌ woꞌ acꞌux tak chiri̱j niCꞌuhbal, to̱b ta reꞌ acomonil tak chi niminic maꞌ nim ta ti chipam i tinamit Pilare̱lpiya. Ruꞌum chi jeꞌ reꞌ cꞌahchiꞌ abanam tak, reꞌ hin xniban chi reꞌ hat-tak xa wilic ok woꞌ awocbal tak chi cꞌuhbalanic cu̱cꞌ take aj Pilare̱lpiya, jeꞌ ricab curman chi tehlic ok jenoꞌ ocbal reh jenoꞌ pa̱t wi jenoꞌ hab wach ra̱j oquic ar chipam.

9 Jeꞌ woꞌ chic, maꞌ xa reꞌ ta reꞌ wehtꞌalim, jeꞌ laꞌ woꞌ chi, chi quixilac take aj niminel wilic take nquitzꞌak qui̱b chi ritinami̱t i Dios take xa reꞌ laꞌ maꞌ reꞌ ta woꞌ ritinami̱t i Dios take, ritinami̱t laꞌ aj Yahm take ruꞌum chi nanquimol woꞌ qui̱b pan pa̱t ntijiljic wi̱ꞌ ri̱j i Cꞌuhbal Yeꞌo̱j reh Moyses, reꞌ woꞌ rinoꞌjbal ruꞌ nquitijej ri̱j. Cu̱cꞌ take chucul laj kꞌoric aj cꞌacharel reꞌreꞌ, nanibanam chi naquiyeb alokꞌil tak chi xa naquitokom chic qui̱b chawach tak naꞌbal reh chi kꞌe̱ꞌ tiꞌ tiwicꞌraj tak. 10 Ruꞌum i reꞌ naponok rikꞌijil i pajaric reꞌ nilmijic wi̱ꞌ wi coric chi reꞌ take cꞌacharel chꞌiclic quicꞌux chiwi̱j, reꞌ hin chiwach take kꞌi̱j reꞌreꞌ naca̱t tak nicoꞌlem chiwach i tiꞌcꞌaxic narichalic chi quina̱ wilque̱b ayuꞌ wach acꞌal reꞌ maꞌ nquinimej ta i Dios. Jeꞌ reꞌ nanibanam chawi̱j tak maj reꞌ tijinic yeꞌo̱j aweh tak wuꞌum reꞌ rikꞌor wi̱ꞌ chi na̱cuyum tak ransil i tiꞌcꞌaxic, xanimej woꞌ tak chi manlic.

11 ‹Jeꞌ reꞌ kꞌuruꞌ ruꞌum chi reꞌ hin loqꞌuil woꞌ chic quincꞌulic lok, nipahkaj aweh tak chi reꞌ tijinic niyeb aweh tak chatik tak juꞌ ricowsjic acꞌux tak chiri̱j reh chi maꞌ toco̱m ta encꞌulbic reh aco̱ch reꞌ naniyeb aweh tak. 12 Reꞌ co̱ch reꞌreꞌ, reꞌ i wili: Jeꞌ ricab chi jenoꞌ queh take ro̱k Lokꞌ laj Pa̱t reꞌ nlokꞌonjic wi̱ꞌ wach i Dios maꞌ eta riban chi enelic lok jeꞌ woꞌ reꞌ xa hab wach aweh tak reꞌ nariyeb pa ro̱k i cꞌahbilal, reꞌ hin nanibanam chi encꞌacharic ar reꞌ wilic wi̱ꞌ i Dios eh encahnic ar chi junelic. Jeꞌ woꞌ ricab nantzꞌihmjic take bihnal chiwach take pa̱t ehtꞌalbal reh hab wach aj ehchenel reh on chajaric tinamital wilic wi̱ꞌ i pa̱t reꞌreꞌ, jeꞌ woꞌ reꞌ nanibanam hin ru̱cꞌ i cꞌacharel reꞌ riyew pa ro̱k i cꞌahbilal. Yejal wach nanicojom jenaj rehtalil reꞌ encꞌutunic wi̱ꞌ chi reꞌ wAja̱w Dios aj ehchenel reh. Jeꞌ woꞌ, yejal wach i cꞌacharel reꞌreꞌ ewoꞌ nicoj i acꞌ laj ehtalil yeꞌo̱j woꞌ wi̱n i hin reꞌ ncꞌutunic wi̱ꞌ chi xniyew pan wo̱k i cꞌahbilal. Maꞌ xa reꞌ ta reꞌ, jeꞌ laꞌ woꞌ yejal wach i cꞌacharel reꞌreꞌ, ewoꞌ nicoj i rehtalil reꞌ encꞌutunic wi̱ꞌ chi reꞌreꞌ encꞌacharic johtok ar pan “Acꞌ laj yeꞌa̱b reꞌ Jerusalen” ribihnal reꞌ pan taxa̱j tikꞌimaj ruꞌum i wAja̱w Dios, nqui xkꞌoꞌronic wi̱n.

