1 Yuꞌna was tak nicha̱kꞌ aj niminel, nwa̱j kꞌoric awu̱cꞌ tak chiri̱j take bano̱j reꞌ xa jeꞌ na chic jenoꞌ si̱ riyew i Lokꞌ laj rUxlabal i Dios chi enkaꞌn. Jeꞌ reꞌ niban ruꞌum nok nwa̱j chi reꞌ hat-tak na̱wehtꞌalim tak ricorquilal chiri̱j take banoj reꞌreꞌ.

2 Reꞌ hat-tak awehtꞌalim tak chi coric chi nok jaꞌ reꞌ ta nak hat-tak aj niminel reh kAja̱w Jesus, timahcanic nak tak ru̱cꞌ lokꞌonic tak tzꞌakoj tiyo̱x reꞌ maꞌxta bih jenoꞌ cꞌuhbal nchalic ru̱cꞌ i Dios nquikꞌor maj maꞌ quichol ta woꞌ kꞌoric. 3 Jeꞌ reꞌ kꞌuruꞌ reꞌ pe̱t be̱h kꞌoric nwa̱j chi charak tak chiri̱j chi maꞌ hab ta wach jenoꞌ cꞌacharel behsemaj ricapew-bal ruꞌum i Lokꞌ laj rUxlabal i Dios erikꞌor chi reꞌ Jesus sihtimaj laj cꞌacharel xa reꞌ laꞌ wach take quikꞌoric chi behsemaj quicapew-bal ruꞌum i Lokꞌ laj rUxlabal i Dios til nquiyew quikꞌorbal chi reꞌ Jesus, reꞌreꞌ i Kꞌatal Kꞌoric chi kana̱ chiꞌnchel i hoj cꞌacharel.

4 Yuꞌna chiri̱j chic take bano̱j nyeꞌeric keh hoj aj niminel chi nakaꞌnam nanikꞌoric chi jeꞌ wili: Coric ruꞌ chi reꞌ take bano̱j rehreh take quiwach xa reꞌ laꞌ xa ru̱cꞌ woꞌ i Lokꞌ laj rUxlabal i Dios nchalic riyeꞌeric i juꞌjun queh reꞌreꞌ. 5 Jeꞌ woꞌ, wilic woꞌ rehreh wach camanic chi nakaꞌnam pan kaniminic xa reꞌ laꞌ xa chiwach woꞌ i jenaj chi Lokꞌ laj Ajabe̱s cꞌahchiꞌ kacamanic. 6 Jeꞌ woꞌ, qꞌuihleh wach ricꞌuhtjic rajawric i Dios riban chipam ricꞌacharic i juꞌjun chi cꞌacharel xa reꞌ laꞌ xa reꞌ woꞌ i jenaj chi Dios riyew cho rajawric chi kana̱ hoj chiꞌnchel aj niminel chi ribanaric.

7 Jenaj chic kꞌoric nwa̱j nikꞌorom aweh tak, reꞌ kꞌoric reꞌreꞌ, reꞌ i wili: Reꞌ Lokꞌ laj rUxlabal i Dios riyew keh i rajawric chi ribanaric juꞌjun queh i holohic laj bano̱j reh chi reꞌ hoj nakacowsam quicꞌux take kich aj niminel. 8 Jeꞌ reꞌ nok wilic take aj niminel xyeꞌeric queh ruꞌum i Lokꞌ laj rUxlabal i Dios chi ru̱cꞌ tꞌulic laj noꞌjbal enquikꞌor i cꞌuhbal ar nchalic rikꞌormojic ru̱cꞌ i Dios. Wilic woꞌ take xyeꞌeric queh ruꞌum i Lokꞌ laj Uxlabal chi naquisakomem wach i kꞌoric yeꞌo̱j queh ruꞌum i Dios. 9 Ruꞌum woꞌ i Lokꞌ laj rUxlabal i Dios, wilic woꞌ take nyeꞌeric queh chi til naquichꞌica̱b quicꞌux chi reꞌ Dios naribanam jenoꞌ lokꞌ laj nawa̱l cu̱cꞌ eh wilic woꞌ take aj niminel nyeꞌeric cajawric chi quicowsjic take yowaꞌi̱b. 10 Maꞌ xa reꞌ ta reꞌ riyew i Lokꞌ laj rUxlabal i Dios, jeꞌ laꞌ woꞌ wilic take riyew queh chi nacaꞌnam take rinimal wach lokꞌ laj nawa̱l. Wilic woꞌ riyew queh risakomsjic wach take kꞌoric riyew cho Dios chi naquehtꞌalim take cꞌacharel. Wilic woꞌ take yeꞌo̱j queh chi naquirakam chiri̱j chajaric chi uxlabal wilic ru̱cꞌ jenoꞌ cꞌacharel wi nchel Lokꞌ laj rUxlabal i Dios on jenoꞌ maꞌ tob laj uxlabal. Wilic woꞌ chic take riyew queh chi quikꞌoric pan tak toco̱m chic kꞌoric jeꞌ ru̱cꞌ maꞌ reꞌ ta quikꞌorbal eh wilic woꞌ take yeꞌo̱j queh chi naquisakomem wach i chaj paꞌ bih nquikꞌor take cꞌacharel quikꞌoric pan toco̱m chic kꞌoric. 11 Jeꞌ aj reꞌ ruꞌ yohbal wach take bano̱j wilic xa reꞌ laꞌ xa ru̱cꞌ woꞌ i Lokꞌ laj rUxlabal i Dios nchalic ribanaric chiꞌnchel reꞌreꞌ to̱b ta rehreh wach maj reꞌreꞌ nyeꞌbic reh juꞌjun chi cꞌacharel reꞌ kꞌorel nicꞌ paꞌ wach ra̱j riyeb ruꞌ.

