1 Iesu viteni min meatin keil onen vit, “Vi anatin keke sakien keil koa houmon meatin hemot en tisaen hemai. !Ka hetisa mok min meatin koa hehi sise ten tisaen keil ekek hemai en mesav keil! 2 Veni mahien koa Ahi hesani min koakeil amumon meatin tai koa rokeihtei en demkatien onen mot en tisaen hemariso vis hemariso mok. Anatin, mahien koa hesani min keil heli mahien onen meatin tai koa apar kat mari ahat tai en hiren ka amarindu eni va en huinev ten atas. 3 !Sakini, mihelei kat revi kami keke minoumontei tumali keil en demkatien anamot en tisaen![b]

“Munak tumali en demkatien mumoni tisa minuk, kitali mal eni. Ka munak kei viles moulien onen ran tisaen enek, kilele hetahos eris mini. 4 Ka avaseini munak tumali enek mumoni tisa minuk avong houlu en avong tas, ka en avong vasi kei mai venuk ka viteni minuk vit, ‘Namum tisa li minuk ka nirmumontei mun hemukonek,’ mal keke kilele hetahos eris mini.”

5 Navong meatin keil onen alonge mukok avis Iesu avit, “O Asuv eli, umon demkatien onomai vakeih tamun.”[c]

6 Ka kei viteni min keil vit, “Anatin keke demkatien onami havivi ramat. Veni munak demkatien onami havivis suval titi utiai tai, mikilea mivoumon merikel keil suval mivahiteni min mari vatiai ekek mivahit, ‘!Kileh latuk ran atan ekek, ka kiha, kiluh ris keik en atas ke va!’ Ka kei helong katuk.”[d]

7 Iesu viteni mun min meatin keil onen vit, “Kami mikilea tuai sakien onen hetamen tai koa sila slev onen vaha voum en ah sen vuo valosil kat sipsip keil esen. Navong slev onen mum evus, hetamen onen sakras vahiteni mini vahit, ‘!Amai anian!’ 8 Vuo, sakien onen hetamen tai romukteinek. Kei hehiteni min slev onen hehit, ‘Sak mesein anien ak emau. Hevus, kikekes en eisin omom keil ka kikur anien ak hemai. Kitosin nau mau nianian. Ka katau suk, keik kokilea kovaha kovaanian.’ 9 ?Ka mukave? ?Hetamen enek hemasmas slev onen veni mumon asa koa kei meng kati voumoni? Vuo, sakras. 10 Ka koanik suval kami etin. Navong kami mimumon umen vasi koa Ahi viteni min kami mivoumoni, kami mihehitenis mihehit, ‘Komai mevi slev keil enges, ka memul memum musil asas koa Ahi viteni min komai keke mevoumoni.’ ”

11 Navong Iesu ral min meatin keil onen amul amual en sise uva en taon ten out Serusalem, keil alokovein provins ten out Kaleli ka aka pas hakot uva en provins ten out Sameria.[e] 12 Navong amul amual uva en meteimal tai, avisu en meatin halualim (10) koa akur mesaien ten leprosi en ave. Navong ales Iesu amules amulomal soutin[f] 13 ka aviso va mini avit, “!Asuv Iesu! !Em hemahis komai li!”[g]

14 Iesu lele va ven keil ka viteni min keil vit, “Alha, mihetie lat kami min pris keil keke keil ilei rahit avemi.” Ka navong amul amual en sise uva ven pris keil, ave mai muto ris ran mesaien one.[h]

15 Navong tai en keil lesi keke aven muto ris, kei va ris ven Iesu, ka viso keih en masmasien onen min Ahi veni. 16 Kei retengeiril netan ven Iesu ka san masmasien onen mini. Ka meatin enek rovitei Siu tai, kei vi koan Sameria. 17 Ka Iesu vis meatin keil onen vit, “Meatin halualim (10) koa avemi mai muto ris. ?Koa teisav en keil koa avi ouhat (9) aro kave? 18 Meatin koanek rovitei Siu tai. ?Vensa suk kei sasen enges mai keke vasan masmasien onen min Ahi?”

