1 Katau en koanik, Iesu mual ka mum en out keil en provins ten out Kaleli. Ka en rovattei vaha en provins ten out Sudea, veni kilea keke hetetamen keil onen Siu keil alekat ahho keke avou vini.[a] 2 Ka navong Ale ten Votevav Keil mai vesesal,[b] 3 tunali Iesu keil aviteni mini avit, “Konatoteis ekok en provins ten out Kaleli. Hetahos imok kiha en provins ten out Sudea keke koakeil e vati avousiluk akilea avales merikel keil koa komul komumoni. 4 Kiha ekonek veni meatin koa en vati vamai vahi hetetamen tai en meten meatin keil sakras voum suai. Sakini, munak vi anatin keke kokilea kovoumon merikel keil, kumoni en mesaiuai keke kihothot enuk min meatin keil ten out netan.” 5 Tunali keil aviteni mukonek veni, avaseini avi tunali kati, keil emun arkurtei anatin eni keke kei vi Mesaea.[c]

6 Ka Iesu viteni min keil vit, “Avong keke nihothot enau min meatin vasi keil romaitei veah. Ka kami mikilea mivoumon asa koa emi vati en avong vasis.[d] 7 Meatin keil ten out netan tine rokattei kami. Ka tine mul kat inau veni namul navit leini keke sakien keil one tisaso.[e] 8 Kami miheha en mari ale ekek. Inau nirvatei mau, veni avong romaltei veah keke maha.” 9 Navong Iesu selus mukok, kei ro enges en provins ten out Kaleli.

10 Navong tunali Iesu keil uva en ale, Iesu ro nges teim avong vahis emun. Evus, kei mun va, ka mum suai eni ral min meatin keil onen keke meatin sav keil emun areingeingeni. 11 En out Serusalem, hetetamen keil onen Siu keil amul alekat vis Iesu en vangi meatin keil koa umai ven ale. Keil amul avis meatin keil avit, “?Meatin ekek mul kave?”[f]

12 Meatin keil koa umai en ale enek aselus lelau houlu usil Iesu. Tei en keil avit, “Kei vi more meatin tai.” Ka tei mun en keil avit, “Vuo, kei mul luvos meatin keil.” 13 Ka meatin keil arselus leintei usil Iesu veni ametau keke hetetamen keil onen Siu keil analongtei ka anoum nakeih kat keil.[g]

14 Navong Siu keil amul veah amumon tounah ten ale enek, Iesu mai en out Serusalem, va en teahu ten Eim Votut, ka visein meatin keil ien. 15 Ka navong hetetamen keil onen Siu keil along hihiseien keil onen, amutimanin eni avit, “?Meatin koanek kur ileilien keil ekek en out kave, veni kei rovatei en sukul keke avahiseini?”[h]

16 Iesu vit kesi vit, “Tounah keil koa namul navihisei eni arkatei venau. Aka ven Ahi koa sila nau.[i] 17 Koakeil e vati avoumon asa koa Ahi en vati, keil ilea keke hihiseien keil onak aka ven Ahi ka arkatei ven inau sasok. 18 Meatin koa mul san selusien koa ka ven kei sasen enges, kei en vati vahou lat kei sasen enges vahina nesa. Ka meatin koa mul sak visi vahou lat kei koa sila, kei vi anatin ka luvosien tovuol ien.[j] 19 Kami vasi mikilea keke Mosis san mengkatien keil min kami. Ka tovuol en kami mul long kat vasi mengkatien keil enek. ?Sakini, vensa varei mimul milekat ahho keke mivou vini nau?”[k]

20 Vangi meatin keil koa araengoni aviteni mini avit, “Vahesa temat tai mul enuk koa viles rendemien onom. ?Isei varei sak visi vou vinik?”[l]

21 Iesu vit kesi vit, “Inau namumon merikel tai en Sabat ka mimutimanin eni ka tinomi kat inau veni.[m] 22-23 Ka kami emun mimumon umen tai en Sabat navong mimusil mengkatien keil onen Mosis usil vekahoi. Veni kei meng kati vit ehon keil onami iha en vekahoi navong avong one hehi outel (8) kati.[n] Ka munak avong enek kistal en Sabat, mimumon umen enek ten vekahoi en Sabat keke mirrali kotehtei mengkatien koanek onen Mosis. Ka rovitei Mosis koa mum rohtoh en mengkatien koanek, vati avu onami keil telamu amumon rohtoh eni. Sakini, romaltei keke tinomi kat inau veni nasak revi vasin aven meatin tai en Sabat.[o] 24 Sakini, minalei rahittei mun meatin keil nousil lesien onen meatin keil. Ka mihelei rahit asa koa meatin tai mumoni housil rendemien koa mal anatin.”[p]

25 Navong tei en meatin keil en out Serusalem ales Iesu mul vihisei avit, “?Rovitei meatin koa hetetamen keil orer e vati avou vini?[q] 26 !Ka miheles visi! Kei mul selus en out koa vi mesai en meten meatin keil, ka hetetamen keil arviten etai tounah. Vahesa keil akilea vi anatin keke kei vi Mesaea koa Ahi vat kati keke hesani hemai. 27 Ka avit navong Mesaea hemai, meatin hetovuol heilea keke ka kave. Sakini, kei sakras vahi Mesaea veni rokilea keke meatin enek ka kave.”[r]

28 Navong Iesu vihisei en teahu ten Eim Votut, kei selus va nesa vit, “?Mukave? ?Anatin keke kami mikilea inau ka out kave naka ien? Narmaitei ekok vousil rendemien keil onak. Numai ekok musil rendemien onen Ahi koa sila inau. Kei varei vi anatin, ka kami mireingeingeni.[s] 29 Inau nakilea eni, veni naka veni ka kei sila inau namita.”