12 Nicꞌ paꞌ wach ncꞌuluric ru̱cꞌ katiꞌjolal kabakil hoj cꞌacharel chi to̱b ta qꞌuihleh wach tiklic wi̱ꞌ xa jenaj woꞌ nchoponic cho reh, jeꞌ woꞌ reꞌ ncꞌuluric ku̱cꞌ i hoj aj niminel chi to̱b ta nchel hoj qꞌuih xa reꞌ laꞌ xa jenaj woꞌ kawi̱ꞌ ru̱cꞌ i Jesus reꞌ Pahbamaj chi Kꞌatal Kꞌoric. 13 Maꞌ kꞌorel ta chic wi hoj on maꞌ reꞌ hoj ra̱ꞌ riꞌsil cho maꞌ Israhel, wi nchel chopo̱j on maꞌ chopo̱j kana̱ pan cow laj camanic, naxkanimej laꞌ i kAja̱w Jesus eh xkajic kaha̱ꞌ reꞌ Lokꞌ laj rUxlabal i Dios xchalic wihꞌok pan ka̱mna eh xiban chi xa jenaj chic kawi̱ꞌ i hoj juntuhm chi aj niminel.

14 Chi jeꞌ reꞌ kawi̱ꞌ i hoj juntuhm chi aj niminel til je woꞌ ricab i katiꞌjolal kabakil reꞌ qꞌuihleh wach ritikal tiklic wi̱ꞌ, 15 kakꞌor ti chic chi reꞌ okis eta nak nkꞌoric cho eh erikꞌor chi je wili:

«A̱h! Reꞌ hin maꞌ reꞌ hin pa riman ritiꞌjojal ribakil i cꞌacharel maj maꞌ reꞌ ta hin kꞌabis, nqui ta nak erikꞌor.

Xa maꞌxta woꞌ nak camaj erikꞌor chi jeꞌ reꞌ, maꞌ jeꞌ? Jeꞌ reꞌ nikꞌor ruꞌum nok til cu pa riman woꞌ wilic cho reh ritiꞌjolal ribakil i cꞌacharel. 16 On wi ta nak reꞌ xiquin erikꞌor chi jeꞌ wili:

«Reꞌ hin maꞌ reꞌ hin nakꞌ wachi̱s, ruꞌum reꞌ maꞌ reꞌ ta hin pa riman ritiꞌjolal ribakil i cꞌacharel, nqui ta nak.

