Link to home pageLanguagesLink to all Bible versions on this site
18
Ahi sakin tounah keil koa amul en taon ten out Babilon *Babilon vi selusien suai usil mari taon ten out Rom. amerangle
1 Katau en koanek, nales angelo tamun ka en out nesa. Hetetamenien onen marite ka muohien onen vihil ka vasi out netan. 2 Kei makul keih vit,
“!Ahi hesakin mari taon ten out Babilon hemerang! ✡Aes 21:9; Ser 51:8; Rev 14:8; Aes 13:21; 34:11; Ser 50:39
!Kei hemerangle varei!
Meatin keil teni hetovuol emun.
Vuli eim keil teni hemai hehi out tatosuaien
onen temat keil ka ninin tisa keil enges.
Aman tatisa keil enges ito kos ien.
3 Mari taon enek heles vurohien onen Ahi veni kei suval ahin koa vi hoeaso
koa mul leh rendemien onen meatin ten kantri vasi keil keke umai amum tisa ral mini.
Kei hekur mahien veni mum tisa ral min asuv houlu keil ten out netan.
Anatin, hekur mahien veni kei en vati mok hehilelau en tounah tetahos keil ka sakin koakeil vasi ten out netan asalem en tounah akur mani houlu rani.”✡Aes 23:17; Ser 51:7; Rev 14:8; 17:2

4 Evus, naraengon rea tateisav tamun ka en out nesa vit,

“!Meatin onak keil almea! !Almea rani!
!Minapiltei en tisaen onen!
!Mihelei kati keke minakurtei mahien natal mini!✡Aes 48:20; 52:11; Ser 50:8; 51:6,9,45; 2Kor 6:17
5 Veni tisaen keil onen susupat vina nesa rokol out nesa,
ka Ahi mundem kat sakkalkalien keil onen.✡Sen 18:20-21; Ser 51:9
6 Mihoumoni mini hesuval koa kei mumoni min kami.
Mihesa kesi mini hatte helu hesuval koa kei mumoni.
Kap ten mahien koa kei sani min kami mimuni,
mihesien uaen ten mahien eni koa hekeih imok hatte helu keke kei hemuni.✡Sam 137:8; Ser 50:15,29; 2Tes 1:6
7 Mihesan mahien mini ka mihesakini helonge hetisa hehi houlu.
Anatin, mihoumoni mini hemal hevinvin en hetetamenien ka tounah keil ten out netan koa kei lahi ven kei sasen.
Ven kei vit sasen eni vit,
‘!Inau narondan ekok ka navi Kwin!
Narvitei vatina tai ka nasakras matang.’ ✡Aes 47:7-9
8 Ven selusien ten hetetamenien onen,
mahien keil onen hemai hesuti ka hou lini en avong hetas: ✡Rev 17:16; Ser 50:34
mesaien keil ipuruni, kei hetang, ka amai heati.
Ahang hemai hean lini,
veni Ahi Asuv koa mul lei rahit usite onen,
keihoen onen marite.”

9 Asuv houlu keil koa amumon sakien tatisa ral mini ka akapil ral mini en envatien onen en tounah keil ten out netan, navong keil iles tupas ten ahang koa kan lini, itangisi ka simete hemotmot. ✡Esek 26:16; 27:30-35 10 Keil ilomal soutin, veni imetau anakur mahien natal mini. Keil ihit, “!Aue li, tisa vis tisa mok min mari taon ten out Babilon! Avaseini keihoen onen marite, en avong havivis, kur vasin mahien onen.” ✡Esek 26:17; Dan 4:30

