3 Minahatei netan min ahi sav keil, miheha netan min inau nges.

4 Minoumontei nana koa nakur niniven tounah keil amul nesa en teilang, vuo amul netan en atan, vuo en huinev ten atas.✡Eks 34:17; Lev 19:4; 26:1; Dut 4:15-18; 27:15 5 Minamalinglingtei ka minahatei netan min etai nana, veni inau navi Iahova, Ahi onami, ka ek rovattei kami mivousil ahi savsav keil. Koakeil aseseinau, nisan mahien heat keil, titae keil, havine keil ka hehita hetokol titae keil one mun.✡Eks 34:6-7; Nam 14:18; Dut 7:9-10 6 Ka koakeil e vat nau ka amusil kat mengkatien keil onak, nitie more envatien onak min keil ka min vatiamal one lises ka lisenges.

7 Minaselus entei en isok natal rendemien tisa vuo heisav enges veni inau navi Iahova, Ahi onami, ka nisan mahien min meatin koa kur heisav en isok.✡Lev 19:12

8 Mihehuli kat avong ten Sabat ka mihehouhou eni veni kei vi votut.✡Eks 16:23-30; 31:12-14 9 Avong onami heite ahetai (6) keke mihoumon umen onami keil eni.✡Eks 23:12; 31:15; 34:21; 35:2; Lev 23:3 10 Ka avong koa oulu (7) vi Sabat, avong koa miheling lati hehi onak, Iahova, Ahi onami. En avong enek, kami, titami, slev onami, buluk ka sipsip esomi, ka meatin keil ten out sav emun koa umai aro ral min kami, kami vasi mihermumtei. 11 En avong ahetai (6), inau Iahova namumon teilang, out netan ka atas, ka namumon tounah vasi keil koa amul en keitel. Ka en avong koa oulu (7), namuseh. Ven tounah enek, inau Iahova narokol kat avong ten Sabat ka naling lati vi votut.✡Sen 2:1-3; Eks 31:17

12 Mihehouhou min tata ka mama onami keil, hesakini moulien onami hetaveah en atan koa nisani min kami.✡Dut 27:16; Mat 15:4; 19:19; Mak 7:10; 10:19; Luk 18:20; Efes 6:2,3

13 Minouastei meatin namat.✡Sen 9:6; Lev 24:17; Mat 5:21; 19:18; Mak 10:19; Luk 18:20; Rom 13:9; Tiem 2:11

14 Minakurtei ahin vuo meatin onen hanu sav.✡Lev 20:10; Mat 5:27; 19:18; Mak 10:19; Luk 18:20; Rom 13:9; Tiem 2:11

15 Minahenantei tounah onen meatin sav.✡Lev 19:11; Mat 19:18; Mak 10:19; Luk 18:20; Rom 13:9

16 Minoumontei luvosien naha kat isen meatin sav.✡Eks 23:1; Mat 19:18; Mak 10:19; Luk 18:20

17 Envatien onami nalentei eim mon hanu sav, vuo ahin onen, vuo slev onen, vuo buluk ka sipsip esen, vuo dongki esen, vuo tounah sav keil onen.”✡Rom 7:7; 13:9

18 Navong meatin keil araengon voulul ka amaru koa musel keih, ka ales ahil vil ka rupas mul en vatihou, keil amaleilei en metauen ka amulomales soutin.✡Hib 12:18-19 19 Keil aviteni min Mosis avit, “Munak keik kos kiselus min komai, mihetaengonuk. Ka munak Ahi heselus eris min komai, mihematmat varei.”

20 Mosis vit risi min keil vit, “!Minametautei! Ahi mita netan enges keke voumon kami mivailea keihoen onen, hesakini, mihelong kati lises, ka mihermumontei mun tisaen keil.” 21 Ka meatin keil amulomales soutin, ka Mosis enges mual va vesesal en out koa Ahi mul ien, en mari mahmah koa malikelik.

<- Eksodas 19Eksodas 21 ->