Xa maꞌxta woꞌ nak camaj erikꞌor chi jeꞌ reꞌ, maꞌ jeꞌ? Jeꞌ reꞌ nikꞌor ruꞌum nok til pa riman wilic cho. 17 Jeꞌ woꞌ chic, wi ta nak xa reꞌ ti nakꞌ wachi̱s tiklic wi̱ꞌ chiꞌnchel ritiꞌjolal ribakil i cꞌacharel, haj nak enchalic i rixiquin reꞌ enbirinic wi̱ꞌ? On reꞌ ta nak i xiquin tiklic wi̱ꞌ chiꞌnchel, haj nak enchalic i juꞌ reꞌ enuhtzꞌunic wi̱ꞌ? 18 Raj wili chiꞌnchel xitikꞌa̱ꞌ i Dios chi coric, chi juꞌjunal take quicamanic reh katiꞌjolal kabakil xicana̱ꞌ take pa riyeꞌa̱b reꞌ kꞌorel paꞌ xilow chi tare̱t chi xicahnic wi̱ꞌ. 19 Kꞌe̱ꞌ holonquil xiban maj wi ta nak chiꞌnchel tikꞌimaj take chi xa nakꞌ wachi̱s on chi xa ru̱cꞌ i xiquin, nicꞌ nak wach nakꞌormojok chi reꞌreꞌ jenaj ritiꞌjolal ribakil jenoꞌ cꞌacharel? Maꞌ nicꞌ ta wach. 20 Jeꞌ reꞌ ajic to̱b ta rehreh wach tiklic wi̱ꞌ ritiꞌjolal ribakil jenoꞌ cꞌacharel, xa jenaj woꞌ riwi̱ꞌ nok wilic maꞌ qꞌuih ta. 21 Ruꞌum aj reꞌ maꞌ eta riban chi reꞌ nakꞌ wachi̱s erikꞌor reh nah kꞌabis chi jeꞌ wili:

«Reꞌ hat maꞌxta bih hat camanel wi̱n, maꞌ nqui ta reh.

On maꞌ woꞌ reꞌ nahis eta woꞌ nak rikꞌor reh okis chi jeꞌ wili:

«Reꞌ hat xa maꞌxta bih hat camanel wi̱n, maꞌ nqui ta woꞌ erikꞌor reh.

22 Jeꞌ reꞌ kꞌuruꞌ maꞌxta bih jenoꞌ chajaric jeꞌ ru̱cꞌ tiklic wi̱ꞌ katiꞌjolal kabakil maꞌ ta nak chi bih camaj nok wilic maj reꞌ ricorquilal reꞌ paꞌ bih tiklic wi̱ꞌ katiꞌjolal to̱b ta xa maꞌ cow ta ti take nancꞌuhtunic, reꞌ take reꞌ til camanel take chi keh. 23 Ruꞌum aj reꞌ, reꞌ take paꞌ bih tiklic wi̱ꞌ katiꞌjolal kabakil reꞌ nkacapaj chi maꞌ til ta ti curman take, reꞌ take reꞌ til nkasoꞌej take chi coric. Jeꞌ woꞌ reꞌ nkaꞌn queh take katiꞌjolal reꞌ nkacapaj chi maꞌ riban ta chi enkacꞌuhtaj lok wach sakom, til nkilow take chi coric, 24 raj take katiꞌjolal kabakil reꞌ take wach sakom wilque̱b lok, maꞌ til ta ti ilo̱j chi coric kuꞌum. Jeꞌ reꞌ nok reꞌ take katiꞌjolal kabakil reꞌ take xa pan cꞌolic wilque̱b cho, curman chi til woꞌ nkilow chi coric 25 reh chi jeꞌ reꞌ maꞌ jenoꞌ queh take tiklic wi̱ꞌ katiꞌjolal enquilow qui̱b chi maꞌ suk ta. Jeꞌ reꞌ ajic, reꞌ Dios xitikꞌa̱ꞌ take juꞌjun tik reh katiꞌjolal kabakil reh nok chi xa jenaj quiwi̱ꞌ nok wilque̱b chi ekojquitoꞌbej chi nakacꞌacharic chi suk. 26 Jeꞌ reꞌ kꞌuruꞌ chi xa jenaj quiwi̱ꞌ nok tikilque̱b take katiꞌjolal kabakil, wi wilic jenoꞌ tik reh katiꞌjolal xcahnic chi tiꞌ, chiꞌnchel woꞌ katiꞌjolal wilic chi tiꞌ. Wi reꞌ hoj nkayew chi suk jenoꞌ tik reh katiꞌjolal, chiꞌnchel woꞌ i katiꞌjolal wilic chi suk.

