1 Iesu va en Hou Nei Olip ral min meatin keil onen ka amatil ien.[b] 2 Out mulan, Iesu va ris en teahu ten Eim Votut. Meatin houlu umai veni ka akarahiti, ka Iesu rondan ka visein keil.[c] 3 Navong mul veah vihisei, tiser keil ten mengkatien keil onen Mosis ka Farasi keil amulamun ahin koa avotini matil ral min meatin tai koa rovitei meatin kati onen. Ka asakin ahin enek mulomal en meten meatin keil. 4 Evus, aviteni min Iesu avit, “Tiser, ahin ekek, navong avotini, mul semau matil ral min meatin tai koa rovitei meatin kati onen. 5 Mengkatien onen Mosis viteni keke reheov vini ahin keil vatinek. ?Ka keik, koviten sa?”[d] 6 Keil avis Iesu mukok keke akilea avahuli kati ven selusien onen.[e][f]

Ka Iesu malingling, ka mutis tounah tai en atan ral min kalihen. 7 Ka keil amules avisi vasa kes hihiseien one. Sakini, mulomal ka viteni min keil vit, “Isei en kami koa romumontei tounah vatisa, kei varei heov rohtoh eni.”[g] 8 Evus, malingling eris, ka mutis tounah tamun en atan.

9 Navong tiser keil ten mengkatien onen Mosis ka Farasi keil alonge mukok, tetai en keil vasi uva. Koakeil amatu uva mulamu, tai evus, tamun va vio … Iesu kei sasen ro, ka ahin enek mul veah mulomal en meten.[h] 10 Evus, Iesu mea mulomal ka viteni mini vit, “?Ahin, meatin keil uva kave? ?Mukave? ?Tovuol en keil vato vahit kimat ven tisaen onom?”

11 Ahin vit kesi vit, “Asuv, meatin tovuol.”

Ka Iesu viteni mini vit, “Hesakini, inau mun nirvitentei keke kikur etai mahien. Ka kiha ris teim, ka kosa heha, konoumtei mun natisa.”[i]

12 Navong Iesu mul veah en teahu ten Eim Votut, selus eris min meatin keil vit, “Inau navi meneai en out netan koa ritin luvat rendemien onen meatin keil. Ka meatin koa mul musil inau hermualtei en mankoli, veni meneai koa hel ien hetitin luvat sise ten moulien mini.”[j][k]

13 Farasi keil koa alonge aviteni mini avit, “Keik kos komules koselus en usite onom. Sakini, mesakras mevakur anatin en selusien onom.”[l]

14 Iesu vit kesi vit, “Anatin keke namul naselus en usite onak. Ka asa koa naviteni anatin veni nakilea out kave naka ien, ka nakilea out koa niha ien. Ka kami mireingeingen out kave naka ien vuo out kave niha ien.[m] 15 Navong kami milei rahit en usite onak, mimusil rendemien onen meatin keil enges ten out netan. Ka inau, narmultei malei rahit usite onen meatin keil.[n] 16 Ka avaseini munak nilei rahit usite onen meatin tai, asa koa nihiteni hehi anatin. Veni rovitei inau sasok koa namumoni, ka inau komal Tata onak koa sila inau namita mellei rahit vituai eni.[o] 17 En mengkatien keil onen Mosis koa kami varei mimusil kati, aviteni keke navong selusien onen meatin elu usil tounah tai luvinvin, meatin keil akilea avakur anatin keke asa luviteni vi anatin.[p] 18 Sakini, inau naselus en usite onak, ka Tata onak koa sila inau, kei emun mul selus en usite onak.”[q]

19 Ka avisi avit, “?Mukonek, tata onom kave?”[r]

Iesu vit kesi vit, “Kami mireingeingen inau ka mireingeingen Tata onak emun. Veni, munak mikilea enau, mivailea en Tata onak emun.”