13 Reꞌ xkꞌoric wu̱cꞌ wili, reꞌ woꞌ reꞌ nkꞌoric reh chi xa hab wach enbirinic reh take kꞌoric wili curman woꞌ chi reh chi ericoj rehtal chi coric i kꞌoro̱j ruꞌum i Lokꞌ laj Uxlabal queh take juꞌjun chꞌuk chi aj niminel nquimol qui̱b chi rilokꞌonjic wach i Dios.

‹Reꞌ hin reꞌ nkꞌormojic chiwi̱j chi reꞌ hin quinbanic chi nponic wach nicꞌ nimal kꞌoro̱j cahnok ruꞌum i Dios eh chi reꞌ woꞌ hin aj chꞌiquenel cꞌuxlis chiri̱j rikꞌormojic i coric. Ruꞌum chi jeꞌ reꞌ niwi̱ꞌ, reꞌ hin reꞌ xintikꞌinic cho reh take chiꞌnchel nicꞌ paꞌ nimal wilic, nikꞌor aweh tak wili: 15 Reꞌ hin wehtꞌalim wili chiri̱j abano̱j tak: Reꞌ hat-tak maꞌ rikꞌor ta coric animinic tak xa jeꞌ nawa̱j eh xa jeꞌ maꞌ nawa̱j ta woꞌ tak niminic. Ru̱cꞌ i noꞌjbal naꞌn tak reꞌreꞌ xa jeꞌ na acab i luhic laj haꞌ chi maꞌ tzꞌaꞌ ta woꞌ eh maꞌ jotꞌic ta woꞌ. Jeꞌ reꞌ nikꞌor maj kꞌe̱ꞌ nak nwa̱j chi enapahba̱ꞌ acꞌux tak chiwi̱j chi coric on maꞌxta woꞌ chi junpech. 16 Jeꞌ reꞌ kꞌuruꞌ ruꞌum chi maꞌ rikꞌor ta chic coric animinic tak chi xa jeꞌ ricab i luhic laj haꞌ chi maꞌ tzꞌaꞌ ta eh maꞌ jotꞌic ta woꞌ, reꞌ hin maꞌxta chic nicꞌulum anoꞌjbal tak reꞌreꞌ jeꞌ ricab nok jenoꞌ cꞌacharel rixaꞌbej lok i quiꞌtokꞌic laj haꞌ ruꞌum chi maꞌ ricꞌul ta cho chiꞌ ricꞌux. 17 Ru̱cꞌ i noꞌjbal reꞌreꞌ to̱b ta nakꞌor tak chi hat-tak biho̱m eh chi maꞌxta chic bih maꞌ ta nak wilic aweh tak, maꞌ narak ta tak chiri̱j chi, chi wi̱n i hin xa jeꞌ na acab tak jenaj niba̱ꞌ reꞌ maꞌxta bih wilic reh, on jeꞌ acab tak jenaj sotꞌ, on jeꞌ acab tak jenaj cꞌacharel yonlic chi junpech. 18 Ruꞌum aj reꞌ chabiraj take noꞌjbal naniyeb aweh tak wili: Jeꞌ ricab nok jenoꞌ cꞌacharel nponic ru̱cꞌ aj cꞌa̱y chi rilokꞌoric i kꞌan woric laj chꞌihchꞌ chꞌubsamaj wach pan kꞌa̱kꞌ reh chi naribihomric, jeꞌ woꞌ reꞌ nisiqꞌuiric chaꞌn tak i hin reh chi qꞌuihal wach cuseꞌsbal enacꞌul tak wu̱cꞌ. Jeꞌ woꞌ chic, jeꞌ ricab nato̱j tak ru̱cꞌ aj cꞌa̱y tzꞌih chi rilokꞌoric take sak laj tzꞌih nacoj chawi̱j tak reh chi maꞌ eta nacꞌuhtaj tak aqꞌuixbilal