9
Ahi mul rie lat meatin keil musil rendemien onen
1 Navit maselus min kami usil tuak keil koa avi Siu. Asa koa namul naselus usili vi anatin. Navi onen Kristo ka Ninin Votut koa mul enau vit kilea minau keke narmultei maliluvos.
2 Namul nalonge tisa houlu ka tinok mah
3 ven meatin keil kati onak koa avi Siu. Ka veni tinok mah houlu ven keil, munak nakilea moumoni vakataun usite one, nikur vulie ka nimaen Ahi hesesenda enau ka hesakin inau nirkapiltei mun hetal min Kristo. Ka nasakras makur vulie.
✡ 4 Mulamu, Ahi rie lat koakeil avi me-Isrel keil keke avi meatin keil onen. Kei mumon keil avi titan ka vothot en hetetamenien onen min keil. Kei mumon hatkatien takeih keil ral min keil ka san mengkatien keil onen min keil. Ahi visein keil en sakien koa mal avaha netan mini, ka san hatkatien tetahos keil houlu min keil.
✡ 5 Keil aka en ara onen vati avu keil one telamu suval Ebraham, Aesak ka Siekob. Ka navong Mesaea mita mai vi meatin koa aven mul, kei mai kistal ka en vatiamal one. Kei vi Ahi koa hetetamen imok en tounah vasi. Mal vinvin keke avahati lat isen vahina nesa lises ka lisenges. Anatin.
✡6 Mulamu, Ahi vat kati keke voutut me-Isrel keil. Ka rovitei hatkatien onen Ahi koa mot. Veni rovitei me-Isrel vasi keil koa avi meatin keil kati onen Ahi. ✡ 7 Ka rovitei koakeil vasi aka en ara onen Ebraham koa avi titan kati en meten Ahi. Veni Ahi viteni min Ebraham vit, “Vatiamal keil koa navat kati minuk, keil ikistal ika en Aesak.” Senesis 21:12 8 Koanek rie lati keke rovitei titiali vasi keil koa amusil ara koa akilea avahi natin Ahi. Ka vi titiali keil koa amusil hatkatien onen koa avi natnali keil kati en meten. ✡ 9 Veni, Aesak, avasi musil hatkatien onen Ahi koa vit, “En avong ekek en sua koa hemai, Serah hekur natmali.” Senesis 18:10
10 Ka sakien enek kistal avong tamun, en avong koa avu telamu orer koa Aesak kur Rebekah, ka kei meas en maeh elu. ✡ 11-12 Ka navong lumul veah en vangen mama onealu, Ahi viteni mini vit, “Tai koa hekatau hemai hemarite mok helin koa helamu.” Senesis 25:23 Kei viten koanik navong lurmumon etai veah tounah koa tahos vuo tisa. Koanek rie lati keke Ahi mul vise meatin keil musil rendemien onen ka romusiltei umen koa keil amumoni. 13 Koanek suval asa koa Ahi viteni en Tus Votut vit, “Envatien onak mul en Siekob; ka Esao, naseseini.” Malakai 1:2-3
14 ?Mukave, koanek rie lati keke Ahi mul mum romaltei? !Vuo, romukteinek! 15 Veni kei viteni min Mosis vit,
“Inau enges nitie lat meatin sei koa ek hemahisi,
ka nikataun keil housil rendemien onak.” Eksodas 33:19✡ 16 Sakini, Ahi mul rie lat meatin keil musil enmahisien onen enges, ka romusiltei asa koa meatin keil ten out netan e vati vuo akilea avoumoni.
✡ 17 Koanek suval asa koa Ahi viteni min asuv houlu ten out Isip en Tus Votut vit,
“Inau nalinguk kovi asuv houlu keke nakilea matie lat keihoen onak vaka enuk keke hetetamenien ten isok kilea vaka vasi out en out netan.” Eksodas 9:16 18 Sakini, mul en Ahi enges keke vatie lat isei keil ikur enmahisien onen, ka isei keil hesakin vatie hekeih keke avalong seseini.