11 Meatin keil ten out netan koa asalem en tounah, keil emun itangisi ka simete hemotmot, veni meatin tovuol emun koa vahul tounah ran keil. 12 Anatin, meatin tovuol vahul tounah koa amumoni en gol, silva, ahat koa merentas ka veimesau tetahos keil. Irvultei mun more eisin keil koa muoh, vilhili ka pepol vatal min eisin tetahos koa avise en ‘silk.’ Ka meatin tovuol emun keke vahul tounah keil koa amumoni en more ai keil, en lohon tirendan keil, en aean koa avise en ‘brons,’ ka en ahat koa avise en ‘marbel.’ ✡Esek 27:12,13,22 13 Tounah koa sakin anien vite moutut tahos suval sinamon, ka senta keil suval mir, ka frangkansen il sesuk. Anien suval uaen, oel, pulaoa ka uit, irvultei mun. Meatin tovuol vahuli tirendan keil suval buluk, sipsip, ka hos vatal min kat teni. Meatin tovuol vahis keil vahul lat moulien onen meatin keil keke avamai avahi slev keil one. 14 Meatin keil koa asalem en tounah ihiteni mini ihit, “Tounah keil tetahos koa em vati kovakuri avupuol. Ka tounah keil koa kovilelau eni mulamu ral tounah koa sakinuk kovutuk veni, arasil ranuk kosa ka kirvotintei mun.” 15 Koakeil enek akur mani houlu en tounah keil koa meatin keil avuli ran keil, navong iles mahien onen Babilon, ihati keil soutin veni imetau avakur mahien vatal mini. Keil uai ka itangisi ✡Esek 27:36 16 ihit,

“!Aue li, koanik tisa vis tisa mok!
Mulamu, mari taon ten out Babilon musin en mormore eisin keil koa muoh, vilhili ka pepol.
Mulamu, kei mosan eni en gol, ahat keil koa merentas, ka veimesau tetahos keil. ✡Esek 28:13; Rev 17:4
17 !Ka en avong havivis, tounah vasi keil onen avupuol rani!”
Navong vatihos keil ten sip, boskru teni, meatin keil koa amul ien ka meatin sav keil koa avotin moulien one en atas alesi, keil amulomal soutin enges. ✡Esek 27:27-29 18 Navong ales tupas ten ahang koa mul kan lin taon enek, amis keih ka avit, “!Aue li, taon sav tovuol vasuval mari taon koanik!” ✡Esek 27:32 19 Sakini, arivin vulimeas en vatie vatie lati keke alonge tisa, ka amis keih avit, ✡Esek 27:30-34
“!Aue li, koanik tisa vis tisa mok!
Mulamu mari taon ten out Babilon kur tounah houlu en sip
ka meatin keil ten sip akur mani houlu rani.
!Ka en avong havivis, tounah vasi keil onen vupuol rani!”

20 Evus, nalong rea tai koa vit, ✡Dut 32:43; Sam 96:11; Aes 44:23; 49:13; Ser 51:48

“Kami ten out nesa,
mihesi kami veni amu rasilin mari taon enek!
Kami mun koa mivi meatin keil onen Ahi, eiloheh keil ka provet keil, mihelonge hetahos,
veni Ahi lei rahit usite onen tuai ven tounah tisa koa kei mumoni min kami.”

21 Evus, nales hetetamen tai onen angelo keil mai vou lat mari ahat tai koa meas ka lapuni va en atas. Navong mumoni vit,

“En sakien enek, mari taon ten out Babilon emun,
hesuval koa Ahi hehou lati ka helapuni heha netan,
ka meatin keil irlestei mun. ✡Ser 51:63-64; Esek 26:21
22 En taon enek, meatin keil irlongtei mun
romarom ten harp, flut, hon vuo ren meatin.
Meatin keil amumon tounah keil ten mosanien,
miherlestei mun keil eni.
Verien ten koakeil avilei uti uit hemai hehi pulaoa, irlongtei mun.✡Aes 24:8; Esek 26:13
23 Laet hervilhilitei mun eni.
En taon enek, romarom ten sien onen meatin ka ahin keil koa aretalihe,
mihertaengontei mun. ✡Ser 7:34; 16:9; 25:10; Aes 23:8; 47:9
Mulamu, meatin keil koa asalem en tounah,
keil avi hetetamen imok en out vasi netan.
Ka ral min sakien ten matsik onen
kei luvos meatin vasi keil ten out netan.”

24 Ahi lei rahit usite ten taon ten out Babilon veni votin ran provet keil, ka ran meatin keil onen amul ien. Anatin, kei lesi keke Babilon mu vinvini meatin keil houlu ten out vasi netan. ✡Ser 51:49; Esek 24:7; Rev 6:10; 17:6; 19:2

<- Revelesen 17Revelesen 19 ->