Seremaea
1
Iahova vise Seremaea mai vi provet onen
Seremaea 1:1-10,17-19; 17:5-10; 20:5
1 Selusien keil koa mul en tus koanek, inau, provet Seremaea, namutisi. Navi natin Hilkia koa vi pris tai koa mul en taon ten out Anatot koa mul en atan onen koakeil akistal en mari vatiamal onen Bensamin. 2 Navong asuv houlu Sosaea,✡ natin Amon, losil kat meatin keil ten out Sudah sua teindan etel (13), Iahova selus rohtoh minau. 3 Ka Ahi selus minau en sua vasi keil koa Sehoiakim, natin Sosaea, vi asuv houlu ka losil kat me-Sudah keil. Anatin, Iahova mul selus minau rokol avong koa asuv houlu Sedekaea, natin Sosaea losil kat me-Sudah keil sua teindan tai (11). En avati koa vi elim en sua koanek, me-Babilon keil umai amu lin me-Sudah keil. Avuli kat keil ka alah vasi keil uva en kantri one ten out Babilon.✡
4 En avong enek, Iahova mai selus minau vit,
5 “Seremaea, mulamu en avong koa namumonuk en vangen mama onom, nakileak tuai.
Anatin, mulamu en avong avasuk, nalei kanuk tuai.
Nalei kanuk kovamai kovahi provet onak kovaha ven meatin keil ten kantri sav keil.”
6 Ka navit kesi mini navit, “!O Iahova ten Keihoen! Inau narkilea revitei sakien keil ten selusien veni navi meatin hau enges.”
7 Ka Iahova viteni minau vit, “Konaselustei konahit keik kovi meatin hau enges. Kiha ven meatin vasi koa nasilak kovaha ven keil, ka kiha kisan selusien vasi keil koa nameng katuk keke kovahiteni. 8 Konametauntei keil veni, Inau, naro venuk ka niting koek. Inau, Iahova, nasan selusien vasi keilek.”
9 Evus, Iahova mutelan hen ka rokol ongok ka viteni vit,
“Kosa naling selusien keil onak mul en ongom.
10 ?Kolonge? Kosa nalei kanuk kovakur keihoen
keke kovahit mesein asa koa hekistal min meatin keil ka en kantri keil emun.
Munak kihiteni minau makulat asuv houlu tai ten kantri tai ka mou lin meatin keil onen,
inau numoni.
Munak kihiteni minau mou rasilin out tai ka maling meatin sav keil avalosil kati,
inau numoni.
Ka munak kihiteni mahati lat kantri tai ka maluh ris ah keil teni,
kei mun, numoni.
17 “!Seremaea, mea, kisak meseinuk ka kiha! Kiha kilomal ka kihitehiten tounah vasi koa nameng katuk kovahiteni. Kosa, konametautei kovaselus en meten meatin keil. Veni munak kil kimetau, asa koa inau numoni heha katuk hesakinuk kimetau hemarite mok en mete.
18-19 Seremaea, kitaengon revi enau. Meatin vasi keil ten kantri koanek ivae heha katuk: asuv houlu keil ten out Sudah, hetetamen keil one, pris keil one, ka me-Sudah vasi keil emun. Ka keil isakras avahitan enuk veni inau niting koek. Kosa nasan keihoen minuk kovamai kovasuval vieh takeih tai koa karahit koe taon tai. Anatin, keik kimai kisuval pos tai ten usi eim koa keih koa amumoni en aean, veni inau, Iahova, naro vesesal venuk ka namese moutut moulien onom.”
Seremaea 2 ->