chi tꞌiꞌlica̱t tak, jeꞌ woꞌ reꞌ nisiqꞌuiric chaꞌn tak i hin reh chi enpoyoric wach aqꞌuixbilal tak wilic ruꞌum amahc tak. Jeꞌ woꞌ, jeꞌ ricab nato̱j tak ru̱cꞌ aj cꞌa̱y ikꞌo̱m chi rilokꞌoric rikꞌomil nakꞌ awach suksbal reh chi narilbic chi coric, jeꞌ woꞌ reꞌ nisiqꞌuiric chaꞌn tak i hin reh chi reꞌ acapew-bal tak erirak chiri̱j chi coric chaj bih kꞌoro̱j ruꞌum i Dios. 19 Reꞌ hin naniyeb cho aweh tak take noꞌjbal reꞌreꞌ ruꞌum i wili: Wi reꞌ take cꞌacharel reꞌ kꞌe̱ꞌ tiꞌ nwicꞌraj take maꞌ nquijal ta wach quinoꞌjbal, reꞌ hin ninak take eh nikꞌil woꞌ take ru̱cꞌ tiꞌcꞌaxic. Jeꞌ reꞌ kꞌuruꞌ reh chi maꞌ eta niban tiꞌcꞌaxic aweh tak nipahkaj aweh tak chi chajal wach anoꞌjbal tak eh chiri̱j ok chic i Dios chayew acꞌux tak chi manlic. 20 Ruꞌum aj reꞌ chacoj tak rehtal i yukꞌunic cꞌahchiꞌ nibanam aweh tak chi chayew tak kꞌab wi̱n chi naniwihꞌic chaxilac tak maj reꞌ hin cꞌahchiꞌqui̱n chi kꞌoꞌronic awu̱cꞌ tak jeꞌ ricab nok jenoꞌ cꞌacharel no̱j cꞌolok chiꞌ ripa̱t jenoꞌ cꞌacharel narikꞌor cok tuwe̱y. Jeꞌ aj ricab chi nanteheric cho reh i tzꞌahp i cꞌacharel reꞌreꞌ, noquic cok chipam i pa̱t eh nankꞌormojic riwaꞌ riha̱ꞌ, riban woꞌ riwaꞌ riha̱ꞌ pan junwachil chꞌi̱l take aj pan pa̱t reꞌreꞌ, jeꞌ woꞌ reꞌ i hin, xa eli̱c woꞌ naniwihꞌic ru̱cꞌ i hab wach eriyew kꞌab wi̱n chi nawihchꞌilem. 21 Jeꞌ reꞌ kꞌuruꞌ reꞌ cꞌacharel reꞌ riyew pa ro̱k ribanaric i cꞌahbilal, nanibanam chi enehtric wajawric jeꞌ ricab xiban wu̱cꞌ i wAja̱w naxniyew pan wo̱k i cꞌahbilal. Reꞌreꞌ xiban chi reꞌ hin xinehtric ru̱cꞌ rilokꞌil jeꞌ ricab riban jenoꞌ kꞌatal kꞌoric nariyew kꞌab reh jenoꞌ cꞌacharel chi entzꞌuhkic chipam ritzꞌukꞌa̱b riban wi̱ꞌ kꞌatoj kꞌoric, nqui xikꞌor wi̱n.

22 Reꞌ xkꞌoric wu̱cꞌ wili, reꞌ woꞌ reꞌ nkꞌoric reh chi xa hab wach enbirinic reh take kꞌoric wili curman woꞌ chi reh chi ericoj rehtal chi coric i kꞌoro̱j ruꞌum i Lokꞌ laj Uxlabal queh take juꞌjun chꞌuk chi aj niminel nquimol qui̱b chi rilokꞌonjic wach i Dios.

<- APOCALIPSIS 2APOCALIPSIS 4 ->