20 Navong Iesu viten tounah keil enek, mul en teahu ten Eim Votut, vesesal en out koa aling revi mani ien. Ka avaseini out enek vesesal en out koa hetetamen onen Siu keil alah ruai ien, meatin tovuol vahuli kati, veni avong onen romaitei veah.[s]

21 Evus, Iesu vit risi min tiser keil ten mengkatien onen Mosis ka Farasi keil vit, “Inau niha en out sav tai, ka avaseini mihelekat vis inau, kami miherhotintei inau. Kami mihemat ka mihekur mahien ven tisaen keil onami. Out koa inau niha ien, kami misakras mivaha ien.”[t]

22 Hetetamen keil onen Siu keil areingeingen aneite ten selusien onen Iesu. Sakini aselus min keil eris avit, “?Vensa varei viteni keke rosakras rovaha en out koa kei heha ien? ?Hemukave? ?Hou vini kei sasen enges?”[u]

23 Iesu vit risi vit, “Kami mivi ten out netan enges. Ka inau, navi ten out nesa. Kami mivi meatin keil ten out netan, ka inau narvitei ten out netan.[v] 24 Sakini, naviteni keke kami mihemat ka mihekur mahien ven tisaen keil onami. Veni munak kami miherkurtei anatin eni keke inau navi kei,§Vahesa selusien enek vahit, “inau NAVI,” koa vi ‘Iahova,’ isen kati onen Ahi (Eks 3:14). anatin keke mihemat hetal min tisaen keil onami.”[x]

25 Keil amutimanin avit, “?!Keik kovi isei varei!?”

Ka Iesu vit kesi vit, “Mulamu rokol kosa, namul navit usil inau min kami. 26 Inau nakilea maselus usil tounah houlu koa tisa vaha kat usite onami. Ka namul navit leini min meatin keil ten out netan asas koa Tata viteni minau veni nakilea keke kei koa sila inau namita vi anatin.”[y]

27 Navong Iesu mul vit usil Tata onen, keil areingeingeni keke Iesu mul selus usil Tata onen en out nesa. 28 Sakini, Iesu viteni min keil vit, “Navong kami mihou lat Natin Meatin hehina nesa,[z] mihelei kilea keke inau navi kei.**Vahesa selusien enek vahit, “inau NAVI,” koa vi ‘Iahova,’ isen kati onen Ahi (Eks 3:14). En avong koanek miheilea suk keke narmumon etai tounah vousil rendemien onak sasok. Ka namul naviten asas koa Tata onak mul viseinau eni.[bb] 29 Ka kei koa sila inau mul venau ka rolokoveintei inau. Veni, lisenges, namul namumon asas koa mal en meten.”[cc] 30 Navong Iesu viten tounah keil enek, meatin keil houlu akur anatin eni keke vi Mesaea anatin.[dd]

31 Evus, Iesu lesi keke tei en Siu keil akur anatin eni, ka viteni min keil vit, “Munak mihehikiti keke mihelong kat hihiseien keil onak, hetie lati keke mihehi meatin keil onak anatin.[ee] 32 Miheilea asa koa vi anatin, ka anatinien enek hesakin kami mihemaluv anatin.”

33 Ka keil avit, “Komai mevi vatiamal onen Ebraham, ka mervitei slev onen etai meatin en avong etai.[ff] ?Sakini, vensa varei koviteni keke komai mehemaluv anatin?”[gg]

34 Iesu viteni min keil vit, “Naviteni anatin min kami keke meatin vasi koa amumon tisaen umai avi slev keil teni.[hh] 35 Ka slev tai, vulin tovuol en vatiamal kati onen masta onen. Ka natin masta enek, vulin kati en vatiamal onen mul lisenges.[ii] 36 Sakini, munak Natin Ahi sakinuk komaluv, kimaluv anatin. 37 Nakilea keke kami mivi vatiamal onen Ebraham keil. Ka avaseini, mimul misak visi mivalekat sise keke mivou vini nau vaka ien. Ka emi vati keke mivou vini nau veni out tovuol en tinomi keke selusien onak vaha vato ien.[jj] 38 Inau namul navit mesein asa koa nalesi navong naro ral min Tata onak. Ka kami, mimul mimumon asa koa tata onami viteni min kami keke mivoumoni.”

