1 Evus, Iesu ra usil tatavolien tai min avat keil onen Siu keil vit, “En avong tai, meatin tai luh nei grep en atan onen. Mumon vieh karahiti, kil avul tai koa vi out koa avuhus lat si grep rani, ka muti avet tai vina nesa taleikokoeien. Navong mum vasi umen enek, horetan ekek maen meatin sav keil umai alosil kati. Ka meatin keil enek avat kati mini keke isa ris hati hei grep keil teni mini. Evus, horetan enek va en kantri sav tai.[b]

2 “Sua vahis muli va, ka hei grep keil umai umen. Sakini, horetan enek sila slev tai va vales koakeil alosil kat nei grep osen keke vakur hati hei grep keil ka valahi vamai ris veni. 3 Ka navong slev enek rokol nei grep ekek, koakeil alosil kati avuli kati, amu puruni, ka asila ris va ka arsan etai tounah mini.”

4 “Evus, horetan enek sila slev sav tai onen va. Ka koakeil losil kat nei grep enek amuasi en vatin, apuruni, ka asila ris va. 5 Sakini, horetan enek sila slev tai ris, ka meatin keil enek amu vini suk. Navong sila slev sav keil emun, amumoni min keil vatte tas: tei en keil amu purun keil, teisav en keil amu vinvini varei. 6 Horetan enek mumoni va vio … natnali kati koa tas eli mul, kei koa envatien onen mul ien. Sakini, kei sila natnali va ven meatin keil enek veni mundemi vit, ‘Keil ihouhou min natmali kati.’[c]

7 “Ka navong koakeil alosil kat nei grep enek ales natnali mul mai, aviteni min keil eris avit, ‘Horetan ten out enek, natnali keiek. !Almai, rovouasi vamat! !Hesakini, tounah keil onen hemai hehi orer esuk!’ 8 Sakini, avuli kati ka amu vini. Evus, aso lat teiai onen va ran nei grep enek.”[d]

9 Evus, Iesu vis avat keil onen Siu keil koa araengon tatavolien enek vit, “?Ka mukave? ?Horetan enek houmon sa suk en meatin keil enek? Kei hemai, hou vinvini meatin keil enek, ka hemae lat nei grep heha min meatin sav keil keke avalosil kati. 10 ?Mukave? ?Kami mirvulitei selusien enek ten Tus Votut? Veni viteni vit,

13 Hetetamen onen Siu keil koa along tatavolien onen Iesu asila Farasi keil koa ral min tei en Siu keil koa amusil Asuv Herod, keil uva avit avakaluvat Iesu.[h] 14 Umai ka avit, “Tiser, mekilea keik komul koviten anatinien, kormusiltei rendemien onen meatin sav keil. Avaseini komul ral hetetamen keil vuo ehon keil enges, hihiseien onom mal enges usil sise koa Ahi en vat meatin keil avousili. Mukok, hit visi min komai. ?Hemal enges keke ir, Siu keil, rehul takis heha min kavmen ten out Rom? ?Rehehuli vuo rehervultei?”

15 Avaseini keke amul aluvos avit avamai en sakien koa tahos, Iesu mundem kilea rendemien tatisa one ka vit, “?Vensa misak visi mivakaluvat inau? Alsan etai mani koa avul takis eni minau malesi.”

16 Keil asan mani tai mini, ka vis keil vit, “?Nan isei ke? ?Isen isei mul ien?”[i]

Keil avit, “Asuv Houlu ten out Rom keinek.”

17 Sakini, Iesu vit, “Tounah koa onen asuv houlu, mihesan risi mini. Ka tounah koa vi onen Ahi, mihesan risi min Ahi.”[j]

Sakini, keil amutimanin en selusien onen Iesu.

18 Evus, Satusi keil, koa avit meatin sakras vamoul eris ran matien, umai ven Iesu ka avisi avit,[l] 19 “Tiser, Mosis mutis mengkatien koanik vi orer koa vit, ‘Munak meatin tai mat ran ahin onen ka titaealu tovuol, tunali meatin enek hekur vatina onen. Hesakini, luhekur ehon koa ilesi hesuval natin meatin koa mat.’[m][n] 20 Mulamu, time oulu (7) aro ekonek. Koa moeite retalihe, ka navong mat, titan tovuol. 21 Evus, koa katau eni kur vatina onen. Ka kei mun mat ka titaealu tovuol. Tounah enek kistal emun en tunali koa etel en keitel. 22 Sakien enek kistal en time oulu (7) keil vasi ka titiali one tovuol. Ka katau suk, ahin emun mat. 23 ?Sakini, navong meatin vasi keil imoul eris ran matien, ahin enek hehi ason isei? Veni time oulu (7) keil vasi enek akur ahin enek vi one.”

