HEBREOS 12

Jehó Cristo chrókuinkáchónkini

1 Méxra̱ tí jeheni la tsíkꞌantátjenni nchónhya chojni tsíkja̱ko̱xi̱n sín tí fe kꞌuéchónta sín, la ntá chrókuíto̱heni ntáha kaín tí nkehe tꞌinkákonhe̱n, la ko tí jie̱ chrókjuachroeni, a̱ ntá chrókjuichꞌeni jína tí xra̱ chóntani la ntá chrókjuachani a̱ntsí má chrókónoheni. 2 Jehó Jesús chrókuinkáchónkini kíxin jehe chꞌán kjuanjon tí fe chóntani kíxin jína kjua̱ko̱xi̱n chꞌán kjuínchexiteyá chꞌán, la kjuasótexín chꞌán tí ntacruz, la kuáhya chꞌán kuentá kósuèhya chꞌán tí nkehe kónhen chꞌán ikꞌuén chꞌán, kíxin nohe chꞌán kíxin tsjixin tsjasóte chꞌán ntá náxrjón tsjakꞌe chꞌán la ko tso̱chéhe̱ chꞌán kíxin tsjakꞌetja̱xi̱n chꞌán tí tja chjina tí trono kuènte Dios.

3 Méxra̱ chrókjuenka̱yáxinrá jahará nkexrí kjua̱ko̱xi̱n chꞌín Jesús. Tí sín chónta jie̱ imá kjuínchekjasóte tí jehe chꞌán la kjónté jahará xi̱kaha chrókjuasóterá la chrókóxrjéhyará chrókuinkachónkirá chꞌán. 4 A̱ ntá jahará na̱xa̱ kꞌuénxinhyará tí tjanjo̱nkoará tí jie̱. 5 ¿Á kꞌuitjáyanhanrá tí jahará tí nkehe ntaxraxinkaonrá Dios kíxin éxí xje̱en chꞌán tꞌikon chꞌán tí jahará? Éxí ntáchro xroon itén Dios kíxin:

Xje̱enni, tóninkákonhya tí nkehe tjentuáha Ìnchéni, chrókꞌuaváhya tí chrókjuentuáha chꞌán.

6 Kíxin Ìnchéni mé tjentuéhe tí sín tjuèhe chꞌán la ko nchekjasóte kaín tí sín tsꞌáyéhe̱ chꞌán tsꞌóna xje̱en chꞌán.[a]

7 Chrókuítekáonrá tí nkehe tꞌe̱to̱an Dios kíxin Dios tꞌikon kíxin éxí xje̱en chꞌán tí jahará. ¿Á siín ijnko itꞌé xjan chrokjuentuéhya tí xje̱en? 8 A̱ ntá tí chrókjuentuáhyará Dios tí jahará éxí tjentuéhe chꞌán kaín tí xje̱en chꞌán, ntá jahará kjá jehya xje̱en chꞌán chaxín. 9 A̱ ntá tí na̱xa̱ kꞌuéchánjanni, na mé itꞌéni ntihi chjasintajni kjuentuéhe tí jeheni, la jeheni kjuikosáyeheni sín. A̱ ntá xi̱kaha a̱ntsí chrókjuinchexiteyéhe̱ni Itꞌéni tjen nkaya nka̱jní kíxin chróchóntaxínni kjuachón. 10 Itꞌéni ntihi chjasintajni kjuentuéheni chꞌán kjónté kánhyó sé éxí nkexrí kóxrjínhi̱n chꞌán; a̱ ntá Itꞌéni Dios tjentuéheni chꞌán kíxin jnkojína chrókꞌuejóni, kíxin chrókꞌónani tjóá kíxin jehe chꞌán la tjóá chꞌán. 11 Chaxín ninkehó xi̱kaha chrókjuinchekjasóte Dios tí jeheni chrókóxrjínhi̱nni tí na̱ntá chrókónhenni kíxin tí kjuatjoté. A̱ ntá xi̱kaha tsꞌitjaxínni tí kjuaxróxin éxí ijnko nkehe náxrjón kjuachani.

Tí sín tjanoá tí kjuasáyé Dios

12 Méxra̱ tjisójirá tí tjárá tsíkóxrjé la ko tóchꞌinrá chóntahya fuerza, 13 la ko chrókjuéyárá tí nti̱a ntoá. A̱ ntá tí to̱tárá níhi xitjahya tjixinrá chrókuito̱he jína la ko chrókóníehya ínaá.