30 Navong along selusien onen, meatin keil e vati mok avahuli kati. Ka meatin tovuol voumoni veni avong kati onen romaitei veah.[t]

31 Ka meatin keil houlu akur anatin keke kei vi Mesaea. Veni avit, “Aviteni avit navong Mesaea hemai, kei houmon merikel keil hehi houlu. !Ka meatin tovuol kilea voumon merikel keil vahi houlu imok valin koakeil Iesu mul mumoni!”[u]

32 Farasi keil along asa koa vangi meatin keil amul aselus lelau eni usil Iesu. Sakini, keil ka asuv keil onen pris keil asila meatin taleikokoeien keil koa alei kokoe en Eim Votut onen Ahi keke avaha avahuli kat Iesu.

33 Navong meatin taleikokoeien keil amul umai, Iesu viteni vit, “Nito hetal min kami avong hehi havivis. Hevus, niha ris ven kei koa san inau namita.[v] 34 Kami mihelekat vis inau, ka mihervotintei inau. Mihervotintei inau veni misakras mivaha en out niha nito ien.”[w]

35 Navong alonge mukok, hetetamen keil aviteni min keil eris avit, “?Meatin enek heha en out kave koa rosakras rovahotini? ?Vahesa heha ven Siu keil koa amul en kantri sav keil, vuo heha hehisein me-Gris keil varei? 36 ?Asa varei aneite ten selusien onen keke rehelekat visi, ka rehervotintei?”

37 En avong ekor ten avong oulu (7) ten ale enek koa vi hetetamen imok mulin avong sav keil teni, Iesu mulomal en teahu ten Eim Votut ka selus vina nesa vit, “Kami koa maroro kat kami mihemai venau.[x][y] 38 Meatin koa kur anatin en inau hemai hemuni. Ka asa koa Tus Votut vit usili hekistal hehi anatin koa vit, ‘Nisakin oai koa san moulien hemai heka en tin meatin, ka houe hehi houlu hesuval oaisal tai.’ ” Aesea 44:3 39 Navong Iesu viten selusien koanik, vi tatavolien tai usil Ninin Votut. Aneite teni vi koakeil akur anatin keke kei vi Mesaea, Ninin Votut hemai heto en keil. Ka en avong enek, Ninin Votut romaitei veah en meatin keil, veni Iesu rovinatei veah keke vakur hetetamenien onen.[z]

40 Navong meatin keil along selusien keil ekek onen Iesu, tei en keil avit, “!Meatin ekek vi Provet koa suval Mosis koa Ahi vat kati keke hesani!”[aa]

41 Ka tei keil avit, “Vuo, kei vi Mesaea varei.”[bb]

Ka tei mun en keil avit, “Kei sakras vahi Mesaea veni Mesaea sakras vaka en provins ten out Kaleli. 42 Veni Tus Votut viteni keke Mesaea heka en vatiamal onen asuv houlu Deved, ka ihasi en out Betlehem, taon koa Deved ro ien en avong telamu.”[cc] 43 Sakini, vangi meatin keil enek akur rendemien tateisav keil usil Iesu.[dd] 44 Ka tei keil e vati avahuli kati, ka meatin tovuol vaha voumoni.[ee]

45 Meatin taleikokoeien keil ten Eim Votut koa asuv keil onen pris keil ka Farasi keil asila keil keke avaha avahuli kat Iesu along tounah koa Iesu viteni. Evus, uva ris ven avat keil one. Ka navong asuv keil onen pris keil ka Farasi keil alesi keke umai hon enges avit, “?Vensa varei mirvuli kattei Iesu?”

46 Ka meatin taleikokoeien keil avit kesi avit, “Mirvuli kattei veni selusien onen tahos imok. Hihiseien keil onen rosuvaltei onen meatin sav keil.”

47 Farasi keil avis keil avit, “?Mukave? ?Meatin enek luvos kami mun? 48 Tovuol en komai hetetamen keil ka Farasi keil koa vakur anatin eni ka vousili.[ff] 49 Vi meatin kuren keil enges koa arkileatei mengkatien keil onen Mosis keke akur anatin eni. Ka ven koanek, sesendaen mul en moulien one.”

50 Nikodimas, koa va selus min Iesu tuai, kei ro ekonek ral min keil. Ka navong long selusien keil one viteni vit,[gg] 51 “?Mukave? ?Mengkatien keil orer maeni keke rovasan mahien min meatin tai navong rorlei rahittei veah usite onen en kot keke rovahotin asa koa kei mumoni romaltei? Vuo, romaentei.”[hh]

52 Hetetamen sav keil avul kati avit, “!Ei! ?Mukave? ?Keik emun kovi koan Kaleli? Munak kilekat visi en selusien vasi keil ten Tus Votut, kilei kilea keke provet tovuol vaka en provins ten out Kaleli.”[ii] 53 Evus, keil vasi uva ris teim se.

<- Sion 6Sion 8 ->