19 Sakini, Iesu viteni min meatin enek vit, “Mea, kusil sise onom kiha. Demkatien onom mumon avem muto.”[i]

20 En avong tai, tei en Farasi keil avis Iesu avit, “?Ahi hemai hesakin hiasuvien onen hel ven meatin keil en avong sa varei?”[k]

Ka Iesu vit kesi min keil vit, “Hiasuvien onen Ahi hermaitei en sise koa meatin keil akilea avalesi en mete. 21 Meatin sakras vahiteni vahit, ‘!Allesi ekek!’ vuo ‘!Allesi keiva ke!’ !Vuo! Veni hiasuvien onen Ahi mul tuai vesesal ven kami.”[l]

22 Evus, Iesu viteni min meatin keil onen vit, “Avong tatisa keil mul mai, ka nirtotei hetal min kami. Ka en avong keil enek, emi hehati keke Natin Meatin vamai vasakini mivailea mivato en tahosien vatal mini, avaseini munak vahi ten avong vatas. Ka miherlestei mau. 23 Ka mihelong meatin keil ihit, ‘!Alles Natin Meatin keiva kek!’ vuo ‘!Kei ekek!’ Ka minahatei ka minousiltei keil.[m] 24 Naviten koanek min kami, avong koa Natin Meatin hemai ris eni, hemai hatte hetas en sakien tai koa meatin vasi keil ilesi ka itimanin eni. Hesuval avong ahil vil ritin en teilang en usite tai va rokol usite sav emun. 25 Ka helamu, kei hekur mahien hehi houlu mok, ka meatin keil ten avong kosa iseseini.[n]

26 “Avong onen Natin Meatin hemai hekistal hesuval avong onen Noah mulamu koa meatin keil arsak meseitei.[o] 27 En avong enek, meatin keil amul akanian, amunmun, ka amul aretalihe rokol avong koa Noah va neim en mari sip onen, ka amutimanin, oai mue sien out vasi ka mu lin meatin vasi keil enek umat.[p]

28 “Avong onen Lot emun suvali. Meatin keil amul akanian ka amunmun, keil amul avulhul ka asalem en tounah keil, keil amul aluhluh en ah keil ose ka amul amuti eim keil one.[q] 29 Ka navong Lot mea ka lokovein meatin keil ten out Sodom, amutimanin, ahang ka ahat keil koa vilhili ka en out nesa. Ahat keil enek umotmot avita netan, umai amu vini meatin keil vasi ekonek umatmat.[r] 30 Ka avong koa Natin Meatin hemai hekistal hesuval avong keilu ekek koa meatin keil itimanin eni.

31 “En avong enek, meatin tai koa mul museh hae hervatei mun neim keke vakur tounah keil onen. Ka meatin koa mul en ah, hervatei mun teim sen vakur etai tounah.[s] 32 Mihendem usil mahien koa kistal en moulien onen ahin onen Lot.[t] 33 Munak meatin tai en vati vahuli kat moulien onen vakeih, moulien onen hevuol rani. Ka munak kei hemaen moulien onen vavuol, meatin enek hekur moulien.[u] 34 Naviteni min kami, en avong enek, meatin tai keilu ahin onen luhematil en suvon hetas, ka Ahi hekur tai hehina heto hetal mini, ka tai en keilu helokoveini heles. 35 Ahin helu luhel luhoum vituai en anien out hetas, ka Ahi hekur tai hehina heto hetal mini, ka tai en keilu helokoveini heles.” 36 *Tei en tus matu keil ten Luk asorin selusien enek ten Mat 24:40 koa vit, “Meatin helu luhel luhoum en ah tai, ka Ahi hekur tai hehina heto hetal mini, ka tai en keilu helokoveini heles.”

37 Selusien keil onen mumon meatin keil onen avisi avit, “?Asuv, Natin Meatin hemai ris hekistal en out kave?”[w]

Ka Iesu vit kesi min keil vit, “Meatin vasi keil ilei kilea amairisien onen Natin Meatin hel en out kave veni hemai hetal min mari mahien. Anatin, ilei kilea en out enek en vati sakien koa alei kilea out koa tounah tai mat mul ien navong ales vangi angolu keil houlu amul en out tas.” †Selusien kati teni vit, “voltsa,” mari aman tai koa mul muka rahit tounah tai koa mat.

<- Luk 16Luk 18 ->