27 Yuꞌna ajic chi abiram tak chic chiri̱j nicꞌ wach ncamanic katiꞌjolal, charak tak chiri̱j chi jeꞌ woꞌ reꞌ chiꞌnchel i hoj aj niminel xa jeꞌ woꞌ na hoj ricab ritiꞌjolal ribakil i Jesus reꞌ Pahbamaj chi Kꞌatal Kꞌoric eh chi kajuꞌjunal i hoj wilco̱j reꞌ kꞌorel nicꞌ paꞌ wach kawi̱ꞌ no̱j kaꞌn chi jeꞌ hoj ricab i juꞌjun tik reh ritiꞌjolal ribakil ruꞌ. 28 Jeꞌ reꞌ nikꞌor maj reꞌ Dios chi kajuꞌjunal i hoj xiyew cho keh rehreh wach camanic chi nakaꞌnam. Jeꞌ reꞌ nok reꞌ pe̱t xiban i Dios, xichih take cꞌacharel reꞌ xcaꞌn chi nahsil cꞌamol quibe̱h take raj tahkanel i Jesus. Chiri̱j chic ruꞌ reꞌ ricab, xichih take cꞌacharel reꞌ xcaꞌn chi raj kꞌorol cꞌuhbal reꞌ kꞌorel haj paꞌ wilic ricoj pan ca̱mna rikꞌormojic eh pa ro̱x reꞌ Dios xichih take cꞌacharel reꞌ xcaꞌn chi aj cꞌuhtunel take kꞌoric wilic chipam riCꞌuhbal i Dios.

Maꞌ xa reꞌ ta reꞌ xiban i Dios jeꞌ laꞌ woꞌ wilic take cꞌacharel xiyew queh rajawric chi nacaꞌnam take lokꞌ laj nawa̱l. Wilic woꞌ xiyew cajawric chi quicowsjic take yowaꞌi̱b. Wilic woꞌ take xiyew queh i lokꞌil chi quitobjic take cas quicha̱kꞌ. Wilic woꞌ xiyew queh i lokꞌil chi aj ilol take camanic chipam ricamaj i Dios. Jeꞌ woꞌ, wilic woꞌ xiyew queh i lokꞌil chi naquikꞌoric pan toco̱m chic kꞌoric jeꞌ ru̱cꞌ maꞌ quitijem ta ri̱j.

29 Ru̱cꞌ rehreh wach camanic yeꞌo̱j ruꞌum i Dios, maꞌ eta riban kꞌuruꞌ chi chiꞌnchel take aj niminel eta nak ncaꞌn chi nahsil cꞌamol quibe̱h take aj tahkanel reh i Jesus, on chi aj kꞌorol ta nak reh kꞌoric nchalic ru̱cꞌ i Dios on chi aj cꞌuhtunel ta nak reh take kꞌoric wilic chipam riCꞌuhbal i Dios. Xa ta nak woꞌ eriban chi chi kunchelal i hoj enwihꞌic kajawric chi ribanjic take lokꞌ laj nawa̱l. 30 Jeꞌ woꞌ, maꞌ eta riban chi ta nak chi kunchelal i hoj aj niminel enwihꞌic kajawric chi quicowsjic take yowaꞌi̱b. Maꞌ woꞌ chi ta nak chi kunchelal enwihꞌic ku̱cꞌ i lokꞌil chi kꞌoric pan toco̱m chic kꞌoric jeꞌ ru̱cꞌ maꞌ katijem ta ri̱j. Xa ta woꞌ nak chi kunchelal i hoj enkarak chiri̱j i kꞌoric nbanjic pan toco̱m chic kꞌoric reh chi nakakꞌorom queh take toco̱m chic kas kacha̱kꞌ. 31 Til pan coric til rehreh quiwach take bano̱j nyeꞌeric keh hoj aj niminel chi nakaꞌnam eh chi jeꞌ reꞌ quiwi̱ꞌ, til cow chayew acꞌux tak chiri̱j i ribanaric i juꞌjun queh take bano̱j reꞌ nacapaj tak reꞌreꞌ, chi til naricamanic aweh hat eh jeꞌ woꞌ chi encamanic toꞌbal queh take awas acha̱kꞌ tak aj niminel. Chiꞌnchel take reꞌreꞌ kꞌe̱ꞌ tare̱t take chi banaric xa reꞌ laꞌ nwa̱j woꞌ nikꞌorom aweh tak chi wilic jenaj chic noꞌjbal reꞌ til kꞌe̱ꞌ woꞌ chic tare̱t chiwach chiꞌnchel eh reꞌreꞌ nwa̱j nicꞌuhtam aweh tak yuꞌna.

<- 1 CORINTIOS 111 CORINTIOS 13 ->