1 Jahará rícorá chrókuinhínrá tíhi. Chrótsja̱nkará la ko chrókꞌuíyatorá kíxin tí nkehe tso̱nhanrá tsjasótiará. 2 Tí nkehe rícoxínrá la ó tsíkótje la ko tí ka chontará la ó tsíkꞌin kué. 3 Tí oro la ko tí plata chontará ó tsíkóchji̱sen. Tíha mé tja̱ko̱xi̱n kíxin nkexrí tso̱nhen nto̱ará tsoche. ¿Nkehe tso̱nhen kjuásintonrá nkehe kíxin ó tsi tí ya̱on tsjixixín? 4 A̱ ntá tí nkehe chrókjuacha tí sín kjuítꞌahará xra̱ la kjuénkehyará sín la ntá tjanchia sín jie̱ tí jahará la tꞌèya sín, ntá Ìnchéni imá tꞌe̱to̱an mé kuínhin kíxin xi̱kaha ichro tí sín kjuíchꞌe xra̱. 5 A̱ ntá ntihi chjasintajni la náxrjón tjejorá la kaín nkehe tóxrjínhanrá chꞌerá la éxí iko imá jína ine la tsíkótsa̱nka̱ la ntá itsji ya̱on ntá itsꞌen la mé xi̱kaha tso̱nhanrá. 6 Kíxin jahará la kjui̱nchekjasóterá la kꞌoyánrá chojni ninkehó jie̱ chóntahya kjónté kohya nkehe kjuítꞌahará sín.

7 Méxra̱ kíchó ni, chrókóninkákonhyará chróchonhénrá tsokjanjian Ìnchéni. Éxí tí chꞌín chꞌe xra̱ no̱nte̱e chónhen xrakoa chrin senó la ko tí chrin tsjixixín ntá tsotjá chꞌán tí nkehe náxrjón kꞌóna. 8 Mé xi̱kaha jahará la kja̱xin chrókóninkákonhyará chróchonhénrá chrókóxrjéhyará kíxin tí ya̱on itsi Ìnchéni la ó chjina tsi. 9 Kíchóni, chrókoninkákuenhyará kíchuárá kíxin ntá chrókjuanchahya Dios jie̱ tí jahará kíxin Dios la mé tí juez la ó tjen chꞌán tí ntója puerta. 10 Kíchóni, chrókuankíhírá éxí tí sín kꞌuéchrónka itén Dios kꞌuéchrónkaxín sín kjuachaxin ihni̱é Ìnchéni. Jehe sín kjónté kjuasóte sín la kónínkakonhya sín. 11 A̱ ntá jeheni ntáchroni kíxin kóchéhe̱ tí sín a kjónté kjuasóte sin la kjuacha sín. Jahará la ó kuinhínrá kíxin nkexrí kónhen chꞌín Job. Ó nohará kíxin Ìnchéni kjuínki̱tsa chꞌán hasta kjuixixín kíxin Ìnchéni la imá jína chꞌán la kui̱konóe̱he̱ chꞌán tí chꞌín a.

12 A̱ ntá kíchó ni, chrókuakjénxi̱nhyará ihni̱é Dios tjen nkaya nkajní la ko ni chjasintajni la nijnko nkexro chrókꞌuakjénxi̱nhyará. Tí chróntáchrorá chaxín la chaxín la tí náhí la náhí kíxin Dios la chrókjuinchekjasótiahyará.

13 A̱ ntá jnkojín tí jahará náxrjónhya tjejorá la chrónixje̱hérá Dios, a̱ ntá jnkojínrá náxrjón tjejorá la chrótsjerá kuènte Dios. 14 A̱ ntá tí jnkojín nkexro níhi la chrókꞌuíye̱he̱ sín tí sín táda tꞌe̱to̱an kuènte ni̱nko kíxin ntá chrónixje̱he̱ sín Dios kíxin tí si̱nníhi la ko chróchjéhe sín aceite tí sín a kjuachaxín ihni̱é Ìnchéni. 15 Chrónixje̱hérá Dios kaín a̱sánrá kíxin tí sínníhi chrókuíto̱he jína la ntá Ìnchéni chrókjuinki̱tsa sín, a̱ ntá ichrén jie̱ kjuasin sín la jehe chꞌán sinchekꞌitjáyan tíha. 16 Méxra̱ chróchenkará kíchuárá tí jie̱ chontará la ko chrónixje̱hérá Dios kíxin chrókuito̱hará jína. Tí nixje̱he̱ Dios ijnko chojni jína tinkáchónki Ìnchéni la chónta nchónhya kjuachaxin tíha. 17 Tí chꞌín Elías, tí nkexro kꞌuéchrónka itén Dios, mé ijnko chojni éxí tí jeheni la jehe chꞌán kjuanchehe chꞌán Dios kaín a̱sén chꞌán kíxin tsꞌaniáhya chrin la ntá kꞌuániáhya chrin chjasintajni iní nánó ko tꞌo̱. 18 A̱ ntá chrꞌéxi̱n kjuanchehe chꞌán Dios kíxin tsꞌaniá chrin la ntá kꞌuániá chrin ínaá chjasintajni la jína kꞌóna tí nkehe kꞌue̱nka̱ sín.

19 Kíchóni, tí jnkojín chojni chrókjuichroe chrókuíto̱he tí nkehe ntoá la í jnko nkexro chrókjuinki̱tsa kíxin chrókjan tí nkexro a 20 la chrókónohará tí jahará kíxin jnkojín chojni tjinki̱tsa ijnko nkexro chónta jie̱ tsokja̱nxi̱n tí nti̱a jínahya kꞌuékꞌaji chꞌán la ntá ó kjuínki̱tsa kíxin tsaáxin a̱sén tí chꞌín a kíxin tsꞌitjáyanhya chꞌán la ntá chrókꞌuitjáyan tí nchónhya jie̱ kꞌuéchónta chꞌán. Ó tjen.

<- SANTIAGO 4