24 Iesu vit kesi vit, “Ileilien onami tamureis. ?Mirkileatei vensa? Veni mirkileatei Tus Votut vuo keihoen onen Ahi. 25 En avong koa meatin keil imoul eris ran matien, isuval angelo keil en out nesa koa sakien ten tetaliheien tovuol. 26 ?Ka en usite ten meatin keil koa imoul eris ran matien, kami mirvulitei selusien koa Mosis mutisi usil holeai koa ahang mul ien ka romukan rekountei? Ekonek mutisi keke Ahi viteni min Mosis vit, ‘Inau navi Ahi onen Ebraham, Ahi onen Aesak, ka Ahi onen Siekob.’ Eksodas 3:6[o] 27 ?Milonge? Kei vi Ahi onen koakeil amoul, rovitei onen koakeil umat. Rendemien onami romaltei vareis.”

28 En avong enek, tiser tai ten mengkatien onen Mosis mul raengon selusien koa Iesu mul viteni min Satusi keil. Kei lesi keke Iesu san selusien koa tahos imok min keil. Sakini kei mea, va ven Iesu ka visi vit, “?Mengkatien koa kave varei vi houlu mok en keil vasi?”

29 Iesu vit kesi mini vit, “Mengkatien koa houlu mok en keil keiek, ‘!Me-Isrel keil, mihelonge! Iahova vi Ahi orer, kei tanges varei vi Ahi. 30 Emi hehat Iahova koa vi Ahi onami en tinomi, en moulien vasi keil onami, en rendemien vasi keil onami, ka en umen vasi keil onami.’ Duteronomi 6:4-5 31 Koa katau eni keinek, ‘Em hehat meatin sav hesuval koa keik em vat keik eris.’ Levitikas 19:18[q] Mengkatien tovuol emun valohlin koakeilu ekek.”

32 Tiser ten mengkatien vit risi vit, “Tahos imok, Tiser! Anatin suval koa koviteni keke Ahi tas, ahi tateisav tovuol emun.[r] 33 Ka ir, er hehat Ahi en tiner, ka en moulien vasi keil orer, en rendemien vasi keil orer, ka en umen vasi keil orer. Ka envatien orer hel en meatin sav hesuval koa er vat ir netin. Koanik tahos imok keke rehendem kati ka rehoumoni, helohlin koa rehoumon sanien votut houlu hehina min Ahi.”[s]

34 Iesu long kilea keke selusien onen tahos imok, ka viteni mini vit, “Keik, vesesal hiasuvien onen Ahi val en moulien onom.”[t]

Koanek evus, meatin vasi keil ametau varei avahis ris Iesu en etai tounah.

35 Navong Iesu mul visein meatin keil en Eim Votut, vis keil vit, “?Vensa varei tiser keil ten mengkatien onen Mosis aviteni avit Mesaea koa Ahi hetie lati hekistal en vatiamal onen asuv houlu Deved telamu? 36 Veni Ninin Votut san rendemien min Deved koa sakini viteni vit,

38 Navong Iesu mul visein meatin keil vit, “Mihelei kat revi tiser keil ten mengkatien. Keil e vati aval avoual vatal more eisin koa taveah ka e vati mun meatin keil avahouhou min keil en out ten lahruaien. 39 Keil alei kan out keil koa asak koe ven mari meatin keil en eim tahihiseien onen Siu keil ka out tetahos emun en avong ten ale. 40 Ven metenan one, alah tounah houlu ran vatina keil, ka en meten meatin amul amumon hisien tetaveah. !Mahien koa Ahi hesani min keil hetisa mok helin koa hesani min meatin sav keil!”

41 En avong enek, Iesu rondan vesesal en out ten sanien keil koa vakataun umen ten Eim Votut. Mul les meatin keil amul ason mani one va ien. Meatin keil houlu koa tounah one houlu ason mani houlu.[aa] 42 Evus, vatina tai, kei vi livere, mai son titi mani elu nges. 43 Ka navong Iesu lesi, vise ruain meatin onen keil ka viteni min keil vit, “Naviteni min kami, vatina ekek, sanien onen mariso mok va en Eim Votut, lohlin meatin sav keil.[bb] 44 Veni teisav keil ason koa vi teisao en tounah one keil. Ka vatina ekek vi livere mok, ka kei so vasin mani onen, koa vahi ten anien an.”

<- Mak 11Mak 13 ->