39 Keil avit kesi avit, “Tata onomai Ebraham.”[kk]

Ka Iesu viteni vit, “Munak kami mivi titan Ebraham keil anatin, kami mivaleisungein sakien keil onen. 40 Inau navit meseini min kami anatinien koa Ahi viteni minau. Ka kami, misak visi mivou vini inau. Koanek rovitei sakien keil onen Ebraham. 41 Vuo. Kami mimul mimumon sakien keil onen tata kati onami.”[ll]

Ka keil aviteni avit, “!Ei! !Rovitei komai koa mevi ehon keil ten sise! Tata onomai tas, koa vi Ahi varei.”

42 Iesu viteni min keil vit, “Munak vi anatin keke Ahi vi Tata onami, envatien onami val enau. Veni inau naka ven Ahi, ka kosa, namul ekok. Narmaitei vousil rendemien onak, ka Ahi sila inau.[mm] 43 Ka nakilea vensa varei kami misakras mivalong kilea asa koa naviteni. Veni emi rovattei mivailea en selusien keil onak. 44 Tata onami vi Temat varei ka emi vati mivoumon asa koa kei en vati kami mivoumoni. Veni kei sakin meatin keil amu vinvini mesav keil en avong telamu rokol kosa. Kei romultei en usite ten anatinien, veni anatinien tovuol ien. Navong mul liluvos, mul viten selusien kati onen, veni kei vi uti luvosien ka vi tata onen koakeil aliluvos.[nn] 45 Sakini, veni asa koa inau naviteni min kami vi anatin, kami mirkurtei anatin enau. 46 ?Isei en kami kilea vahit lat asa varei namumoni tisa? Misakras. ?Ka munak naviten asa koa vi anatin, vensa varei mirkurtei anatin en selusien keil onak?[oo] 47 Koakeil avi meatin keil onen Ahi amul along kilea selusien keil onen. Ka kami mirvitei onen Ahi, sakini mirlong kileatei.”[pp]

48 Siu keil aselus karen Iesu avit, “!Ei! Meviteni anatin navong mevit kotisa suval koan Sameria tai ka ninin tisa tai mul enuk.”[qq]

49 Ka Iesu vit kesi vit, “Ninin tisa tovuol enau. Inau navouhou min Tata onak, ka kami mirvouhoutei minau. 50 Narsak vistei mahou lat isok vahina nesa. Ka tai mul koa en vati vahou lat isok, ka kei helei rahit usite onami.[rr] 51 Naviteni anatin min kami keke koakeil along kat hihiseien keil onak irvatei en matien en avong etai.”[ss]

52 Siu keil aviteni mini avit, “Ekek, mekilea revi keke ninin tisa mul enuk. Ven Ebraham mat, ka provet keil emun onen Ahi umatmat. Ka keik komul koviteni keke koakeil along kat hihiseien keil onom irvatei en matien en avong etai.[tt] 53 ?Mukave? ?Komul koviteni keke kovi hetetamen imok mulin avu Ebraham koa mat? ?Ka mukave en provet keil? ?Komul koviteni keke kovi hetetamen imok mulin keil, veni keil emun umat? ?Keik komul koviteni keke kovi isei varei?”[uu]

54 Iesu vit kesi vit, “Munak inau navou lat sasok en isok, eis koanek hehi heisav enges. Ka vi Tata onak koa mul vou lat isok. Kami miviteni mivit kei vi Ahi onami, 55 ka mireingeingen kei. Ka inau nakilea, ka nasakras maliluvos mahit nareingeingeni. Veni vamukonek mahi uti luvosien vasuval kami. Anatin, inau nakilea, ka namul nalong kat selusien keil onen.[vv] 56 Ebraham, avu onami, kei mundem kilea keke avong onak hekistal, ka si kei houlu veni.”

57 Siu keil aviteni mini avit, “Sua onom rorokoltei veah hanumau elu ka halualim emun (50). ?Sakini, kovit koles Ebraham mukave?”

58 Iesu vit risi min keil vit, “Inau naviteni anatin min kami keke navong Ebraham arvasitei veah, inau NAVI.” Eksodas 3:14 ‡‡En selusien ten Hibru, “inau NAVI,” vi ‘Iahova,’ isen kati onen Ahi (Eks 3:14).[xx]

59 Navong Siu keil along asa koa Iesu viteni, alah ahat keil avit avove. Ka Iesu va suai ran keil ka lokovein teahu ten Eim Votut.[yy]

<- Sion 7Sion 9 ->