1 Evus, nales hetetamen tamun onen angelo keil mita netan ran out nesa. Kei kav koe en mahmah keil ka mitiet tai karahit vatin. Veinan suval meteiai ka alen keilu lusuval ahang koa vilhili vina nesa. 2 En hen, kei kur kat pepa tai koa avue mules koa selusien mul ien. Ling alen matu va en atas, ka alen koa meil lingi mul en atan. 3 Evus, viso keih suval makulien onen laeon tai. Navong viso evus, rea oulu (7) muroh keih suval voulul. 4 Navong rea keil enek selus mukok, inau nasak meseinau keke matisi. Ka naraengon rea tai selus ka nesa vit, “Asa koa voulul viteni en avong oulu (7) enek, kihuli kati hel enuk ka konatis lattei.” [a]

5 Evus, angelo koa nalesi mulomal en atas ka en atan mutelan hen matu vina nesa [b] 6 ka mumon hatkatien takeih en isen Ahi, koa moul lises ka lisenges, koa mumon teilang nesa ka out netan, atas ka tounah vasi amul en keil. Angelo viteni vit, “!Anatin eli, Ahi hertountei mun! [c] 7 Ka navong angelo koa oulu (7) en keil uh amaru onen, Ahi houm vasin lingkatien suai keil onen. Houmoni hesuval koa kei vit meseini tuai min provet keil koa avi eiloheh keil onen.” [d]

8 Evus, rea koa naraengoni mulamu selus eris ka en out nesa ka viteni minau vit, “Kiha kikur pepa koa avue tuai mules en hen angelo koa mulomal en atas ka en atan.”

9 Sakini nuva ven angelo enek ka navisi vasan pepa enek minau. Kei viteni minau vit, “Kikuri ka kiani. En vangom hekun, ka en ongom, kei hekas hesuval hani.” [e] 10 Sakini nakur titi pepa enek ran hen ka nakani. Navotini keke kas suval hani en ongok, ka navong nakani evus, kei viles esuk mai kun en vangok.

11 Evus, aviteni minau avit, “Keik kihit luvat selusien onen Ahi hati tamun usil asa houmoni min meatin tateisav keil koa aka en kantri keil houlu ka selusien keil houlu, ka usil asuv houlu keil.”[f]

<- Revelesen 9Revelesen 11 ->