Namba 13

Mosis sila meatin taleisuaien keil avales out Kenan

Namba 13:1-3,17-21,25-33

1 Iahova viteni min Mosis vit, 2 “En mari vatiamal teindan elu (12), kitie lat metai keil ikeka ran hetetamen sav keil keke kisila keil iha ilei suai en out Kenan, out koa namul nasani min me-Isrel keil.” 3 Sakini, en out volvol en out Paran, Mosis long kat ren Iahova ka sila metai teindan elu (12) koa amul alei kat vangi me-Isrel keil.

17 Navong Mosis sila lat keil, viteni min keil vit, “Miheha miheka koteh out Kenan, evus, mihelei rahit hou keil en usite. 18 Mihelei vis out. ?Atan enek mukave? ?Meatin keil avi houlu vuo arvitei houlu, keil ave keih vuo ave memerau? 19 Miheha mihelei visi. ?Out enek tahos vuo tisa? ?Meatin keil aro en taon keil koa vieh takeih karahiti vuo vieh tovuol ien? 20 Mihelei vis atan. ?Kei tahos vuo tisa? ?Ka vatiai keil avi houlu vuo atovuol? Miheha en rendemien koa hetahos ka mihendem kati navong mihemai ris, mihekur kat tei heiai koa amoul en out enek.” (Koanek vi avong koa hei grep keil mul men.) 21 Sakini, meatin keil uva ka alei suain out vasi: out volvol en out Saen koa mul en usite saot, uva arokol out Rehob, vesesal en out Hamat, en usite not.

25 Meatin keil taleisuaien out amual alei vasin out Kenan avong hanumau elu (40). Evus, umai ris 26 ven Mosis, Eron ka me-Isrel vasi keil koa arosin keil en out volvol ten out Paran. Navong umai ris, aviten tounah koa alesi ka arie heiai keil koa akuri. 27 Keil aviteni min Mosis avit, “Komai meles out enek, ka atan teni tahos imok ka amas mul ien. Koanik vi heiai teni. 28 Ka meatin keil koa amul en out enek avi avkeih keil. Taon keil one emun amariso, ka vieh keil koa karahiti keih vis keih. Ka tisa mok, meles marmari meatin keil en out enek koa atetaveah koa aka en vatiamal onen Anak. 29 Me-Amelek keil aro en usite saot, ka me-Hit, me-Sebus, ka me-Amor aro en hou keil. Ka me-Kenan keil aro vesesal ven atas ka out keil koa musil vali Oaisal Sodan.”

30 Ka Kelep mai vesesal ven Mosis en meten meatin keil, mumon keil tine merau ka vit, “!Rovaha varei, rovakur out! !Veni rokileas rovou lin keil!”

31 Ka meatin sav keil koa uva ral min Kelep avit, “!Vuo! Ir rorkeihtei rovou lin keil. Meatin keil ten out enek, ave keih imok mulin ir.” 32 Sakini asakin selusien ten luvosien karahit me-Isrel keil usil atan koa uva alesi koa sakin rendemien one mot. Keil avit, “Atan enek mul san matien min koakeil aro ien. Ka koakeil vasi koa aro en out enek atetaveah.✡Sen 6:4 33 Komai meles keil ave marmarite ka atetaveah, melonge keke mesuval titi kal keil, ka keil iles komai hemukonek eli varei.”

<- Namba 12 Namba 14 ->