1 Iesu ral min meatin onen keil amu koteh Mari Oai ten out Kaleli ka umai en out keil koa amul rahit meteimal ten out Kerasa. 2 Ka navong keil amea ran vot, meatin koa ninin tisa mul ien kistal ran out tatetahinien, mai ven keil.[b] 3 Kei matil en valengeihat, en out koa aling teiai onen meatin koa mat mul ien. Meatin tovuol vahuli kati, vuo vapar kati en viau takeih. 4 Avong houlu apar kat hen ka alen en viau takeih, ka lises, kei rali kotehei. Meatin tovuol vavinvin vahuli kati. 5 Meneai ka vongien, kei mual en out tatetahinien ka hou keil koa amul vesesal, ka mul makul ka mul rei aven en ahat takan keil.

6 Navong meatin enek les Iesu soutin neli, muloh va veni ka retengeiril mini. 7 Ka viso vit, “?Iesu, Natin Ahi ten out nesa, asa kovit kovoumoni minau? !Kihat kati minau en isen Ahi keke konapuruntei inau!”[c] 8 (Meatin enek viteni mukok ven Iesu viteni tuai min ninin tisa keke hemea rani.)

9 Sakini, Iesu visi vit, “?Isom isei?”

Meatin enek vit risi mini vit, “Isomai ‘Houlu,’ ven komai houlu memusing kat meatin ekek.” 10 Kei peah Iesu mok vit nahile lattei ninin tisa keil anaha ran out keil koa vesesal en out enek.

11 Vesesales en out enek, vuas houlu amul akanian en usihou tai. 12 Sakini, ninin tisa keil apeah Iesu, “Kimaen komai meheha en vuas keil ekek.” 13 Hatte tas, Iesu vile lat keil amea ran meatin, uva en vuas keil. Sakini, vuas keil enek, vesesal taosen elu (2000) amuloh avita en veisil, ka uva en Mari Oai ten out Kaleli. Ka keil vasi amarindu, umatmat.

14 Ka meatin keil koa alei kat vuas ametau, ka amuloh avita en meteimal ka asan longlongien va emun en out sav. Sakini, meatin keil umai avit avahotin asa kur out. 15 Navong umai ven Iesu, ales meatin koa ninin tisa mul ien mulamu, kei mul rondan, musin tuai, ka rendemien onen mai tahos. Ka navong meatin keil koa aka en meteimal umai alesi, ulie metau. 16 Ka koakeil ales asa koa kur out usil meatin enek ka vuas keil, arun usili min meatin sav keil. 17 Sakini, meatin keil ten out enek apeah Iesu avit vamea ran out se.

18 Navong Iesu mul vut va en vot, meatin koa ninin tisa mea rani en vati keke vousili. 19 Ka Iesu romaentei. Ka kei viteni suk mini vit, “Kiha teim ven onom keil. Kihiten asa koa Ahi Asuv mumoni minuk ka mukave kur enmahisien enuk.”[d]

20 Sakini, meatin enek va ka vasi out koa avise en Dekapolis,[e] ka mul viten asa koa Iesu mumoni mini. Koakeil vasi araengoni, amutimanin eni.

21 Ka evus, Iesu ral min meatin keil onen uvut uva en vot, amu koteh Mari Oai ten out Kaleli eris. Ka navong Iesu mulomal en out ut, meatin keil houlu akarahiti. 22 Ka meatin tai mai veni, isen Saeros koa vi elda tai ten eim tahihiseien onen Siu keil en out enek. Navong les Iesu, mual veni ka retengeiril en meten. 23 Kei mul peah Iesu keke vakatauni vit, “Natukahin vesesal vamat. Ek vati li kovaling hem eni, vasakini valonge vatahos eris ka vamoul.”[g] 24 Sakini, Iesu musili.

Ka navong Iesu va, meatin keil houlu amul amusili ka amuting rahiti. 25 En vangi meatin keil enek, ahin tai mul koa mesaien onen mama keil muasi sua teindan elu (12), sakras vavus. 26 Ahin enek va les dokta keil houlu ka keil asakras avasak revi mesaien onen. Vul keil en mani vasi keil onen, ka rolongtei vatahos, mesaien enek mai houlu tamun. 27 Ahin enek raengon longlongien usil Iesu, sakini, mual katau en koakeil amusil Iesu keke vatokol eisin omon.[h] 28 Veni en rendemien onen vit, “Vahit matokol eisin omon enges, malonge vatahos.” 29 Ka navong rokol eisin omon Iesu, hatte tas, mesaien onen vus rani. Ka kei long kilea keke aven mai ris tahos.

30 En hati avong enek, Iesu kilea varei keke keihoen mea rani. Sakini, viles les meatin keil ka vis keil vit, “?Isei rokol eisin omak?”[i]

31 Meatin keil onen Iesu aviteni mini avit, “Kolesi keke meatin keil houlu amul amuting katuk. ?Sakini, vensa kovis isei rokol eisin omom?” 32 Ka avaseini, Iesu viles ka mul lekat isei rokoli.

33 Ahin enek kilea keke aven mai tahos, ka mai ven Iesu ka retengeiril en meten, tin maleilei houlu. Kei vit lat tunien usil mesaien onen min Iesu. 34 Iesu viteni mini vit, “Mama, kosas eke, demkatien onom sakinuk komai kolonge tahos ka mesaien onom evus ranuk. Kiha hetal min tomat onen Ahi.”[j]

35 Navong Iesu mul semau selus, telmali vahis telka teim sen Saeros. Telviteni mini telvit, “Natmahin mat eli tuai. Konahistei mun Tiser enek vamai.”

36 Iesu raengon asa koa telviteni, ka avaseini, viteni min Saeros vit, “Konametautei, kikur demkatien hel enuk.” 37 Iesu kur Pita enges, ka lumali Tiemes ka Sion, ka romaentei meatin sav keil emun avousili.[k] 38 Telva teim, ral min Saeros, ka telles meatin keil alango, amul amis ka amurang. 39 Evus, Iesu va neim ka viteni min keil mukok, “?Vensa mimul milango mukok ka mimurang? Titi atouli romattei, kei mul matil enges.”[l]

40 Ka meatin keil amunge kati. Sakini, Iesu sila keil keke avaha hae. Kei kur tata onen atouli keilu mama, ral min meatin onen keitel, telva en out koa aling titi atouli mul ien. 41 Ka Iesu vuli kat hen atouli ka viteni mini en selusien oneatel ten Arameak vit, “!Talita kumi!” koa aneite teni vi “!Titi atouli mea!”[m]

42 Hatte tas, atouli enek mea ka kaka. Sua onen teindan elu (12). Koakeil vasi en out enek, e von eni. 43 Ka Iesu vat kati min keitel, keke telnahitehitentei min meatin sav keil asa koa kei mumoni. Evus, viteni min tata ka mama onen titi atouli enek keke luhesan anien min atouli onealu.[n]

<- Mak 4Mak 6 ->