✡ Ahi rie lat vurohien ka enmahisien musil rendemien onen
19 Vahesa tai en kami vahiteni minau vahit, “?Munak Ahi enges mul rie lat isei hekur enmahisien onen ka isei helong seseini, hemukave Ahi kilea vahotini keke meatin sei mum romaltei? ?Isei kilea vating koe asa koa Ahi ling kati?”
20 ?Ka tuak, keik kovi isei keke kovasel vatal min Ahi? Veite koa meatin mumoni en tanhilhili sakras vasel mini vahit, “?Vensa komumonau mukok?”
✡ 21 Veni meatin koa mul mumon veite keil en tanhilhili kilea voumon keil vousil rendemien onen. Mul en kei munak en vati voumon hati tanhilhili vamai vahi veite valu, tai ten more ale keil ka tamun ten avong vasis.
✡22 Ka koanik suval asa koa Ahi mumoni. Kei en vati vatie lat vurohien onen vaha kat tisaen ka voumon meatin keil availea en keihoen onen. Ka avaseini mal vinvin keke hou lin tei en meatin keil koa mumoni ven tisaen one, rendemien onen tetaveah ka mul vuli kat vurohien onen va kat keil. ✡ 23 Ka kei vuli kat vurohien onen vahothot eni keke kei vilelau en tahosien. Sakini, mutah tahosien en koakeil rie lat keil avakur enmahisien onen, veni kei sak mesein keil tuai avato vatal mini en muohien ten hetetamenien onen en out nesa. ✡ 24 Ka ir emun rovi koakeil enek, koa kei vise ir ran Siu keil ka ran koakeil emun arvitei Siu. 25 Koanik vi asa koa Ahi viteni ka en provet Hosea vit,
“Meatin keil koa ‘arvitei onak’
nihise revi keil en ‘meatin kati keil onak.’
Ka kei koa ‘envatien onak tovuol ien,’
nihise revi en ‘kei koa envatien onak mul ien.’ ” Hosea 2:23
26 “Ka en out kati koa Ahi viteni min keil vit, ‘Kami mirvitei meatin keil onak,’
en out enek, ihise keil en ‘ehon keil onen Ahi koa moul.’ ” Hosea 1:1027 Ka Aesea mun vit luvat tounah usil koakeil ten out Isrel vit,
“Avaseini me-Isrel keil avi houlu asuval veien ten atas,
Ahi houtut teis en keil.
28 Veni Ahi lei rahit usite onen meatin vasi keil en out netan tuai ka, hekalah,
hesani min keil mahien vasi keil housil asa koa kei lesi mal.” Aesea 10:22-23
29 Koanek suval asa koa Aesea viteni mulamu vit,
“Vahit Ahi Asuv ten keihoen vartie lattei enmahisien onen min ir ka varmaentei tei en titiali keil orer avamoul avales,
ir rokilea rovamai rovasuval out Sodom vuo out Komorah tuai koa vurohien onen Ahi sakin meatin tovuol emun avato ien.” Aesea 1:9
Pol vis min Ahi en usite onen Siu keil koa asesein Iesu Kristo
30 Sakini, rolesi keke koakeil arvitei Siu, koa arsak vistei keke avamai avamal en meten Ahi, keil varei arokoli ka akur maluen ka en sise ten demkatien.
✡ 31 Ka me-Isrel keil koa asak visi avamai avamal en meten vaka en sise ten mengkatien keil, keil arkurtei.
✡ 32 ?Ka vensa varei arkurtei maluen? Veni keil armusiltei sise ten demkatien keke avahotini. Vuo, keil asak visi avahotini vaka en asa koa amumonis. Ka sakini, keil amusavoi en ahat koa Ahi lingi keke meatin keil amusavoi eni.
✡ 33 Koanek suval koa Tus Votut viteni usil Kristo vit,
“!Allesi! Naling ahat tai en out Saeon luhu en me-Isrel keil keke isavoi eni ka imot.
Ka koakeil aling demkatien one eni, kei hersakintei keil imemou.” Aesea 28:16✡
<- Rom 8Rom 10 ->
