1 ’Janhan mé éxí yóhe̱ ijnko ntanòa tjechón itsa to uva la ko Tꞌaná mé éxí yóhe̱ tí nkexro tꞌayakonhen tí nta a. 2 Tsochrínjin chꞌán tí chaan nta tꞌónahya to. A̱ ntá tí chaan nta tꞌóna to mé nchetjuákꞌá chꞌán kíxin ntá tsꞌóna a̱ntsí má tsjé to. 3 A̱ ntá jahará la kótjuáxinrá tí tanná kꞌuétjo̱nka̱rá senó. 4 Tí tsi̱to̱éhyará tí janhan ntá kja̱xin janhan tsi̱to̱a̱hya tí jahará. Mé xi̱kaha ijnko chaan nta tsꞌaxrjentehe tsjachahya jehó tsꞌóna to, la ko xi̱kaha jahórá tsjachahyará si̱chꞌerá tí xra̱ kuènta̱na tí tsi̱to̱hérá tí janhan.

5 ’Janhan na mé yóhe̱ tí ntanòa, a̱ ntá jahará la tí chaan tí ntanòa tsíkꞌayanta. Tí nkexro jnkoko̱á tjenka̱yáxinkian mé tsjacha tsꞌóna nchónhya to. A̱ ntá tí tsinkáchónkihya sín tí janhan la ninkehó xra̱ tsjachahya sín sichꞌe sín. 6 A̱ ntá tí nkexro jnkoko̱áhya tjenka̱yáxinkian na mé éxí yóhe̱ tí nta chꞌehya xra̱ tsíkóchrínjin sín tsíkꞌitjí sín chrínta tí nonte a tso̱xámá ntá tsoxrejo ntá tsoche.

7 ’Ntá tí chaxín tsi̱to̱éhyará tsinkachónkirá tí janhan la ko tsꞌitjáyanhyará tí nkehe kjuákohará ntá tsjanchiará ichrén nkehe tjinkáonrá la tsꞌayéhérá. 8 A̱ ntá Tꞌaná la tso̱chéhe̱ chꞌán tí tsꞌónará itsjé to. Mé xi̱kaha tsjáko̱xi̱nrá kíxin tinkachónkirá tí janhan. 9 Janhan tjua̱hará tí jahará éxí tjua̱na Tꞌaná. Chrókónohará kíxin tjua̱hará. 10 Tí tsítekáonrá tí nkehe kuétua̱nhanrá ntá tso̱nohará kíxin tjua̱hará éxí yóhe̱ kja̱xin janhan nta̱xiteyá tí nkehe kꞌue̱tua̱nna Tꞌaná ntá kónòna janhan kíxin tjua̱na chꞌán.

11 ’Mé xi̱kaha tjo̱nka̱rá kaín tíha kíxin ntá éxí chàna mé xi̱kaha tsjintaxín tso̱chéhe̱ a̱sánrá. 12 Tí nkehe kuétua̱nhanrá la mé tíhi kíxin chrótjuèhérá kíchuárá éxí tjua̱hará xi̱kaha. 13 Ninkexró chrókóyóhe̱ éxí tí nkexro imá tjuèhe tí sín chóxin chꞌán ntá tsꞌenyákonhe̱n chꞌán tí jehe sín. 14 Jahará la chojni choxian tí tsítekáonrá tí nkehe tétua̱nhanrá. 15 Ntáxrja̱nhya janhan kíxin jahará chojni chꞌexón xra̱ kíxin tí chojni xi̱kaha chꞌexón xra̱ mé noehya sín nkehe tí xra̱ chꞌe tí lámo̱e sín a. Náhí. A̱ ntá jahará la chojni choxian kíxin kaín xín nkehe kjua̱ko̱na Tꞌaná mé kjuákohárá. 16 Jehya kíxin jahará kjuéyárá tí janhan. Náhí. Janhan mé kjuéyá tí jahará kíxin tsotja̱hárá xra̱, a̱ ntá éxí yóhe̱ to xé mé chrókꞌuaxrje jína tí xra̱ si̱chꞌenará kíxin chrókꞌuitjáyanhya. A̱ ntá Tꞌaná mé tsotjáhará chꞌán kaín xín nkehe tsjanchexínrá ni̱na. 17 Mé xi̱kaha tétua̱nhanrá kíxin tsotjuèhérá kíchuárá.

18 ’Tí tso̱nínkakonhanrá tí chojni chjasintajni ntá chrókónohará kíxin senó janhan nínkakonna sín. 19 Tí chrókókuèntárá chjasintajni ntá tí sín chjasintajni chrótjuàhárá sín kíxin na̱xa̱ kjéhyará sín. Kjánchó janhan kjuéyá tí jahará kíxin chrókꞌuaxrjékjanxínrá tí sín siín chjasintajni. A̱ ntá tí sín chjasintajni nínkakonhanrá sín kíxin jahará jahyará kuèntárá chjasintajni. 20 Xráxinkáonrá tí nkehe tsítjo̱nka̱rá kíxin tí sín chꞌehe lámo̱e sín xra̱ tjetóxinhya tsꞌe̱to̱an sín.[a] Éxí yóhe̱ chónkìna sín mé xi̱kaha tsochónkíhi sín tí jahará. A̱ ntá tí kuítekaon sín tí nkehe kjuáko̱ha̱ sín ntá kja̱xin tsitekaon sín tí nkehe na̱xa̱ tsjákohérá sín. 21 Mé xi̱kaha sitꞌahará sín kíxin jahará tinkachónkirá tí janhan la ko jehe sín chónhya sín tí nkexro ichrꞌánna kꞌuinka ntihi.

22 ’Tí chrókꞌuinkahya janhan ntihi chrónixja̱hya sín ntá chrókuamáhya sín jie̱. Ntá jié kohya nkerí tsaáxin sín kíxin tí jie̱ tinkákjasin sín. 23 Tí sín nínkakonna mé xi̱kaha nínkakonhen sín Tꞌaná. 24 Chróchóntahya sín jie̱ tí chrókꞌuejókianhya sín ntihi chrókjuásinhya janhan kjuaxroan jié éxí tsíkjasinhya ninkexró senó. Ntá jie ó kꞌuíkon sín kaín tí kjuaxroan, a̱ ntá kjónté nínkakonna sín tí janhan la ko nínkakonhen sín Tꞌaná kja̱xin. 25 Mé xi̱kaha tso̱nhen kaín tíha kíxin ntá tsoxiteyá tí nkehe ntáchro tí ley kuènte sín kíxin: “Kohya jie̱ kjuásian janhan ntá kjónté kónínkakonna sín.”[b] 26 A̱ ntá tsi tí nkexro tsjinki̱tsa la ko sinchechéhe̱ a̱sánrá. Tíha mé tí Ncha̱kuen Dios chaxín. Janhan mé tsochrꞌan chꞌán kíxin tí kjuachaxin kuènte Tꞌaná. A̱ ntá jehe chꞌán mé tsochrónka nkexrí tjén janhan 27 la ko jahará kja̱xinrá tso̱chro̱nka̱rá nkexrí tjén janhan kíxin tí xrankíxixín la kꞌuéjóni jnkoko̱á.

<- SAN JUAN 14SAN JUAN 16 ->