14 Chrókóxakonhanrá kíxin kjuaxróxin chrókꞌuejorá kaín rá, jnkojína tjóá chrókꞌuejorá. A̱ ntá tí tjuáhya chrókꞌuejorá la xitjahya tsꞌikonrá Ìnchéni. 15 Chrókóxakonhanrá kíxin nijnkorá chrókui̱to̱éhyará tí kjuasáyé Dios la ko nijnkorá chrókꞌónahyará éxí ijnko nuèe ka tsjá chónta veneno chrókóníexín tí í so chojni. 16 Nijnko tí jahará chrókjuásinkoará jie̱ ijnko chojni chjin ókjé, la ko chrókjo̱niéhyará tí nkehe tjóá éxí kjuíchꞌe chꞌín Esaú, kíxin jnkoko̱á comida kjuínchekjixin chꞌán tí nkehe chróchónta chꞌán kíxin xjan sa̱o jehe chꞌán.[b] 17 Jahará ó nohará kíxin chrꞌéxi̱n, tió tjinkaon chꞌán kíxin chrókjuincheyaon itꞌé chꞌán tí jehe chꞌán la í xitjahya tso̱yaon chꞌán kíxin kohya nkexrí chrókꞌuixitóxi̱n tí nkehe tsikjichꞌe chꞌán kjónté imá chrótsjánka chꞌán.[c]

18 A̱ ntá jahará la jehya kóchjinará éxí kóchjina tí sín israelita tí jna̱ jína chrótsé sín tí síchrꞌákjen xrohi, tí tjen tí sítié tꞌinkaséyanhya la ko tí chjéhe xri̱nto̱. 19 Na ni tsíkíenhyará tí tsíntáchro trompeta, la ko tí itén Dios nixja. A̱ ntá tí sín tsíkinhin tí tan a na mé chronòa sín kíxin í chrónixjahya chꞌán ínaá,[d] 20 mé xi̱kaha ichro sín kíxin tsjachahya sín sinchexiteyá sín tí nkehe kꞌue̱to̱an chꞌán kíxin “Tí nkexro tsinkátja tí jna̱ mé itsꞌen, la ixro̱ la o̱ chica lanza chrókꞌóyánxin sín, la kjónté ijnko ko tsinkátja va tí jna̱ la chrókꞌuen.”[e] 21 Ijnko kjuachrakon jié tí nkehe kꞌuíkon sín la kjónté chꞌín Moisés tsíntáchro chꞌán kíxin: “Kja̱xin síxrànka̱na chrakonna.”[f]

22 A̱ ntá jahará tsíkóchjineherá tí jna̱ Sión, tí chjasén Dios tjechón, mé tí Jerusalén itjen nkaya nka̱jní, la ko nchónhya miles ángel 23 tsíkójnkotsé sín kíxin tsochjéhe sín kjuasáyá Dios, la ko tí sín tsíkójnkotsé sín tsíkꞌóna sín xje̱en Dios sa̱oxín tsꞌínixín ihni̱é sín nkaya nka̱jní. Jahará tsíkóchjineherá Dios, jehe chꞌán mé Juez sinchekito̱exín chꞌán iji̱é kaín chojni, la ko tsikóchjineherá tí ncha̱kuen chojni jína ó tsíkjinchetjóá Dios, 24 la ko tsíkóchjineherá chꞌín Jesús, jehe chꞌán mé nixja̱xi̱n chꞌán tí pacto ni̱xin kíxin tí ijni̱é chꞌán kꞌuítji kjuínchetjuáxinni chꞌán. A̱ ntá a̱ntsí jína chrónkaxín tí ijni̱é chꞌán, a̱ ntá kánhyó tí ijni̱é chꞌín Abel.

25 Chrókóxakonhanrá chrókuítekákonhénrá tí nkexro tjenixja. Kíxin tí sín kjuanoá Dios tió kjuínchexraxinkaon chꞌán tí jehe sín ntihi chjasintajni ó la kuaáhya sín; a̱ ntá a̱ntsí má xitjahya chrókuaáni tí chrókuitekakuenhyani tí nkexro nchexraxinkaonni kui̱xi̱n nkaya nka̱jní. 26 A̱ ntá tí itén Dios tí ya̱on a kjuínchekinkí nonte. A̱ ntá jie tsíntáchro chꞌán kíxin: “A̱ ntá ínaá jehya nonte ó si̱ntakinkiá. Náhí. Kja̱xin nka̱jní si̱ntakinkiá”,[g] 27 A̱ ntá tí tsíntáchro chꞌán kíxin “ínaá” mé tꞌaxrjexín kíxin tsjakjìin chꞌán tí nkehe jína tsinkí, a̱ ntá tsíto̱he chꞌán tí nkehe xitjahya tsinkí. 28 A̱ ntá tí tsꞌáyéhe̱ni tí kjuachaxin kjuanjon Dios la xitjahya tsꞌixinkí tíha. Méxra̱ chróchjéheni Dios kjuasáya chróxraxinkaonni chꞌán chróchrako̱nhe̱nni chꞌán 29 kíxin tí Dios kuènteni mé éxí ijnko xrohi tsjacha sinchekꞌitjáyan kaín nkehe.[h]

<- HEBREOS 11 HEBREOS 13 ->